شەتەلدە ەم الىپ جاتقان ءجۇرسىن ەرمان الماتىداعى ايتىستاردىڭ بىرىندە كوزگە ءتۇستى

استانا. قازاقپارات - بىلتىر تانىمال ايتىسكەر اقىن ءجۇرسىن ەرمان جانساقتاۋ بولىمىنە تۇسكەن ەدى. دارىگەرلەر اقىننىڭ اۋرۋى اسقىنىپ، سەپسيسكە اينالعانىن ايتقان بولاتىن.

كەيىن ونەر يەسى شۆەيتسارياعا ەمدەلۋگە كەتكەنى بەلگىلى بولدى. ال كەشە بەلگىلى كاسىپكەر دۋلات تاستەكەي اقىن ءجۇرسىن ەرماننىڭ جاس اقىندار سايىسىندا قازىلىق ەتىپ وتىرعان جەرىندەگى سۋرەتتەرىن جاريالادى، - دەپ حابارلايدى Massaget.kz ءتىلشىسى.

كاسىپكەر دۋلات تاستەكەي 72 جاسىندا دەرتكە شالدىققان ءجۇرسىن ەرماننىڭ ايتىسقا كەلۋىن ەرلىككە بالاعان.

«جانكەشتىلىك ەمەي نەمەنە؟ 72 جاسىندا سىناق قىپ بەرگەن سىرقاتتى سىرعىتىپ ارتقا تاستاسا دا، ۇزاق العان ەم-دومنان كەيىن تولىق قالپىنا كەلىپ ۇلگەرمەگەن ءجۇرسىن اعامىز ايتىس الاڭىنا كەلىپ، جارق ەتىپ، جاستارعا جالىن بەرگەندەي بولدى. ول كىسىنى كورگەن كەز كەلگەن قۇلىنشاقتىڭ كوسىلىپ شاۋىپ، ءجۇرسىننىڭ جۇيرىكتەرى قاتارىنان ورىن العىسى كەلەرى انىق. بۇگىن جاستار اراسىنداعى جۇيەلى تۇردە وتەتىن ايتىستىڭ 1-كۇنى نەمەسە تۋرى باستالدى. ەرتەڭ تۇستەن كەيىن الاتاۋ ءداستۇرلى تەاترىندا جالعاسىن تاپپاق. ايتىسقا دەگەن شىنايى دا ناعىز كوڭىلى بولماسا، وسىنداي باتىرلىقتى ءجۇرسىن اعامىزدىڭ ىستەمەسى انىق. اركىمگە شىبىن جانى ءتاتتى عوي. اقىلدىلىعىمەن ابىزعا اينالعان اعامىزدىڭ بۇگىنگى بۇل قادامىن مەن ەشقانداي اڭعالدىق ەمەس، ساف ونەرلەرىمىزدىڭ مارجانى ايتىسقا دەگەن ماحاباتىنىڭ دالەلى دەپ تانيمىن»، - دەپ جازعان كاسىپكەر.

سونداي-اق، ول ءجۇرسىن ەرماننىڭ ءالى دە تولىق ساۋىقپاعانىن ايتتى.

«سويلەگەن سوزىمدە «سوڭعى 50 جىلعا جۋىق جاساعان قىزمەتى ءۇشىن ءجۇرسىن اعامىزعا ايتىس تا، ياعني قازاق تا قارىزدار» دەدىم. ارتىق كەتتىم دەپ ويلامايمىن. قولدارسىزدار. اعامىزدىڭ دەنساۋلىعى دا ءالى تولىققاندى ءتاۋىر ەمەس. دەگەنمەن جىگەرى جۇقالماعان. ايتىستىڭ قارا نارى - ءجۇرسىن ەرمانعا باقىتتى دا امان-ساۋ ۇزاق عۇمىر تىلەپ قويىڭىزدارشى. كوپ تىلەگى كول بولىپ، پەرىشتەلەر ءاۋمين دەپ، جاراتقان جارىلقاسىن!» - دەپ جازعان ول.

ايتا كەتەيىك، ءجۇرسىن ەرمان - اقىن، جۋرناليست، قازىرگى ايتىس ونەرىنىڭ ۇيىمداستىرۋشىسى، قازاقستاننىڭ ەڭبەك سىڭىرگەن قايراتكەرى، قازاقستان جازۋشىلار وداعىنىڭ مۇشەسى. ونىڭ «جانارتاۋ»، «ارايلى كۇن، ارمىسىڭ!»، «ۇلىتاۋعا باردىڭ با...»، «قۇدىرەتكە جۇگىنۋ»، «ەكى تىزگىن، ءبىر شىلبىر»، «قۇستىڭ كولەڭكەسى»، «ىرعاي»، «ارنادىم سىزگە»، «كوكتوبەدەگى كەزدەسۋلەر»، «الىستان جانە جاقىننان»، «گوي-گوي» اتتى كىتاپتارى بار.

ەسكە سالايىق، بۇعان دەيىن تانىمال اقىن ءجۇرسىن ەرمان جانساقتاۋ بولىمىنە تۇسكەنى حابارلانعان بولاتىن. ال كەيىن دارىگەرلەر ءجۇرسىن ەرماننىڭ دەنساۋلىعىنا قاتىستى پىكىر بىلدىرگەن ەدى. سونداي-اق، شۆەيتساريادا ەمدەلىپ جاتقان ءجۇرسىن ەرماننىڭ جاعدايى بەلگىلى بولدى.