قىزىلوردادا تاعى ءبىر جاس ءوسپىرىم توبەلەستە العان جاراقاتىمەن اۋرۋحاناعا جەتكىزىلدى

قىزىلوردا. قازاقپارات - قىزىلوردادا تاعى ءبىر جاس ءوسپىرىم توبەلەستە العان جاراقاتىمەن اۋرۋحاناعا جەتكىزىلدى، دەپ حابارلايدى قازاقپارات ءتىلشىسى.

وقيعا 10-ءساۋىر ساعات 17:35 شاماسىندا وبلىس ورتالىعىندا بولعان.

پوليتسياعا قالا اۋماعىنداعى كوپقاباتتى ۇيلەردىڭ ءبىرىنىڭ اۋلاسىندا ەكى جاس ءوسپىرىم اراسىنداعى توبەلەس تۋرالى حابار ءتۇستى.

«توبەلەستەن بىرەۋى جاراقات الىپ، اۋرۋحاناعا جەتكىزىلدى. اتالعان دەرەك ق ر قىلمىستىق كودەكسىنىڭ 293-بابىنىڭ (بۇزاقىلىق) بويىنشا پوليتسيا باسقارماسىنىڭ سوتقا دەيىنگى تەرگەپ- تەكسەرۋدىڭ ءبىرىڭعاي تىزىلىمىنە تىركەلدى. تەرگەۋ ءجۇرىپ جاتىر. ساراپتامالار تاعايىندالدى. وقيعاعا بايلانىستى كۇدىكتى جاس ءوسپىرىم قىزىلوردا قالالىق پوليتسيا باسقارماسىنا جەتكىزىلىپ، اتا-اناسىنا تاپسىرىلدى»، - دەپ ءمالىم ەتتى قىزىلوردا وبلىستىق پوليتسيا دەپارتامەنتىنەن.

ەسكە سالا كەتەيىك، قىزىلوردا وبلىسى قازالى اۋدانىندا 6-ساۋىردە ەكى مەكتەپ وقۋشىلارى اراسىندا جانجال تۋىنداعان بولاتىن.

وعان بايلانىستى ق ر قىلمىستىق كودەكستىڭ 293-بابىنا سايكەس تەرگەۋ امالدارى ءجۇرىپ جاتىر.

قازالىدا وقۋشىنى ۇرىپ-سوعۋ وقيعاسىنا بايلانىستى پوليتسيا باستىعى قىزمەتىنەن الىنادى.