ۇكىمەت ەكونوميكانىڭ ۇدەمەلى ءوسۋىن قامتاماسىز ەتىپ، ءتيىمدى جۇمىس اتقارۋى كەرەك - پرەزيدەنت

استانا. KAZINFORM - پرەزيدەنت قاسىم-جومارت توقايەۆ قازاقستاندىقتاردى جاڭا جىل مەرەكەسىمەن قۇتتىقتاي وتىرىپ، جۇيەلى رەفورمالار ودان ءارى جالعاساتىنىن ايتتى.

- جوسپارىمىزدىڭ ءبارى ويداعىداي ورىندالادى. الداعى جىل بۇدان دا تابىستى بولادى. مەن پرەزيدەنت رەتىندە بۇعان بار كۇش- جىگەرىمدى سالامىن، - دەدى پرەزيدەنت.

وسى ورايدا، ۇكىمەت ەكونوميكامىزدىڭ ۇدەمەلى ءوسۋىن قامتاماسىز ەتىپ، ءتيىمدى جۇمىس اتقارۋى كەرەكتىگىن ايتتى.

- جاڭا ءوندىرىس ورىندارىن اشىپ، كاسىپ جۇرگىزۋگە جاعدايدى جاقسارتۋ قاجەت. جولدار سالۋدى جانە كوممۋنالدىق ماسەلەلەردى شەشۋدى جالعاستىرۋ كەرەك. سيفرلىق تەحنولوگيالاردى، سونىڭ ىشىندە جاساندى ينتەللەكتى قولدانۋ اياسىن كەڭەيتۋ قاجەت. ديقاندارىمىزعا قولداۋدى كۇشەيتۋ كەرەك، - دەدى قاسىم-جومارت توقايەۆ.

مەملەكەت باسشىسى جاڭا مەكتەپتەر مەن اۋرۋحانالار سالۋ، مۇعالىمدەردىڭ، دارىگەرلەردىڭ، عالىمدار مەن مادەنيەت قايراتكەرلەرىنىڭ مارتەبەسىن كوتەرۋ شارالارى جالعاساتىنىن ايتتى. سونداي-اق مەملەكەت جاستارعا قولداۋ كورسەتەدى.

پرەزيدەنت قۇتتىقتاۋىنىڭ تولىق ءماتىنىن مىنا سىلتەمە ارقىلى وقي الاسىز.