پرەزيدەنتكە سولتۇستىك قازاقستان وبلىسىنىڭ دامۋ قارقىنى تۋرالى ەسەپ بەرىلدى
استانا. KAZINFORM - پرەزيدەنت سولتۇستىك قازاقستان وبلىسىنىڭ اكىمى عاۋەز نۇرمۇحامبەتوۆتى قابىلدادى، دەپ حابارلايدى اقوردانىڭ باسپا ءسوز قىزمەتى.
قاسىم-جومارت توقايەۆقا ايماقتىڭ بيىلعى ءبىرىنشى جارتىجىلدىقتاعى الەۋمەتتىك-ەكونوميكالىق دامۋى جونىندە ەسەپ بەرىلدى.
مەملەكەت باسشىسىنا مايلى جانە جەم-ءشوپ داقىلدارىنىڭ ەگىستىك كولەمى ۇلعايعانى تۋرالى باياندالدى. اكىمنىڭ ايتۋىنشا، تۇقىم جاڭارتۋ دەڭگەيى 11,2 پايىزعا جەتكەن، سۋ ۇنەمدەۋ تەحنولوگيالارى بەلسەندى ەنگىزىلىپ جاتىر. «كەڭ دالا 2» باعدارلاماسى اياسىندا شارۋالارعا 97 ميلليارد تەڭگە بولىنگەن. بيىل مەملەكەتتىك قولداۋ اۋقىمى بىلتىرعىمەن سالىستىرعاندا 24 پايىزعا ارتقان.
پرەزيدەنتكە سولتۇستىك قازاقستان وبلىسى ەلىمىزدە ءسۇت ءوندىرىسى بويىنشا العاشقى ۇشتىككە كىرەتىنى، سونىڭ ىشىندە ءسۇت ءوندىرۋ كەشەندەرىنىڭ سانى جاعىنان كوش باستاپ تۇرعانى ايتىلدى.
عاۋەز نۇرمۇحامبەتوۆ وبلىستا جالپى سوماسى 893 ميلليارد تەڭگەنى قۇرايتىن 52 ينۆەستيتسيالىق جوبا جۇزەگە اسىرىلىپ جاتقانىن جەتكىزدى. ناتيجەسىندە 7,5 مىڭ جاڭا جۇمىس ورنى اشىلماق.
بيىل 332 مىڭ شارشى مەتر تۇرعىن ءۇيدى پايدالانۋعا بەرۋ جوسپارلانعان. قازىرگى تاڭدا 5 كوپقاباتتى ءۇي تاپسىرىلدى. جىل سوڭىنا دەيىن تاعى دا 11 نىساننىڭ قۇرىلىسى اياقتالادى. الەۋمەتتىك وسال توپقا جاتاتىن ازاماتتار ءۇشىن بيىل 258 پاتەر ساتىپ الىنادى.
«كەلەشەك مەكتەپتەرى» ۇلتتىق جوباسى اياسىندا پەتروپاۆل قالاسىندا 600 ورىندىق جاڭا زاماناۋي مەكتەپ سالىندى. سونىمەن قاتار 280 ورىندىق بالاباقشانىڭ قۇرىلىسى جۇرگىزىلۋدە. دەنساۋلىق ساقتاۋ سالاسىندا اۋىلدىق جەردەگى 46 مەديتسينالىق نىسان جاڭعىرتىلدى. وڭىرگە مەديتسينا ماماندارىن تارتۋ ماقساتىندا جۇيەلى جۇمىس اتقارىلىپ جاتىر.
پرەزيدەنت جيىن-تەرىن ناۋقانىنا دايىندىقتىڭ، اگروونەركاسىپ سالاسىنداعى ينۆەستيتسيالىق جوبالاردى ۋاقتىلى جۇزەگە اسىرۋدىڭ ماڭىزىنا نازار اۋداردى. سونداي-اق پەتروپاۆلداعى 2-ج ە س- ءتى جوندەۋ جانە جىلۋمەن، ەنەرگيامەن قامتاماسىز ەتۋ جەلىلەرىن رەكونسترۋكسيالاۋ جۇمىستارىن جىلدام اياقتاۋ قاجەت ەكەنىن ەسكەرتتى.
بۇعان دەيىن پرەزيدەنت «قازاقستان تەمىر جولى» باسقارما ءتوراعاسىن قابىلداعان ەدى.
