بولگاريا قازاقستاننىڭ ەۋروپاداعى ءىرى ءارى وتە ماڭىزدى سەرىكتەسى - پرەزيدەنت

استانا. KAZINFORM - بولگاريا مەن قازاقستان اراسىندا ىسكەرلىك كەڭەسى قۇرىلادى. بۇل تۋرالى اقوردادا ەلىمىزگە رەسمي ساپارمەن كەلگەن بولگاريا پرەزيدەنتى رۋمەن راديەۆپەن كەڭەيتىلگەن قۇرامداعى كەلىسسوز بارىسىندا مەملەكەت باسشىسى قاسىم-جومارت توقايەۆ ايتتى.

- قازاقستان بولگاريامەن ءوزارا ءتيىمدى سەرىكتەستىكتى ىلگەرىلەتۋگە بەيىلدى ەكەنىن راستاعىمىز كەلەدى. ءسىزدىڭ ەلىڭىزدى قازاقستاننىڭ ەۋروپاداعى ءىرى ءارى وتە ماڭىزدى سەرىكتەسى رەتىندە قاراستىرامىز. ءوز تاراپىمىزدان قازىر عانا تالقىعا سالىنعان ءبىرقاتار سالاداعى قارىم- قاتىناسىمىزدى تەرەڭدەتۋ، نىعايتۋ ءۇشىن بارلىق مۇمكىندىكتى ۇستانامىز. ءبىز ۇلكەن ماڭىزعا يە ءارى ەرەكشە نازاردى تالاپ ەتەتىن بەلگىلى ءبىر سالالاردى تالقىعا سالدىق. بولاشاقتا ىنتىماقتاستىعىمىزدى ىلگەرىلەتۋدە ۇلكەن ناتيجەلەرگە قول جەتكىزەتىندىگىمىزگە سەنىمدىمىن، - دەدى پرەزيدەنت.

مەملەكەت باسشىسى ەكى ەل دە اۋىل شارۋاشىلىعى، تۋريزم، دەنساۋلىق ساقتاۋ، تسيفرلاندىرۋ سىندى سالالاردى قوسا العاندا ساۋدا-ساتتىق قارىم- قاتىناسىن نىعايتۋعا مۇددەلى ەكەنىن باسا ايتتى.

- قازاقستان ەكونوميكالىق قاتىناستاردى ودان ارى نىعايتۋعا، ەنەرگەتيكا، اۋىل شارۋاشىلىعى، دەنساۋلىق ساقتاۋ جانە تۋريزم سالالارىندا ينۆەستيتسيالىق جوبالاردى ىسكە اسىرۋعا ۇمتىلادى. ساۋدا- ەكونوميكالىق قاتىناس جونىندەگى ۇكىمەتارالىق كوميسسيا بۇل جۇمىستىڭ الدىڭعى قاتارىندا بولارىنا سەنىمدىمىن. سونداي-اق بولگاريا مەن قازاقستان اراسىندا ىسكەرلىك كەڭەس قۇرۋعا نيەتتىمىز جانە تاياۋ بولاشاقتا ول ىسكەرلىك قارىم-قاتىناسىمىزى نىعايتۋداعى كەلەسى قادام بولماق. بۇگىنگى بيزنەس فورۋم مەن ساۋدا پالاتالارىمىز اراسىنداعى ءوزارا تۇسىنىستىك تۋرالى مەموراندۋمعا قول قويۋ ىنتىماقتاستىعىمىزعا ۇلەس قوسارىنا سەنىمدىمىز، - دەدى قاسىم-جومارت توقايەۆ.

پرەزيدەنت قازاقستان مەن بولگاريا ب ۇ ۇ جانە وزگە دە حالىقارالىق ۇيىمدار اياسىندا جەمىستى ىنتىماقتاستىقتى جولعا قويعانىن، الەمدىك ارەنادا ورتاق ماقساتتارى بار ەكەنىن اتاپ ءوتتى.

بۇعان دەيىن مەملەكەت باسشىسى قاسىم-جومارت توقايەۆ اقوردادا ەلىمىزگە رەسمي ساپارمەن كەلگەن بولگاريا پرەزيدەنتى رۋمەن راديەۆتى قارسى العانىن جازعان ەدىك.

اۆتور

مارلان جيەمباي