قازاقستان سلوۆاكياعا مۇناي-گاز، ۋران جانە باسقا دا تاۋارلارىن ەكسپورتتاۋعا دايىن - پرەزيدەنت
استانا. KAZINFORM - قازاقستان سلوۆاكيامەن قارىم- قاتىناستى ودان ارى نىعايتۋعا باسا ءمان بەرەدى. بۇل تۋرالى سلوۆاكيا پرەمەر- ءمينيسترى روبەرت فيتسومەن كەلىسسوزدەردەن كەيىنگى ب ا ق وكىلدەرىنە ارنالعان بريفينگتە مەملەكەت باسشىسى قاسىم-جومارت توقايەۆ ايتتى.
- بۇگىن پرەمەر-مينيستر روبەرت فيتسو مىرزا ەكەۋىمىز مازمۇنى كەلىسسوزدەر جۇرگىزدىك. قازاق-سلوۆاك ىنتىماقتاستىعىنىڭ اياسىن كەڭەيتۋ ماسەلەسىن تالقىلادىق. ناقتى ۋاعدالاستىقتارعا قول جەتكىزدىك. ەكى ەل اراسىندا ەشقانداي تۇسىنىسپەۋشىلىك جوق. كەڭ اۋقىمدى ىنتىماقتاستىققا جول اشىق. سەبەبى قازاقستان مەن سلوۆاكيانىڭ سان قىرلى بايلانىسىن كۇشەيتۋ قوس حالىقتىڭ مۇددەسىنە ساي كەلەدى. سلوۆاكيا ەكونوميكا تۇرعىسىنان الىپ قاراساق، قارقىندى دامىپ كەلە جاتقان ەل. سوندىقتان قازاقستان سلوۆاكيامەن قارىم- قاتىناستى ودان ارى نىعايتۋعا باسا ءمان بەرمەك، - دەدى قاسىم-جومارت توقايەۆ.
مەملەكەت باسشىسى كەلىسسوزدەر بارىسىندا ساۋدا-ساتتىق كولەمىن ودان ارى ارتتىرۋ ماسەلەسى قوزعالعانىن، ينۆەستيتسيالىق ىقپالداستىقتى تەرەڭدەتۋگە نازار اۋدارىلعانىن ايتتى.
- بۇل تۇرعىدان العاندا ۇكىمەتارالىق كوميسسيا ماڭىزدى ءرول اتقارىپ كەلەدى. مەن كوميسسيانىڭ تەڭ ءتوراعالارىنىڭ دەڭگەيىن مينيستر دەڭگەيىنە كوتەرۋدى ۇسىندىم. قازاقستان سلوۆاكياعا مۇناي- گاز، ۋران، ازىق- تۇلىك ونىمدەرىن جانە باسقا دا تاۋارلارىن ەكسپورتتاۋعا دايىن. سونداي- اق ەنەرگەتيكا، ماشينا جاساۋ، اۋىل شارۋاشىلىعى، تسيفرلاندىرۋ، تۋريزم سالاسىندا بىرلەسكەن جوبالاردى جۇزەگە اسىرۋعا مۇمكىندىك بار. اسكەري- تەحنيكالىق بايلانىستىڭ الەۋەتى زور، - دەدى پرەزيدەنت.
بۇعان دەيىن مەملەكەت باسشىسى قاسىم-جومارت توقايەۆ سلوۆاكيا پرەمەر- ءمينيسترى روبەرت فيتسومەن شاعىن قۇرامدا كەلىسسوز جۇرگىزگەنىن جازعان ەدىك.
ال كەڭەيتىلگەن قۇرامداعى كەلىسسوز بارىسىندا مەملەكەت باسشىسى سلوۆاكيا قازاقستاننىڭ ەۋروپالىق وداقتاعى ماڭىزدى ءارى سەنىمدى سەرىكتەسى ەكەنىن ايتتى.
