ۇلى دالا مەن ۇلى قىتاي اراسىنداعى رۋحاني-مادەني بايلانىس ەشقاشان ۇزىلگەن ەمەس - پرەزيدەنت

استانا. KAZINFORM - قاسىم-جومارت توقايەۆتىڭ ايتۋىنشا، ساپار بارىسىندا قىتاي تاراپى قازاق دەلەگاتسياسىنا ەرەكشە كوڭىل ءبولىپ، ىستىق ىقىلاسى مەن قوناقجايلىعىن كورسەتتى. بۇل تۋرالى اقوردانىڭ باسپا ءسوز قىزمەتى حابارلادى.

- رەسمي ساپارىم ويداعىداي، تابىستى ءوتتى دەپ سانايمىن. ءبىز ءتوراعا شي جينپيڭ مىرزامەن مازمۇندى جانە وتە ءتيىمدى كەلىسسوزدەر جۇرگىزدىك. ءبىز قوس ەلدىڭ ءار سالاداعى ىنتىماقتاستىعى بويىنشا ورتاق كەلىسىمگە كەلدىك. قازاقستان مەن قىتاي اراسىنداعى قارىم- قاتىناستىڭ بولاشاعى جارقىن بولاتىنىنا زور سەنىم بىلدىردىك، - دەدى پرەزيدەنت.

مەملەكەت باسشىسى قازىرگى تاڭدا قازاقستان ەكونوميكاسى جاقسى قارقىنمەن ءوسىپ كەلە جاتقانىن ايتتى.

 -ءبىز ءىرى ەكونوميكالىق جوبالاردى جۇزەگە اسىرىپ جاتىرمىز. بيىل جالپى ىشكى ءونىمدى 300 ميلليارد دوللارعا جەتكىزۋدى كوزدەپ وتىرمىز. كولىك-لوگيستيكا، اۋىل شارۋاشىلىعى، ەنەرگەتيكا، وڭدەۋ ونەركاسىبى، جاساندى ينتەللەكت سالالارىنا باسىمدىق بەرەمىز. وسى اۋقىمدى مىندەتتەردى ورىنداۋ ءۇشىن ءبىز قىتاي ەلىمەن ىقپالداستىقتى دامىتۋعا مۇددەلىمىز. ۇلى دالا مەن ۇلى قىتاي اراسىنداعى رۋحاني- مادەني بايلانىس ەشقاشان ۇزىلگەن ەمەس. ونى جالعاستىرا بەرۋ - اسا ماڭىزدى مىندەت. ۇلتتىق مادەنيەت ورتالىعى بۇل ىستە ايرىقشا ءرول اتقارادى دەپ ويلايمىن. مۇندا حالقىمىزدىڭ باي مۇراسى مەن سالت-ءداستۇرى ناسيحاتتالادى. سونداي-اق وسى جەردە ەكى ەلدىڭ جاستارى وزىق ءبىلىم يگەرۋ، جاسامپاز يدەيالارىمەن الماسۋ ءۇشىن كەزدەسىپ تۇرادى، - دەدى پرەزيدەنت.

مەملەكەت باسشىسىنىڭ پىكىرىنشە، رۋحانيات - ءار حالىقتىڭ دۇنيەتانىمى، بولمىسى، ىشكى الەمىنىڭ كورىنىسى. سوندىقتان ءتول مادەنيەتىمىزدى دارىپتەيتىن بۇل رۋحاني وردا قازاق پەن قىتايدىڭ ءوزارا قۇرمەتى مەن تاتۋلىعىن ارتتىرا تۇسەرى ءسوزسىز.

- قىتايدا ەجەلدەن ايتىلاتىن ناقىل ءسوز بار: «جالعىز اشقان گۇل كوكتەم بولمايدى، كوكتەم بارلىق گۇلدەر قۇلپىرعاندا كەلەدى». ءار الۋان مادەنيەت، يدەيا جانە وركەنيەت تەك ءوزارا الماسۋ مەن ۇيلەسىمدى ءومىر ءسۇرۋ ارقىلى ادامزات قوعامىن وركەندەتەدى جانە دامىتادى. بۇگىن بەيجىڭدە قازاق مادەني ورتالىعىنىڭ اشىلۋى - وسى ۇعىمداردىڭ جارقىن كورىنىسى، - دەدى پرەزيدەنت.

ايتا كەتەلىك مەملەكەت باسشىسى قىتايداعى قازاقستان مادەنيەت ورتالىعىنىڭ اشىلۋ راسىمىنە قاتىستى.

اۆتور

نازىم بولەسوۆا