مەملەكەت باسشىسى YDA Holding باسقارما ءتوراعاسى حۋسەين ارسلاندى قابىلدادى
استانا. KAZINFORM - قاسىم-جومارت توقايەۆقا YDA Holding كومپانياسىنىڭ قازاقستاندا ىسكە اسىرىلىپ جاتقان ينۆەستيتسيالىق جوبالارى جونىندە مالىمەت بەرىلدى، دەپ حابارلايدى اقوردانىڭ باسپا ءسوز قىزمەتى.
اتاپ ايتقاندا، تۇركيالىق حولدينگ تۇركىستان، استانا جانە پەتروپاۆل قالالارىندا كوپبەيىندى اۋرۋحانالار سالۋ جانە پايدالانۋ بويىنشا ءۇش جوبانى قولعا العان.
كومپانيا الداعى ۋاقىتتا استاناداعى YDA Industrial Park كوپسالالى ءوندىرىس كەشەنىن كەڭەيتىپ، سەندۆيچ- پانەلدەر شىعاراتىن زاۋىت سالۋدى باستايدى.
سونىمەن قاتار حۋسەين ارسلان كومپانيانىڭ اقتاۋدا مۋلتيمودالدى ترانزيت حابىن قۇرۋعا قاتىستى جوسپارىمەن ءبولىستى.
مەملەكەت باسشىسى حولدينگتىڭ قازاقستانعا ستراتەگيالىق تۇرعىدان قىزىعۋشىلىعىن جانە ەلىمىزدە جۇزەگە اسىرىپ جاتقان ينۆەستيتسيالىق باستامالارىن جوعارى باعالادى.
ايتا كەتەيىك، كەشە قازاقستان پرەزيدەنتى تۇركياعا رەسمي ساپارمەن باردى. اۋەجايدا ەكى ەل پرەزيدەنتتەرى از-كەم اڭگىمەلەستى.
قازاقستان پرەزيدەنتىنىڭ كەلۋىنە وراي انكارا كوشەلەرى ارنايى باننەرمەن بەزەندىرىلدى.
بۇگىن توقايەۆ مۇستافا كەمال اتاتۇرىك كەسەنەسىنە زيارات ەتتى.
