س ق و-دا كوكجوتەلدەن ەم العان بالالاردىڭ سانى بەس ەسە ارتقان

پەتروپاۆل. KAZINFORM - سولتۇستىك قازاقستان وبلىسىندا كوكجوتەلمەن اۋىرعان بالالار سانى ەسەلەپ ارتقان. دەرتتى جۇقتىرعان بالالاردىڭ ەشقايسى ەكپە الماعان.

س ق و دەنساۋلىق ساقتاۋ باسقارماسى باسپا ءسوز قىزمەتى Kazinform ءتىلشىسىنىڭ ساۋالىنا بەرگەن جاۋابىندا سوڭعى جەتى ايدا وبلىستىق كوپبەيىندى بالالار اۋرۋحاناسىنىڭ ينفەكسيالىق بولىمىندە 51 بالانىڭ ەم الىپ شىققانىن ايتتى. بىلتىر وسى ارالىقتا 10 بالاعا «كوكجوتەل» دياگنوزى قويىلعان.

«نارەستەلەردە، اسىرەسە 6 ايعا دەيىنگى بالادا كوكجوتەل اۋرۋى كەزىندە كوكجوتەل ەنسەفالوپاتياسى داميدى، بۇل - ميدىڭ وزگەرىسكە ۇشىراۋى. سونداي-اق وكپەسىنە زاقىم كەلەدى، ديافراگماسى جارىلىپ، ارتى اۋىر پنيەۆمونياعا اپارادى. بولاشاقتا اۋرۋدان كەيىن سوزىلمالى برونحيت، كونۆۋلسيالىق ۇستامالار، پسيحوسوماتيكا جانە نيەۆروزدار پايدا بولۋى مۇمكىن»، - دەيدى ۆەدومستۆونىڭ باسپا ءسوز حاتشىسى گۇلنار سايلاۋ قىزى.

ماماننىڭ ايتۋىنشا، كوكجوتەلدىڭ الدىن الۋدىڭ نەگىزگى جانە جالعىز جولى - ينفەكسياعا قارسى ۆاكسيناتسيادان ءوتۋ.

س ق و سانيتاريالىق- ەپيدەميولوگيالىق باقىلاۋ دەپارتامەنتىنىڭ مالىمەتىنشە، ناۋقاستاردىڭ نەگىزگى ۇلەسى - ءبىر جاسقا دەيىنگى بالالار.

ۇلتتىق ۆاكسيناتسيا كۇنتىزبەسىنە سايكەس، كوكجوتەلگە قارسى ۆاكسيناتسيا نارەستەگە 2، 3 جانە 4 ايىندا ءۇش رەت جاسالادى. رەۆاكسيناتسيا نەگىزگى يممۋنيتەتتى ساقتاۋ ءۇشىن 18 ايدا قويىلادى. ءارى قاراي، 6 جاسىندا ۆاكسينانىڭ قوسىمشا دوزاسى ەنگىزىلەدى.

بۇعان دەيىن س ق و-دا بيىل 3,8 مىڭ جاس ءوسپىرىم قىزعا ادام پاپيللوماسى ۆيرۋسىنا قارسى ەكپە سالىناتىنىن جازعان ەدىك.