پرەزيدەنت دۇنيەجۇزىلىك يسلام ليگاسىنىڭ باس حاتشىسىن قابىلدادى
استانا. KAZINFORM - مەملەكەت باسشىسى الەمدىك جانە ءداستۇرلى دىندەر كوشباسشىلارىنىڭ VIII سيەزىنە قاتىسۋ ءۇشىن استاناعا ارنايى كەلگەن دۇنيەجۇزىلىك يسلام ليگاسىنىڭ باس حاتشىسى شەيح مۇحاممەد بەن ابدۋلكاريم ءال-يسامەن كەزدەستى.
پرەزيدەنت ەلىمىزدىڭ دىندەر اراسىنداعى ديالوگتى دامىتۋ باستاماسىنا ۇدايى قولداۋ كورسەتىپ، بەيبىتشىلىك پەن كەلىسىم يدەيالارىن ناسيحاتتاۋعا ەلەۋلى ۇلەس قوسىپ كەلە جاتقان ۇيىم باسشىسىنا ريزاشىلىعىن ءبىلدىردى.
قاسىم-جومارت توقايەۆتىڭ پىكىرىنشە، قازاقستان ىشكى جانە سىرتقى ساياساتتا ءدىنارالىق، سونداي-اق مادەنيەتارالىق كەلىسىمدى ساقتاۋعا ەرەكشە ءمان بەرەدى.
پرەزيدەنت 22 جىلدان بەرى تۇراقتى تۇردە ۇيىمداستىرىلاتىن الەمدىك جانە ءداستۇرلى دىندەر كوشباسشىلارىنىڭ سيەزى وسىنىڭ ايقىن كورىنىسى ەكەنىن اتاپ ءوتتى. سونىمەن قاتار ورتاق كۇش-جىگەردىڭ ارقاسىندا قازاقستاننىڭ باستاماسى جاھاندىق قاۋىپسىزدىك پەن تۇراقتىلىقتى نىعايتۋعا زور ىقپال ەتەتىنىن ايتتى.
بۇدان بولەك، مەملەكەت باسشىسى قازاقستان مەن ساۋد ارابياسى كورولدىگى اراسىنداعى ىنتىماقتاستىق ودان ءارى نىعايا تۇسەتىنىنە سەنىم ءبىلدىردى.
دۇنيەجۇزىلىك يسلام ليگاسىنىڭ باس حاتشىسى استاناداعى ءداستۇرلى سەزدى ادامگەرشىلىك قۇندىلىقتارىن دارىپتەيتىن ەرەكشە پىكىر الماسۋ الاڭى رەتىندە جوعارى باعالاپ، ەلىمىزدىڭ ءوسىپ-وركەندەي بەرۋىنە تىلەكتەس ەكەنىن جەتكىزدى.
مەملەكەت باسشىسى الەمدەگى كونفەسسيا ارالىق كەلىسىمدى نىعايتۋعا جانە يسلام وركەنيەتىن كەڭىنەن تانىتۋعا قوسقان ەلەۋلى ۇلەسى ءۇشىن مۇحاممەد بەن ابدۋلكاريم ءال-يسانى I دارەجەلى «دوستىق» وردەنىمەن ماراپاتتادى.
ايتا كەتەيىك، بۇعان دەيىن مەملەكەت باسشىسى قاۋىپسىزدىك كەڭەسىنىڭ كيبەرقاۋىپسىزدىك جونىندەگى وتىرىسىن وتكىزدى.
