مەملەكەت باسشىسى قازاقستان حالقىن جاڭا جىلمەن قۇتتىقتادى
استانا. KAZINFORM - پرەزيدەنت قاسىم-جومارت توقايەۆ قازاقستاندىقتاردى جاڭا جىل مەرەكەسىمەن قۇتتىقتادى.
قىمباتتى وتانداستار!
سىزدەردى جاڭا جىل مەرەكەسىمەن شىن جۇرەكتەن قۇتتىقتايمىن!
بۇگىن ءبارىمىز ءجۇز جىلدىقتىڭ شيرەك عاسىرلىق بەلەسىنە قادام باسقالى تۇرمىز. بيىل التاي مەن اتىراۋ اراسىنداعى بارشا جۇرت تاريحتىڭ جاڭا پاراعىن ءبىر مەزەتتە اشادى.
حالقىمىز ەكى جىلدىڭ توعىسار تۇسىن ىزگى نيەتپەن، ەرەكشە كوڭىل كۇيمەن كۇتەدى. وتكەن كۇندەردى سارالاپ، ەسكى جىلعا باعا بەرەدى. ارمان-ماقساتىن ايقىنداپ، بولاشاققا زور ۇمىتپەن قارايدى.
بۇل-ناعىز وتباسىلىق مەرەكە. سوندىقتان، مەن بارشاڭىزعا، ەڭ الدىمەن، ەلىمىز امان، جۇرتىمىز تىنىش، باۋىرىمىز ءبۇتىن بولسىن دەگىم كەلەدى. ۇلۋ جىلى ۇلتىمىز ءۇشىن ماڭىزدى وقيعالارعا تولى بولدى. ءتۇرلى سالاداعى رەفورمالار جەمىسىن بەرە باستادى.
ەكونوميكانىڭ جاڭا باعدارىن بەلگىلەپ، ناقتى شارالاردى قولعا الدىق. وڭدەۋ ونەركاسىبى قارقىندى دامىپ كەلەدى. ءبىرقاتار ءىرى ءوندىرىس ورنى اشىلدى. ينۆەستيتسيالىق احۋال جاقساردى.
مىڭداعان شاقىرىم جول سالىنىپ، جوندەلدى. ەلىمىزدەگى ەڭ ۇزىن كوپىردىڭ قۇرىلىسى اياقتالىپ، حالىق يگىلىگىنە بەرىلدى. ديقاندارىمىز مول استىق جيناپ، قامبانى دانگە تولتىردى.
«تازا قازاقستان» اكسياسىنىڭ اياسىندا قالالار مەن اۋىلدار جاڭاشا كەلبەتكە يە بولا باستادى. العاش رەت ازاماتتارىمىزدىڭ ورتاشا ءومىر ءسۇرۋ ۇزاقتىعى 75 جاسقا جەتتى. وسكەلەڭ ۇرپاقتىڭ جارقىن بولاشاعى ءۇشىن اۋقىمدى جۇمىس اتقارىلىپ جاتىر.
ۇلتتىق قورداعى قارجىنىڭ ءبىر بولىگى بالالاردىڭ ەسەپشوتىنا ءتۇستى. جۇزدەن استام جاڭا مەكتەپ اشىلدى. كوپتەگەن الەۋمەتتىك نىسان سالىندى. پارلامەنت دەپۋتاتتارى قوعامداعى وزەكتى ماسەلەلەر بويىنشا زاڭدار قابىلدادى.
سونداي-اق، بيىل ءبىز ەلىمىزدىڭ كەلەشەگىنە ايرىقشا اسەر ەتەتىن وتە ماڭىزدى شەشىم قابىلدادىق. اتوم ەلەكتر ستانتسياسىنا قاتىستى رەفەرەندۋم وتكىزدىك. كوپشىلىك بۇل باستاماعا قولداۋ ءبىلدىردى. قازاقستاننىڭ الەمدىك ارەناداعى ابىرويى ارتا ءتۇستى. استانادا بەدەلدى حالىقارالىق ۇيىمداردىڭ ماڭىزدى سامميتتەرى ءوتتى. دۇنيەجۇزىلىك كوشپەندىلەر ويىندارىنا مىڭداعان سپورتشىلار مەن مەيماندار كەلدى. بايراقتى باسەكەنى تابىستى ۇيىمداستىرىپ، ءتول وركەنيەتىمىزدى جەر جۇزىنە تانىتتىق. سپورتشىلارىمىز وليمپيادا جانە پاراليمپيادا ويىندارىندا كوك تۋىمىزدى بيىكتە جەلبىرەتتى. وقۋشىلارىمىز ءتۇرلى ءبىلىم سايىستارىنان جۇلدەلى ورالدى. باسقا دا كوپتەگەن تابىس بار.
بيىل كوكتەمدە ءبىرقاتار ايماقتا الاپات تاسقىن بولعانىن بىلەسىزدەر. تابيعاتتىڭ توسىن سىناعى بارىمىزگە اۋىر تيگەنى ءسوزسىز. سوعان قاراماستان، قيىن كۇندەردە حالقىمىز ءبىر-بىرىنە جاناشىر بولىپ، مىزعىماس بىرلىگىن كورسەتتى.
زارداپ شەككەن بارشا ازاماتقا جان-جاقتى كومەك بەرىلدى. مەملەكەت ەشكىمدى نازاردان تىس قالدىرعان جوق. بارلىق مىندەتتەمەسىن تولىق ورىندادى. جۇزدەگەن وتباسى جاڭا جىلدى جاڭا شاڭىراقتا قارسى الىپ جاتىر.
ءبىز وسىلايشا ىرىستى ىنتىماعىمىزدىڭ ارقاسىندا بارلىق قيىندىقتى ەڭسەرەمىز. العا سەنىممەن قادام باسامىز. جۇيەلى رەفورمالار ودان ءارى جالعاسادى. جوسپارىمىزدىڭ ءبارى ويداعىداي ورىندالادى. الداعى جىل بۇدان دا تابىستى بولادى. مەن پرەزيدەنت رەتىندە بۇعان بار كۇش-جىگەرىمدى سالامىن. ۇكىمەت ەكونوميكامىزدىڭ ۇدەمەلى ءوسۋىن قامتاماسىز ەتىپ، ءتيىمدى جۇمىس اتقارۋى كەرەك.
جاڭا ءوندىرىس ورىندارىن اشىپ، كاسىپ جۇرگىزۋگە جاعدايدى جاقسارتۋ قاجەت. جولدار سالۋدى جانە كوممۋنالدىق ماسەلەلەردى شەشۋدى جالعاستىرۋ كەرەك. سيفرلىق تەحنولوگيالاردى، سونىڭ ىشىندە جاساندى ينتەللەكتى قولدانۋ اياسىن كەڭەيتۋ قاجەت. ديقاندارىمىزعا قولداۋدى كۇشەيتۋ كەرەك. وسى جۇمىستاردىڭ بارلىعىندا باستى ماقسات-ازاماتتاردىڭ ءال-اۋقاتىن ارتتىرۋ.
مەملەكەت ءبىلىم بەرۋ، دەنساۋلىق ساقتاۋ، عىلىم مەن مادەنيەتتى دامىتۋعا كوبىرەك كوڭىل بولەتىن بولادى. جاڭا مەكتەپتەر مەن اۋرۋحانالار سالۋدى، مۇعالىمدەردىڭ، دارىگەرلەردىڭ، عالىمدار مەن مادەنيەت قايراتكەرلەرىنىڭ مارتەبەسىن كوتەرۋدى جالعاستىرامىز. ارينە، مەملەكەت جاستارعا قولداۋ كورسەتەدى.
كەلەر جىلى ءبىزدى ءبىرقاتار اتاۋلى داتا كۇتىپ تۇر. ۇلى جەڭىستىڭ 80 جىلدىعىن لايىقتى ەتىپ وتكىزەمىز. كونستيتۋتسيا مەن قازاقستان حالقى اسسامبلەياسىنىڭ وتىز جىلدىعىن جوعارى دەڭگەيدە اتاپ وتەمىز. سونداي-اق، ۇلى ابايدىڭ 180 جىلدىق مەرەيتويىن لايىقتى اتاپ ءوتۋىمىز كەرەك. مەن الداعى جىلدى «جۇمىسشى ماماندىقتار جىلى» دەپ جاريالادىم. بۇل - ەڭبەك ادامدارىنا دەگەن ەرەكشە قۇرمەتتىڭ بەلگىسى. ءبىز وتانشىلدىق، ەڭبەكقورلىق جانە بىلىكتىلىككە ايرىقشا ءمان بەرەمىز.
ءدال قازىر مەرەكەگە قاراماستان، مىڭداعان وتانداسىمىز جۇمىس ىستەپ جاتىر. ولاردىڭ اراسىندا شەكاراشىلار، دارىگەرلەر، ءتارتىپ ساقشىلارى، قۇتقارۋشىلار مەن ءورت سوندىرۋشىلەر، ءوندىرىس باسىنداعى ماماندار جانە باسقا دا ازاماتتار بار. مۇنى ءوز ىسىنە دەگەن ادالدىقتىڭ ناعىز ۇلگىسى دەۋگە بولادى.
مەن بۇكىل حالقىمىزدىڭ اتىنان سىزدەرگە شىنايى ريزاشىلىعىمدى بىلدىرەمىن. شەتەلدە ءبىلىم الىپ جاتقان نەمەسە جۇمىس ىستەپ جۇرگەن ازاماتتارىمىزعا اماندىق تىلەيمىن!
قادىرلى اعايىن!
وسى مەرەكەلىك ساتتە مەن ءار شاڭىراققا شاتتىق تىلەيمىن!
جاڭا جىل ءار ازاماتقا جاقسىلىق اكەلسىن!
ءتورت قۇبىلامىز تۇگەل بولسىن!
ارداقتى انالارىمىز بەن ارداگەرلەرىمىز امان بولسىن!
جاس ۇرپاقتىڭ جولى اشىق، بولاشاعى جارقىن بولسىن!
قاستەرلى وتانىمىز ءوسىپ - وركەندەي بەرسىن!
جاڭا جىلدا بارشاڭىزعا اماندىق، باق - بەرەكە تىلەيمىن!
وسى وتباسىلىق مەرەكە جۇرەكتەرىڭىزدى جىلۋلىق پەن قۋانىشقا تولتىرسىن!
سىزگە شىن جۇرەكتەن زور دەنساۋلىق، باقىت جانە وركەندەۋ تىلەيمىن!
جاڭا جىل قۇتتى بولسىن!
بۇعان دەيىن حابارلاعانىمىزداي، پرەزيدەنتتىڭ قۇتتىقتاۋى Jibek Joly تەلەارناسىنىڭ ەفيرىنەن كورسەتىلدى.
