پرەزيدەنت «قازاقستان تەمىر جولى» باسقارما ءتوراعاسىن قابىلدادى

استانا. KAZINFORM - مەملەكەت باسشىسى «قازاقستان تەمىر جولى» ۇ ك» ا ق باسقارما ءتوراعاسى تالعات الدىبەرگەنوۆتى قابىلدادى. بۇل تۋرالى اقوردانىڭ باسپا ءسوز قىزمەتى حابارلادى.

پرەزيدەنتكە ۇلتتىق كومپانيا قىزمەتىنىڭ ناتيجەلەرى تۋرالى مالىمەت بەرىلدى.

تالعات الدىبەرگەنوۆ:

يىلعى ءبىرىنشى جارتىجىلدىقتىڭ قورىتىندىسى بويىنشا ەكسپلۋاتاتسيالىق جۇك اينالىمى 8,6 پايىزعا ۇلعايعانىن ايتتى.

ترانزيت تاسىمالىنىڭ كولەمى 14,6 ميلليون تونناعا جەتكەن.

ترانسۇلتتىق تەمىرجول ءدالىزىن قالىپتاستىرۋ ءۇشىن 1700 شاقىرىمنان استام جاڭا جەلى سالىنىپ، 3 مىڭ شاقىرىم جول جاڭعىرتىلىپ جاتقانى تۋرالى باياندادى:

بيىل دوستىق- مويىنتى ۋچاسكەسىندەگى جولدىڭ ەكىنشى بولىگى جانە الماتى بەكەتىن اينالىپ وتەتىن تەمىر جول جەلىسىنىڭ قۇرىلىسى اياقتالادى؛

داربازا - ماقتاارال جوباسىن ىسكە اسىرۋ جالعاسۋدا؛

باقتى - اياگوز جانە قىزىلجار - مويىنتى جەلىلەرىنىڭ قۇرىلىسى باستالدى.

تەرمينال جەلىلەرىن كەڭەيتۋ جۇمىستارى جۇرگىزىلىپ جاتقانى جونىندە مالىمەت بەردى.

تسيفرلاندىرۋ ماسەلەسىنە ايرىقشا نازار اۋدارىلاتىنىن جەتكىزدى:

الەمدىك دەڭگەيدەگى يننوۆاتسيانىڭ كوشباسشىلارىمەن بىرلەسىپ، تەمىرجول كولىگىنىڭ ساپاسىن جاقسارتۋ جانە قاۋىپسىزدىگىن قامتاماسىز ەتۋ جۇمىستارى قولعا الىنعان؛

ترانسكاسپي حالىقارالىق كولىك دالىزىندەگى ترانزيتتىك دەكلاراتسيانى رەسىمدەۋ ۋاقىتى 8 ساعاتتان 30 مينۋتقا دەيىن قىسقاردى.

مەملەكەت باسشىسى قازاقستاننىڭ ترانزيت الەۋەتىن جانە ەكونوميكاسىن دامىتۋدا كومپانيا ۇلكەن ءرول اتقاراتىنىن اتاپ ءوتىپ، كولىك ينفراقۇرىلىمىن ودان ءارى جاڭعىرتۋدىڭ ماڭىزىنا توقتالدى.