پرەزيدەنت PepsiCo قورى ديرەكتورلار كەڭەسىنىڭ ءتوراعاسى ستيۆەن كيحونى قابىلدادى
استانا. KAZINFORM - كەزدەسۋدە PepsiCo كومپانياسىنىڭ قازاقستانداعى ينۆەستيتسيالىق جوباسىن جۇزەگە اسىرۋ بارىسى قاراستىرىلدى. بۇل تۋرالى اقوردا ءمالىم ەتتى.
الەمگە ايگىلى برەند الماتى وبلىسىندا سنەكتەر شىعاراتىن زاۋىت قۇرىلىسىنا كىرىستى. ينۆەستيتسيا كولەمى - 368 ميلليون دوللار.
- پرەزيدەنت جوبانى ىسكە اسىرۋدان كۇتىلەتىن ەكونوميكالىق پايداعا نازار اۋداردى. كومپانيا 900-گە تارتا تۇراقتى جۇمىس ورنىن اشۋدان بولەك، قىتىرلاققا ارنالعان كارتوپتى جەرگىلىكتى جەردە وسىرۋگە نيەتتى، - دەلىنگەن حابارلامادا.
ستيۆەن كيحونىڭ ايتۋىنشا، بۇگىنگى تاڭدا باعدارلاماعا پاۆلودار، اقمولا، قاراعاندى، الماتى جانە جەتىسۋ وبلىستارىنان 15-كە جۋىق شارۋاشىلىق قوسىلعان. بۇدان بولەك، شيكىزاتتى ساقتاۋ بازاسىن كەڭەيتىپ، كارتوپ ونىمدىلىگى مەن ساپاسىن ارتتىرۋ ءۇشىن عىلىمي تاسىلگە جۇگىنۋ جوسپارلانىپ وتىر.
قاسىم-جومارت توقايەۆ PepsiCo كومپانياسىنىڭ ورنىقتى اگروشارۋاشىلىقتى دامىتۋ باستاماسىنا قولداۋ ءبىلدىرىپ، ۇكىمەت پەن جەرگىلىكتى اكىمدىك ءوندىرىستىڭ ۋاقتىلى ىسكە قوسىلۋىنا بارىنشا جاعداي جاسايتىنىن ايتتى.
بۇعان دەيىن حابارلانعانداي، پرەزيدەنت ا ق ش- تا قازاق مادەنيەتىن دارىپتەپ جۇرگەن سميتسون ينستيتۋتىنا العىس ايتقان ەدى.
