پرەزيدەنت ءىس باسقارماسىندا كادر قالاي تاڭدالادى
ول كادرلىق ءىس جۇرگىزۋ، HR-پروتسەسس، ەڭبەكاقى تولەۋدى اۆتوماتتاندىرۋ، تۇرعىن ءۇي قورى سىندى 4 ىشكى جۇيەدەن تۇرادى. جاڭا اقپاراتتىق جۇيەنىڭ جۇمىسى تۋرالى پرەزيدەنتتىڭ ءىس باسقارۋشىسى ايبەك دادەبايەۆ ايتىپ بەردى، دەپ حابارلايدى قازاقپارات ءتىلشىسى.
«پرەزيدەنتتىڭ ءىس باسقارماسى جۇيەسىندەگى باسىم باعىتتار مەن ءىرى جوبالار تۋرالى جالعاستىرساق. ينجەنەرلىك- تەحنيكالىق ورتالىق، ۇيىمداستىرۋ- باقىلاۋ جانە كادرلىق بولىمىمەن بىرلەسە وتىرىپ، ءبىزدىڭ HR مامانداردىڭ جۇمىسىن ايتارلىقتاي جەڭىلدەتەتىن ماڭىزدى جوبانى جۇزەگە اسىردى. بىلتىر ىسكە قوسىلعان «ءبىرىڭعاي كادر جۇيەسى» اقپاراتتىق جۇيەسىنىڭ ارقاسىندا بارلىق ۆەدومستۆولىق باعىنىستى كاسىپورىنداردىڭ كادرلىق جۇمىسى اۆتوماتتاندىرىلىپ، ورتاق ستاندارت جاسالدى. بۇل پرەزيدەنتتىڭ ءىس باسقارماسى جۇيەسى جۇمىسىن سارالاۋعا جول اشىپ وتىر»، - دەپ جازدى ايبەك دادەبايەۆ Telegram پاراقشاسىندا.
ونىڭ ايتۋىنشا، ءبىرىڭعاي كادر جۇيەسى كادرلىق ءىس جۇرگىزۋ، HR-پروتسەسس، ەڭبەكاقى تولەۋدى اۆتوماتتاندىرۋ، تۇرعىن ءۇي قورى سىندى 4 ىشكى جۇيەدەن تۇرادى. پىكىرىنشە، اتالعان جۇيەنىڭ پايدالى جاعى - پەرسونالدى ىرىكتەۋدە مەريتوكراتيا قاعيداتىنىڭ ساقتالۋى مەن HR- پروتسەستەردىڭ اۆتوماتتاندىرىلۋى.
«اقىلدى» جۇيە بوس لاۋازىمعا لايىق ۇمىتكەردى الدىمەن ۆەدومستۆولىق باعىنىستى ۇيىمنىڭ ىشىنەن، سودان كەيىن پرەزيدەنتتىڭ ءىس باسقارماسى جۇيەسىندەگى قىزمەتكەرلەردىڭ اراسىنان اۆتوماتتى تۇردە ءوزى تاڭدايدى. سودان كەيىن عانا باسقا مەكەمەلەردەن ىزدەيدى. تاڭداۋ الگوريتمىندە نەگىزگى 3 ولشەم بار، ول - كانديداتتىڭ مەڭگەرگەن ماشىقتارى، ءبىلىمى جانە ەڭبەك ءوتىلى. سونداي- اق، جۇيە كانديداتتىڭ سول كاسىپورىندا عانا ەمەس، بۇكىل ءپىب جۇيەسىندە ىستەيتىن بارلىق تۋىستارىن كورسەتىپ، وعان بۇرا تارتۋعا جول بەرمەيدى. قىزمەتكەردىڭ ءتيىستى لاۋازىمعا قانشالىقتى لايىق ەكەنىن اۆتوماتتى تۇردە سارالاپ، كاسىپورىن شەڭبەرىندە جانە بۇكىل ءپىب جۇيەسى بويىنشا ءادىل باعا بەرەدى. ال بوس ورىنعا كانديداتتىڭ سايكەستىك ولشەمى شەكتى دەڭگەيدەن ارتىق، ءبىراق %100 دان از بولسا، وندا جۇيە قىزمەتكەردى وقىتۋدىڭ جالپى جوسپارىندا ەسكەرىلەتىن جەكە دامۋ جوسپارىن قۇرىپ بەرەدى»، - دەيدى ول.
پرەزيدەنتتىڭ ءىس باسقارۋشىسىنىڭ مالىمەتىنشە، ءبىرىڭعاي كادر جۇيەسى ۇمىتكەرلەردىڭ سانىن، ولاردىڭ قانشاسى بىلىكتىلىگىن ارتتىرعانىن، كادر رەزەرۆىنەن بوس لاۋازىمدارعا تاعايىندالعانداردىڭ ۇلەسىن، رەزەرۆتەن كەتىپ قالعاندارعا قاتىستى اقپارات بەرەدى. ودان بولەك، رەزەرۆتەن كەتۋ سەبەبىن كورسەتۋ ارقىلى كادرلىق رەزەرۆتىڭ قانشالىقتى ءتيىمدى ەكەنى تۋرالى دا ءبىلۋ مۇمكىندىگى بار.
«كادرلىق ءىس جۇرگىزۋ» مودۋلىندە جۇمىسقا قابىلداۋدان باستاپ ەڭبەك شارتىن بۇزۋعا دەيىنگى بارلىق كادرلىق قۇجاتتاردىڭ ستاندارت شابلونى قاراستىرىلعان. سونداي-اق، كاسىپورىندا كادرلارعا قاتىستى كەز- كەلگەن قاجەت دەرەكتەر بازاسىن (شتاتتىڭ ناقتى سانى، قىزمەتكەرلەردىڭ اۋىسۋى، جۇمىسقا كەلمەۋ سەبەپتەرىن تالداۋ) قۇرۋعا بولادى. تاعى ءبىر ارتىقشىلىعى، ەڭبەكاقى اۆتوماتتى مودۋل ارقىلى ەسەپتەلەدى. ال «تۇرعىن ءۇي قورى» مودۋلى ارقىلى قىزمەتتىك تۇرعىن ءۇيدىڭ جاي- كۇيىن، باسپاناعا مۇقتاج قىزمەتكەرلەردىڭ كەزەگىن باقىلاۋعا مۇمكىندىك جاسالعان» ، - دەيدى ا. دادەبايەۆ.
سونداي-اق، جازبا اۆتورى ءبىرىڭعاي كادر اقپاراتتىق جۇيەسى ەلىمىزدىڭ ەڭبەك كودەكسىنىڭ بارلىق ەرەجەلەرىنە سايكەس كەلەتىنىن، اقپاراتتىق قاۋىپسىزدىك تالاپتارىنا ساي ءتيىستى سىناقتاردان سۇرىنبەي وتكەنىن ايتتى.
ايتۋىنشا، كاسىپورىننىڭ تالاپتارىنا وراي بەيىمدەپ، اۋقىمىن كەڭەيتۋگە بولاتىندىعى جۇيە ارتىقشىلىقتارىنىڭ ءبىرى.
«بۇعان دەيىن پرەزيدەنت ءىس باسقارماسىنىڭ ينجەنەرلىك- تەحنيكالىق ورتالىعىنىڭ ماماندارى ونى ادىلەت مينيسترلىگىنىڭ «جەكە تۇلعالار»، ەڭبەك جانە حالىقتى الەۋمەتتىك قورعاۋ مينيسترلىگىنىڭ Enbek.kz، مەملەكەتتىك قىزمەت ىستەرى اگەنتتىگىنىڭ «ە-قىزمەت» دەرەكتەر بازاسىمەن بىرىكتىرگەن بولاتىن. بيىل جىل سوڭىنا دەيىن قىزمەتكەرلەردىڭ دەرەكتەرىن قولمەن ەنگىزۋدى بارىنشا ازايتۋ ءۇشىن مەملەكەتتىك دەرەكقورلارمەن ينتەگراتسيا جاساۋ تولىق اياقتالۋعا ءتيىس»، - دەپ تولىقتىردى پرەزيدەنتتىڭ ءىس باسقارۋشىسى ايبەك دادەبايەۆ.
