كينوپروكات نارىعىن قاداعالاۋ ءۇشىن زاڭنامانى كۇشەيتۋ جۇمىسى باستالدى
استانا. KAZINFORM - مادەنيەت جانە اقپارات مينيسترلىگى كينوپروكات نارىعىن قاداعالاۋ ءۇشىن زاڭنامانى كۇشەيتۋ جۇمىسىن باستادى.
- مەملەكەت باسشىسىنىڭ 2025 -جىلعى 14-ناۋرىزدا بۋرابايدا وتكەن ۇلتتىق قۇرىلتايدا بەرگەن تاپسىرماسىن ورىنداۋ ماقساتىندا مينيسترلىك ەلىمىزدەگى كينوپروكات نارىعىن قاداعالاۋ ءۇشىن زاڭنامانى كۇشەيتۋ بويىنشا ءتيىستى جۇمىستاردى باستادى. اتاپ ايتقاندا، پارلامەنت دەپۋتاتتارىنىڭ باستاماسىمەن «كينەماتوگرافيا تۋرالى» قازاقستان رەسپۋبليكاسىنىڭ زاڭىنا وزگەرىستەر ەنگىزۋ جوسپارلانعان. ونىڭ ىشىندە فيلمگە پروكاتتاۋ كۋالىگىن بەرمەس بۇرىن ءفيلمدى الدىن-الا كورۋ، سونداي-اق فيلمدى الدىن الا كورۋدى جۇزەگە اسىراتىن ءتيىستى ساراپتاما كوميسسياسىن قۇرۋ ماسەلەسى قولعا الىندى، - دەپ اتاپ وتەدى مينيسترىلىكتەن اگەنتتىك ساۋالىنا وراي.
مينيسترلىك زاڭعا وزگەرىستەر ەنگىزىلىپ، اتالعان نورمالار ءوز كۇشىنە ەنگەن سوڭ فيلمدەر قاتاڭ سۇزگىدەن وتكىزىلىپ، كينوپروكاتقا بارىنشا ساپالى كونتەنت شىعاتىنىنا سەنىم بىلدىرەدى.
ايتا كەتەيىك، وسى جىلدىڭ ناۋرىزىندا بۋرابايدا وتكەن ۇلتتىق قۇرىلتايدىڭ 4-وتىرىسىندا مەملەكەت باسشىسى قاسىم-جومارت توقايەۆ كينوتەاتردا كورسەتىلەتىن فيلمدەرگە قاتىستى قوعامدىق سىن بار ەكەنىن ايتقان بولاتىن.
- بىلتىر قازاقستاندىق ماماندار تۇسىرگەن 94 فيلم شىققان، ياعني نەگىزىنەن ءوزىمىزدىڭ ءونىم شىعارىلىپ جاتىر. بۇل - جاقسى ءۇردىس. ءبىراق ءبىز، ەڭ الدىمەن سانعا ەمەس، ساپاعا كوڭىل اۋدارۋىمىز كەرەك. كورەرمەننىڭ كوڭىلىن كوتەرىپ، كۇلكى سىيلاۋ - ءبىر بولەك، جاعىمسىز ادەتتەردى ناسيحاتتاۋ - ءبىر باسقا. زورلىق-زومبىلىقتى، قاتىگەزدىك پەن قىلمىستى ناسيحاتتايتىن فيلمدەر دە پايدا بولدى. وسى جەردە ءبىر نارسەنى ەسكەرگەن ءجون. بۇگىندە فيلمدەردىڭ باسىم كوپشىلىگى مەملەكەتتىك تاپسىرىسپەن ەمەس، جەكە قارجىعا تۇسىرىلۋدە. كينو ماڭىزدى يدەولوگيالىق قۇرال ەكەنىن ءبارىمىز جاقسى تۇسىنەمىز. سوندىقتان جەكە قارجىعا تۇسىرىلسە دە، فيلمدى كينوتەاترلارعا شىعارماس بۇرىن الدىن الا ساراپتاۋدان وتكىزۋ جولدارىن قاراستىرعان ءجون، - دەگەن ەدى پرەزيدەنت.
اۆتور
مارلان جيەمباي
