مەملەكەت باسشىسى مادەنيەت ورتالىعىن ارالاپ كوردى
استانا. KAZINFORM - مەملەكەت باسشىسى ق ح ر مادەنيەت جانە تۋريزم ءمينيسترى سۋن ەليمەن بىرگە مادەنيەت ورتالىعىن ارالاپ كوردى. بۇل تۋرالى اقوردا ءمالىم ەتتى.
- قاسىم-جومارت توقايەۆقا كىتاپحانا، قازاق ءتىلى، مۋزىكا جانە شىعارماشىلىق كابينەتتەرى تانىستىرىلدى. كورمە زالىنا قازاقستاننىڭ ەجەلگى ساق داۋىرىنەن باستاپ XX عاسىردىڭ باس كەزىنە دەيىنگى تاريحىنان سىر شەرتەتىن ەكسپوناتتار مەن ارتەفاكتىلەر قويىلعان، - دەلىنگەن حابارلامادا.
ەكسپوزيتسيا ارحەولوگياعا، زەرگەرلىك بۇيىمدارعا، قارۋ-جاراق جاساۋ ونەرىنە، ۇلت اسپاپتارىنا جانە ەتنوگرافياعا ارنالعان بەس بولىمنەن تۇرادى. ورتالىقتىڭ كىتاپحانا قورىندا قازاق، قىتاي، اعىلشىن جانە ورىس تىلدەرىندەگى مىڭعا جۋىق كىتاپ بار.
پرەزيدەنت مادەنيەت ورتالىعىندا قازاق ءتىلىن ۇيرەنىپ جۇرگەن بالالارمەن سويلەستى.
قىتاي وقۋشىلارى دومبىرامەن بەلگىلى قازاق، قىتاي اۋەندەرىنەن پوپۋرري ورىندادى.
سونىمەن قاتار مارتەبەلى مەيماندار بەيجىڭ بالالارىنا ارنالعان كيىز باسۋدان شەبەرلىك ساباعىن تاماشالادى.
ەسكە سالا كەتەيىك، بۇعان دەيىن مەملەكەت باسشىسى قىتاي استاناسىنا باردى.
قاسىم-جومارت توقايەۆتىڭ ايتۋىنشا، ساپار بارىسىندا قىتاي تاراپى قازاق دەلەگاتسياسىنا ەرەكشە كوڭىل ءبولىپ، ىستىق ىقىلاسى مەن قوناقجايلىعىن كورسەتتى. مەملەكەت باسشىسى « ۇلى دالا مەن ۇلى قىتاي اراسىنداعى رۋحاني- مادەني بايلانىس ەشقاشان ۇزىلگەن ەمەس» دەگەن بولاتىن.
