كوكجوتەل نەسىمەن قاۋىپتى

پەتروپاۆل. KAZINFORM - سولتۇستىك قازاقستان وبلىسىندا جىل باسىنان بەرى كوكجوتەلدىڭ 62 جاعدايى تىركەلدى.

اۋىرعانداردىڭ %94 ى - 14 جاسقا دەيىنگى بالالار. وتكەن جىلدىڭ ۇقساس مەرزىمىمەن سالىستىرعاندا بىردەن 60 جاعدايعا وسكەن. وبلىستىق سانيتاريالىق- ەپيدەميولوگيالىق باقىلاۋ دەپارتامەنتىنىڭ ينفەكسيالىق جانە پارازيتتىك اۋرۋلاردى ەپيدەميولوگيالىق قاداعالاۋ ءبولىمىنىڭ باس مامانى گۇليدا جاكەيەۆا باكتەريالىق ينفەكسيانى جۇقتىرۋدىڭ ادام ومىرىنە قانداي قاۋپى بارلىعى جايىندا ايتىپ بەردى.

بيىل س ق و-دا كوكجوتەلدى جۇقتىرۋ ەسەلەپ ارتقان. ماماننىڭ ايتۋىنشا، وبلىستا 2021 -جىلى اۋرۋ تىركەلمەسە، 2022 -جىلى ءبىر بالا اۋىرعان، بىلتىر 20 ادامعا دياگنوز قويىلعان.

«بيىل قاڭتاردا 8 ادام، اقپان- ناۋرىزدا 4-5 ادامنان اۋىرسا، ساۋىردە جۇقتىرعاندار سانى كۇرت ارتىپ، 16 ادام ەم العان. مامىردا كوكجوتەلمەن اۋىرۋدىڭ - 13، ماۋسىمدا - 6، شىلدەدە 10 جاعدايى تىركەلدى.

اۋىرعان 62 ادامنىڭ 58 ى 14 جاسقا دەيىنگى بالا. سىرقاتتانعانداردىڭ ىشىندە پەتروپاۆلدىڭ ۇلەسى باسىم، وبلىس ورتالىعىندا 49 ادام اۋىردى، قىزىلجار اۋدانىندا - 6، ايىرتاۋدا - 2 جانە قالعان اۋدانداردا ءبىر-بىردەن تىركەلدى.

90% ى نەمەسە 56 سىرقاتتانعان ادامدار ۆاكسينا الماعان.

باكتەريالىق ينفەكسيانىڭ تارالۋىنىڭ باستى سەبەبى دە وسى، سوڭعى جىلدارى ۆاكسينا قويدىرۋدان باس تارتقاندار كوبەيدى. بۇل ۆاكسيناتسيا ارقىلى باقىلاناتىن دەرت. كوپ جاعدايدا، كوكجوتەل - بۇل بالانىڭ ينفەكسياسى. ول نەگىزىنەن ءتورت جاستان اسقان بالالارعا تەز جۇعادى. اۋرۋعا قارسى يممۋنيتەت انا سۇتىمەن بەرىلمەيدى، سوندىقتان بالالىق شاقتا اۋرۋدى جۇقتىرۋ ىقتيمالدىعى جوعارى. بالاباقشاعا نەمەسە ءبىلىم بەرۋ ورتالىقتارىنا باراتىن بالالار ءجيى اۋىرادى، ويىن الاڭىندا، سەرۋەندەۋ كەزىندە نەمەسە ۇيگە كەلگەن قوناقتارمەن قارىم-قاتىناس كەزىندە دە جۇقتىرۋ مۇمكىندىگى جوعارى»، - دەيدى گۇليدا جاكەيەۆا.

كوكجوتەل - اۋىز قۋىسىندا، مۇرىندا جانە كومەيدە بولاتىن Bordetella pertussis باكتەرياسى تۋدىراتىن تىنىس الۋ جولدارىنىڭ وتە جۇقپالى اۋرۋى. ەرەسەك ادامدا نەمەسە بالادا سپاستيكالىق جوتەل ۇستامالارى پايدا بولادى، بۇل اۋىر اناتوميالىق، فيزيكالىق زاقىمدانۋلارعا، وكپەنىڭ وبسترۋكتيۆتى اۋرۋلارى مەن پنەۆمونيانىڭ ودان ءارى دامۋىنا اكەلۋى مۇمكىن.

ماماننىڭ ايتۋىنشا، كوپ جاعدايدا كوكجوتەل قاراپايىم رەسپيراتورلىق ۆيرۋستىق ينفەكسيا سياقتى باستالادى، ورتاشا قۇرعاق جوتەل جانە مۇرىننان سۋ اعۋ پايدا بولادى، دەنە تەمپەراتۋراسى 37-38 گرادۋسقا دەيىن كوتەرىلۋى مۇمكىن.

«كوكجوتەلدىڭ ءبىرىنشى كەزەڭى كاتارالدى دەپ اتالسا، كەيىن سپازمالىق جوتەل كەزەڭىنە وتەدى. ياعني جوتەل ۇستاماسى جيىلەيدى، ول توقتاۋسىز سپاستيكالىق سيپاتقا يە بولادى. ۇستاما 2-3 مينۋتقا دەيىن سوزىلۋى مۇمكىن. كوكجوتەل ۇستاماسى كەزىندە ادامنىڭ بەتى قىزارادى نەمەسە ءتىپتى كوگەرىپ، مويىن تامىرلارى ءىسىنۋى مۇمكىن. ال ءۇشىنشى كەزەڭى - رەكونۆالەستسەنتسيا - قالپىنا كەلۋ كەزەڭى، سىرقاتتىڭ بەتى بەرى قاراپ، جوتەلىنىڭ ازايۋى.

كوكجوتەل كوبىنەسە قايتالاما ينفەكسيالاردىڭ قوسىلۋىمەن ءتۇرلى اسقىنۋلاردى تۋدىرادى، اسىرەسە تىنىس الۋ جۇيەسىنىڭ اۋرۋلارى ءجيى كەزدەسەدى: برونحيت، پليەۆريت، ەمفيزەمانىڭ دامۋى دا مۇمكىن. سيرەك جاعدايلاردا وكپە اۋرۋلارىنا - اتەلەكتازعا، پنيەۆموتوراكسقا اكەلەدى. كوكجوتەل وكپەنىڭ قابىنۋى، ميدىڭ زاقىمدانۋى سياقتى اسقىنۋلارمەن قاۋىپتى»، - دەيدى گۇليدا جاكەيەۆا.

كوكجوتەلمەن اۋىراتىن ناۋقاستاردى ەمدەۋگە ارنالعان ءدارى-دارمەكتەر جوق.

«بالالاردى جانە بارلىق ەرەسەكتەردى كوكجوتەلدەن قورعاۋدىڭ جالعىز سەنىمدى جانە ءتيىمدى ءادىسى - ەرتە بالالىق شاقتان باستالاتىن ۆاكسيناتسيا. العاشقى ۆاكسيناتسيا 2، 3، 4 جانە 18 ايلارىندا باستالادى، سودان كەيىن 6 جاستا جۇرگىزىلەدى. ەگەر وسى جاعدايلار ساقتالسا، اعزادا كوكجوتەل اۋرۋىنا جەتكىلىكتى كۇشتى يممۋنيتەت پايدا بولادى»، - دەيدى دارىگەر.

بۇعان دەيىن س ق و-دا كوكجوتەلدەن ەم العان بالالاردىڭ سانى بەس ەسە ارتقانىن جازعان ەدىك.

اۆتور
اقەركە داۋرەنبەك قىزى