ترانسكاسپي حالىقارالىق كولىك دالىزىنە بولگاريا پورتتارىن قوسۋ ماسەلەسى قاراستىرىلادى

استانا. KAZINFORM - ترانسكاسپي حالىقارالىق كولىك دالىزىنە بولگاريانىڭ بۋرگاس جانە ۆارنا تەڭىز پورتتارىن قوسۋ ماسەلەسى قاراستىرىلادى.

بۇل تۋرالى اقوردادا بولگاريا پرەزيدەنتى رۋمەن راديەۆپەن كەلىسسوزدەردەن كەيىنگى بىرلەسكەن مالىمدەمە بارىسىندا مەملەكەت باسشىسى قاسىم-جومارت توقايەۆ ايتتى.

- بۇگىنگى كەلىسسوزدەرىمىز مازمۇندى بولدى. ناقتى ۋاعدالاستىقتارعا قول جەتكىزدىك. اتاپ ايتقاندا، ساۋدا-ەكونوميكا جانە ينۆەستيتسيا سالاسىنداعى بايلانىستىڭ اۋقىمىن كەڭەيتۋگە باسا نازار اۋداردىق. ەكى ەل اراسىنداعى الىس-بەرىس ءوسىپ جاتىر. بۇل جاقسى ۇدەرىس. ەلىمىزدە 60 جۋىق بولگار كومپانياسى بار. ولار ءتۇرلى سالادا تابىستى جۇمىس ىستەپ جاتىر. دەگەنمەن، ەلدەرىمىزدىڭ ەكونوميكالىق الەۋەتى بۇدان الدە قايدا جوعارى. سوندىقتان بۇل كورسەتكىشتى ۇلعايتا تۇسۋگە مول مۇمكىندىك بار. ءبىز ءوزارا ساۋدا- ساتتىق كولەمىن ارتتىرا تۇسۋگە كەلىستىك. قوس مەملەكەتتىڭ مۇددەسىنە ساي كەلەتىن جاڭا ينۆەستيتسيالىق جوبالاردى پىسىقتاۋعا ۋاعدالاستىق. اسىرەسە، مۇناي-گاز جاڭارتىلاتىن ەنەرگيا، جاسىل ەنەرگەتيكا، اتوم ونەركاسىبى، سيفرلاندرۋ، يننوۆاتسيا، جاساندى ينتەللەكت، عارىش سالاسى، اۋىل شارۋاشىلىعى، دەنساۋلىق ساقتاۋ، مادەني-گۋمايتارلىق بايلانىستار جانە تۋريزم سياقتى سالالاردا بىرلەسكەن جوبالاردى جۇزەگە اسىرۋ ماڭىزدى ەكەنىن اتاپ وتتىك، - دەدى قاسىم-جومارت توقايەۆ.

سونداي-اق مەملەكەت باسشىسى كولىك- لوگيستيكا سەكتورىنداعى بايلانىستى دامىتۋ ماسەلەسىنە نازار اۋدارىلعانىن ايتتى.

- بۇگىندە ترانسكاسپي حالىقارالىق كولىك ءدالىزى ستراتەگيالىق ساۋدا جولىنىڭ بىرىنە اينالدى. وسى دالىزگە بولگاريانىڭ بۋرگاس جانە ۆارنا تەڭىز پورتتارىن قوسۋ ماسەلەسىن قاراستىرۋعا كەلىستىك. بۇل جۇمىسقا ەكى ەلدىڭ ەكونوميكالىق ىنتىماقتاستىق جونىندەگى ۇكىمەتارالىق كوميسسياسى باسا ءمان بەرۋى قاجەت دەپ سانايمىز. مەن كوميسسيا اياسىندا كولىك-لوگيستيكا سالاسىنداعى ىنتىماقتاستىق جونىندەگى بىرلەسكەن جۇمىس توبىن قۇرۋدى ۇسىندىم. بۇدان بولەك، بولگاريانىڭ عارىشتىق زەرتتەۋلەر مەن تەحنولوگيالار، قورعانىس ونەركاسىبى سالاسىنداعى وزىق تاجىريبەسىن زەردەلەپ، بىرلەسە جۇمىس ىستەۋگە دايىن ەكەنىمىزدى جەتكىزدىم، - دەدى پرەزيدەنت.

بۇعان دەيىن مەملەكەت باسشىسى قاسىم-جومارت توقايەۆ اقوردادا ەلىمىزگە رەسمي ساپارمەن كەلگەن بولگاريا پرەزيدەنتى رۋمەن راديەۆتى قارسى العانىن جازعان ەدىك.