كومىردى اۆتو جانە تەمىرجول كولىگىمەن اكەتۋگە شەكتەۋ ەنگىزىلمەك

استانا. قازاقپارات - كومىردى اۆتوكولىكپەن جانە تەمىرجول كولىگىمەن اكەتۋگە شەكتەۋ ەنگىزىلمەك. بۇل تۋرالى ۇكىمەت وتىرىسىندا يندۋستريا جانە ينفراقۇرىلىمدىق دامۋ ءمينيسترى مارات قارابايەۆ ايتتى، دەپ حابارلايدى قازاقپارات ءتىلشىسى.

«2022-2023 -جىلىتۋ ماۋسىمى اياقتالۋعا جاقىن. 2022 -جىلدىڭ قورىتىندىسى بويىنشا 113,9 ميلليون توننا كومىر ءوندىرىلدى. بۇل 2021 -جىلدىڭ كورسەتكىشىنەن 2 پايىزعا كوپ»، - دەدى مينيستر.

ونىڭ دەرەگىنشە، اعىمداعى جىلۋ ماۋسىمىنا حالىق پەن كوممۋنالدىق-تۇرمىستىق سەكتور ءۇشىن كومىردىڭ جوسپارلى قاجەتتىلىگى شامامەن 9 ميلليون توننانى قۇرادى. وڭىرلەرگە قاتتى وتىن تولىق كولەمدە جەتكىزىلدى.

«الداعى 2023-2024 -جىلدارداعى جىلۋ ماۋسىمىنا دايىندىق ماقساتىندا مينيسترلىك بيۋدجەتتىك ۇيىمدار مەن حالىقتى كومىرمەن قامتاماسىز ەتۋ بويىنشا ناقتى مەرزىمدەرى كورسەتىلگەن ءىس-شارالار جوسپارىن ازىرلەپ، جەرگىلىكتى اتقارۋشى ورگاندارعا جولدادى. الداعى جىلىتۋ كەزەڭىندە كوممۋنالدىق-تۇرمىستىق كومىردىڭ جەتىسپەۋشىلىگىن بولدىرماۋ ماقساتىندا مينيسترلىك كومىر ءوندىرۋشى كاسىپورىنداردى قوسپاعاندا، كومىردى اۆتوكولىكپەن جانە تەمىرجول كولىگىمەن اكەتۋدى شەكتەۋگە باعىتتالعان الدىن الۋ شارالارىن قابىلداۋدا»، - دەدى مارات قارابايەۆ.