مەملەكەت باسشىسى مەديتسينا قىزمەتكەرلەرىن ماراپاتتادى
استانا. KAZINFORM - پرەزيدەنت جينالعان قاۋىمدى مەديتسينا قىزمەتكەرى كۇنىمەن قۇتتىقتاپ، وسى مەرەكەگە وراي دارىگەرلەرمەن اقوردادا العاش رەت كەزدەسىپ وتىرعانىن ءارى بۇل جيىننىڭ ءمان-ماعىناسى ەرەكشە ەكەنىن اتاپ ءوتتى. بۇل تۋرالى اقوردانىڭ باسپا ءسوز قىزمەتى حابارلادى.
- حالقىمىز «ءبىرىنشى بايلىق -دەنساۋلىق» دەپ بەكەر ايتپاعان. شىن مانىندە، ۇلت ساۋلىعى - ەلىمىز ءۇشىن اسا ماڭىزدى قۇندىلىق. الەمنىڭ «ەكىنشى ۇستازى» - ءال-فارابي مەديتسينانى ونەر دەپ باعالاعان. راسىندا، دارىگەر بولۋ - جۇرەكتىڭ ءىسى. بۇل - ەكىنىڭ ءبىرى اياق باسا بەرمەيتىن جۇگى اۋىر، كۇردەلى جۇمىس. مەديتسينا قىزمەتكەرلەرى - ۇلت ساۋلىعىنىڭ ساقشىلارى، ەڭ قادىرلى ماماندىق يەلەرى. اسىرەسە، جاھاندىق ىندەت، ياعني، كوۆيد كەزىندە بۇكىل ەل دارىگەرلەردىڭ ادال قىزمەتىنە كۋا بولدى. كۇردەلى كەزەڭدە مەديتسينا ماماندارى مىڭداعان ادامدى قۇتقارىپ قالدى. ءبىز ابزال جانداردىڭ تاباندى ەڭبەگىن باعالايمىز. ولاردىڭ قايسارلىعىن ماقتان تۇتامىز. «ءبىر ادامنىڭ ءومىرىن قۇتقارۋ بارشا ادامزاتتى قۇتقارۋمەن بىردەي». دارىگەرلەر وتا كەزىندە، اۋرۋحانا پالاتاسىندا كۇن سايىن ەرلىك جاسايدى دەسەك، ارتىق بولمايدى. جەدەل جاردەم كولىگىندە ادام ومىرىنە اراشا تۇسەتىن ساتتەر بولادى. سوندىقتان سىزدەر، قۇرمەتتى مەديتسينا قىزمەتكەرلەرى، بەيبىت كۇننىڭ باتىرلارى دەگەن اتقا لايىقسىزدار. مەن بارشا مەديتسينا ماماندارىنا زور ريزاشىلىعىمدى بىلدىرەمىن، - دەدى مەملەكەت باسشىسى.
قاسىم-جومارت توقايەۆ قازاق دارىگەرلەرى قاي كەزدە بولسىن، ەل مۇددەسىن بارىنەن بيىك قويا بىلگەنىن، ۇلت قايراتكەرلەرى حالەل دوسمۇحامەدوۆ پەن سانجار اسفەندياروۆتىڭ بەلگىلى دارىگەر بولعانىن، ولار حالقىمىزدىڭ ازاتتىعى ءۇشىن دە، ساۋلىعى ءۇشىن دە ايانباي كۇرەسكەنىن اتاپ ءوتتى.
- بۇگىندە ەلىمىزدىڭ دەنساۋلىق ساقتاۋ سالاسىندا 380 مىڭعا جۋىق ادام جۇمىس ىستەيدى. ءار ماماننىڭ ەڭبەگى وراسان زور. ۇلت ساۋلىعىن ساقتاۋعا بۇكىل ءومىرىن ارناعان تۇتاس اۋلەتتەر بار. الماتىداعى دجۋۆاشيەۆتەر اۋلەتىنەن 13 ادام مەديتسينا سالاسىن تاڭداعان. ولاردىڭ جالپى ەڭبەك ءوتىلى - 375 جىل. ال اتىراۋ وبلىسىنداعى شانايەۆتار اۋلەتىنەن 16 دارىگەر شىققان. مۇنداي ەڭبەك ديناستيالارىنىڭ عيبراتتى جولى - كوپكە ۇلگى- ونەگە. قازىر ۇلتتىق مەديتسينا سالاسى قارقىندى دامىپ كەلە جاتىر. جەتىستىكتەرىمىز از ەمەس. ەلىمىزدە ورتاشا ءومىر ءسۇرۋ ۇزاقتىعى 75,4 جاسقا جەتتى. انا مەن بالا ءولىمى شامامەن 12 پايىزعا ازايدى. بەس جىلدا 800-گە جۋىق دەنساۋلىق ساقتاۋ نىسانى، ياعني، كوپتەگەن ەمحانا مەن اۋرۋحانا سالىندى. بۇل جۇمىس توقتامايدى، مەملەكەت الداعى ۋاقىتتا دا ينفراقۇرىلىمدى دامىتا بەرەدى. ۇلت ساۋلىعىن جاقسارتۋ العاشقى مەديتسينالىق كومەكتەن باستالادى. ەلىمىزدە اۋىلدىق جەردەگى مەديتسينا جۇيەسىن جاڭعىرتۋعا ارنالعان ۇلتتىق جوبا جۇزەگە اسىرىلىپ جاتىر. بۇگىندە 469 عيمارات بوي كوتەردى. جىل سوڭىنا دەيىن تاعى 186 نىسان سالىنادى. اۋداندىق اۋرۋحانالار زامانعا ساي قۇرالدارمەن جابدىقتالىپ جاتىر، - دەدى پرەزيدەنت.
جىل سايىن 45 مەملەكەتتەن شامامەن 10 مىڭ ادام قازاقستانعا ەمدەلۋ ءۇشىن ارنايى كەلەدى. بۇل ەلىمىزدەگى دارىگەرلىك كومەكتىڭ ساپاسى جوعارى ەكەنىن كورسەتەدى.
- بۇگىندە كوپتەگەن اۋرۋحانالارىمىز حالىقارالىق اككرەديتتەۋدەن وتكەن. نەيروحيرۋرگيا مەن كارديوحيرۋرگيا ۇلتتىق ورتالىقتارى الەمدىك كلينيكالار دەڭگەيىندە جوعارى تەحنولوگيالى مەديتسينالىق قىزمەت كورسەتەدى. قازاقستاندىق دارىگەرلەر جۇرەككە جىل سايىن مىڭداعان اشىق وپەراتسيا جاسايدى. ەمدەلۋشىلەردىڭ قاتارىندا ءتىپتى، جاڭا تۋعان نارەستەلەر دە بار. ەلىمىزدە ورگانداردى ترانسپلانتاتسيالاۋ ءىسى جوسپارلى تۇردە دامىپ كەلەدى. جۋىردا جۇرەك اۋىستىرۋعا ارنالعان ءجۇزىنشى وتا ءساتتى ءوتتى. بيىل العاش رەت ءبىر مەزەتتە ءۇش ادامعا ءۇش دونوردىڭ بۇيرەگىن توعىسپالى ترانسپلانتاتسيا تاسىلىمەن سالدى. وزدەرىنە سايكەس كەلەتىن ورگانداردى الۋ ءۇشىن پاتسيەنتتەر ءبىر-بىرىنە دونور بولدى. مۇنداي كۇردەلى وپەراتسيالار دۇنيە جۇزىندە التى ەلدە عانا جاسالادى. ونكولوگيالىق اۋرۋلاردى ەمدەۋگە ساۋلە تەراپياسىنىڭ وزىق ادىستەرى قولدانىلىپ جاتىر. بىلتىردان بەرى ەلىمىزدە مۇلدە جاڭا باعىت - فەتالدى مەديتسينا دامي باستادى. ياعني، بۇل - انا قۇرساعىنداعى شاراناعا وپەراتسيا جاساۋ دەگەن ءسوز. مۇنداي بىرەگەي مەديتسينالىق كومەك كوپتەگەن بالانىڭ دۇنيەگە دەنى ساۋ بولىپ كەلۋىنە مۇمكىندىك سىيلايدى. سيرەك كەزدەسەتىن سىرقاتى بار ادامداردى ەمدەۋ مەن دەنساۋلىعىن جاقسارتۋعا ەرەكشە ءمان بەرىلۋدە. مەملەكەتتىڭ الدىندا مۇنداي ناۋقاستاردى شەتەلدىك قىمبات ءدارى-دارمەكپەن قامتاماسىز ەتۋ سەكىلدى كۇردەلى مىندەت تۇر. وسى ورايدا مەنىڭ ۇسىنىسىم بويىنشا قۇرىلعان «قازاقستان حالقىنا» قورى ۇلكەن قولداۋ كورسەتىپ وتىر، - دەدى قاسىم- جومارت توقايەۆ.
مەملەكەت باسشىسى ەلىمىزدىڭ فارماتسيەۆتيكالىق ونەركاسىپتى دامىتۋعا ايرىقشا نازار اۋداراتىنىن ايتتى.
- ءىرى حالىقارالىق ينۆەستورلاردى تارتا وتىرىپ، ستراتەگيالىق سيپات العان بۇل سالانى دامىتۋعا كۇش سالۋ ماڭىزدى. الداعى ۋاقىتتا مەديتسينا عىلىمىنىڭ الەۋەتىن تولىقتاي يگەرۋ كەرەك. ول ءۇشىن قازىردىڭ وزىندە بەرىك نەگىز بار. عالىمدارىمىز ونكولوگيا، ترانسپلانتولوگيا، نەوناتولوگيا، گەنەتيكا، بيومەديتسينا سالالارىندا تىڭ جاڭالىقتار اشتى. قان اۋرۋلارىن ەمدەۋگە وتاندىق پرەپاراتتار قولدانىلىپ جاتىر. جاساندى ينتەللەكت سىرقاتتاردى انىقتاۋ مەن ەمدەۋدىڭ كوكجيەگىن كەڭەيتەدى. اتالعان پەرسپەكتيۆتى سالادا ايتارلىقتاي سەرپىلىس جاساۋ قاجەت. يادرولىق مەديتسينانىڭ مۇمكىندىگىن دە بارىنشا پايدالانعان ءجون. دەنساۋلىق ساقتاۋ جۇيەسىن دامىتۋ، ەڭ الدىمەن، ازاماتتاردىڭ ءال-اۋقاتىن كوتەرۋگە باعىتتالعان. ويتكەنى مەديتسينانىڭ دەڭگەيى مەن قولجەتىمدىلىگى - ەلدەگى ءومىر ساپاسىنىڭ نەگىزگى كورسەتكىشى، - دەدى پرەزيدەنت.
