18:09, 28 - شىلدە 2025 | GMT +5
مەملەكەت باسشىسى وپەرا ءانشىسى ايگەرىم التىنبەكتى قۇتتىقتادى
استانا. KAZINFORM - قاسىم-جومارت توقايەۆ يتاليادا وتكەن Ⅺ حالىقارالىق CLIP 2025 وپەرا بايقاۋىندا توپ جارىپ، جەڭىمپاز اتانعان ايگەرىم التىنبەككە قۇتتىقتاۋ جەدەلحاتىن جولدادى، دەپ حابارلايدى اقوردانىڭ باسپا ءسوز قىزمەتى.
- ەلىمىزدىڭ مادەنيەتىن تورتكۇل الەمگە تانىتىپ، حالىقارالىق ساراپشىلاردى مويىنداتقان بۇل جەتىستىگىڭىزدىڭ ءمان-ماڭىزى زور. ءسىز مەملەكەتىمىزدىڭ مەرەيىن ۇستەم ەتىپ، ءتول ونەرىمىزدى الەمنىڭ تورىنە شىعاردىڭىز. الداعى ۋاقىتتا دا بيىك بەلەستەردى باعىندىرا بەرەسىز دەپ سەنەمىن! — دەپ جازدى پرەزيدەنت.
بۇعان دەيىن قازاقستاندىق وپەرا ءانشىسى ايگەرىم التىنبەك XI حالىقارالىق CLIP 2025 وپەرا بايقاۋىندا جەڭىسكە جەتكەنى حابارلاندى. ونەرپاز ءبىرىنشى ورىننان بولەك، بايقاۋدىڭ نەگىزگى نوميناتسيالارىندا ۇزدىك اتانىپ، ابسوليۋتتى جەڭىمپاز بولدى.
