سولتۇستىك قازاقستان وبلىسىنداعى ەلدى مەكەنگە برۋتسەللەزگە بايلانىستى شەكتەۋ ەنگىزىلدى

پەتروپاۆل. KAZINFORM - سولتۇستىك قازاقستان وبلىسى بىرلىك اۋىلىندا قارا مالدان برۋتسەللەز انىقتالدى.

س ق و ۆەتەريناريا باسقارماسىنىڭ مالىمەتىنشە، اۋىلدا 58 قارا مالدان اۋرۋ انىقتالعان. بارلىق جۇقتىرعان مال سويىلدى. قازىر ەلدى مەكەنگە شەكتەۋ شارالارى ەنگىزىلگەن.

- شەكتەۋ شارالارى زەرتحانالىق ناتيجەلەر قاتارىنان ەكى رەت تەرىس كورسەتكەندە عانا جانە اۋرۋ مال تۇرعان قورالار تولىق دەزينفەكسيادان وتكەندە عانا الىنىپ تاستالادى. وعان دەيىن ءىرى قارا مالدى جانە ونىڭ ونىمدەرىن ساتۋعا بولمايدى. تەك اۋرۋ مالدى عانا سويۋعا رۇقسات بەرىلەدى، - دەيدى ۆەتەرينارلار.

مامانداردىڭ ايتۋىنشا، ينفەكسيانىڭ تارالۋىنا ۆەتەرينارلىق تالاپتاردىڭ ورىندالماۋى، ياعني تۇلىكتى ۆەتەرينارلىق قىزمەتتى ەسكەرتپەي، قۇجاتتارىنسىز اكەلۋ سەبەپ بولۋى مۇمكىن.

قازىر وشاق ورنىندا رەسپۋبليكالىق ەپيزووتياعا قارسى وترياد جۇمىس ىستەپ، اۋماقتى زارارسىزداندىرىپ جاتىر.

جالپى بيىل س ق و- نىڭ ءتورت اۋدانىندا برۋتسەللەز وشاعى انىقتالدى. اۋىرعان 68 ءىرى قارا مالدىڭ 58 ءى - ەسىل اۋدانىنا، جەتەۋى - قىزىلجار اۋدانىنا، ەكەۋى - اقجارعا جانە بىرەۋى ايىرتاۋ اۋدانىنا تيەسىلى.

وتكەن جىلدىڭ سايكەس كەزەڭىندە وڭىردە 180 مال اۋرۋ جۇقتىرعان.

بۇعان دەيىن س ق و- دا پريبرەجنوە ەلدى مەكەنىنە كىرەتىن جول جابىلعانىن جازعان ەدىك.

اۆتور

اقەركە داۋرەنبەك قىزى