بىزگە وسىنداي جەيدەلەر كەرەك سەكىلدى
چەمپيوندار ليگاسىنىڭ جارتىلاي فينالىنىڭ قارىمتا ماتچتارى بۇكىل الەمدى ءدۇر سىلكىندىردى. فينالعا شىعۋ ماسەلەسىن ءبىرىنشى ويىندا-اق تولىقتاي بولماسا دا، جارتىلاي شەشىپ العان كلۋبتار وماقاستى. كەرىسىنشە، ەڭ ۇزدىك ويىنشىلارىنان ايىرىلىپ، جاعدايلارى تىعىرىققا تىرەلگەن كوماندالار جەڭىستى جۇلىپ الدى. كەرەمەت! جارتىلاي فينالدىڭ قارىمتا ماتچىندا «ليۆەرپۋل» ءبىر ەمەس، ەكى ۇزدىك ويىنشىسىنا سەنىم ارتا المادى. ولار - مىسىرلىق موحامەد سالاح پەن برازيليالىق روبەرتو فيرمينو.
ال «توتتەنحەم» قۇرالايدى كوزگە اتقان سۇرمەرگەنى حارري كەيندى الاڭعا شىعارا المادى. ايتسە دە، اتالعان ەكى كلۋب سالاحسىز دا، كەينسىز دە تورتكىل دۇنيەنى تاڭ قالدىردى. «ليۆەرپۋل» كلۋبىنىڭ ءتورت گولىن قوس- قوستان ديۆوك وريگي مەن دجوردجينيو ۆەينالدۋم سوقتى. ترەنت الەكساندەر- ارنولد دوپتى ويىنعا بۇرىشتان قوسىپ-اق، بۇكىل «بارسەلونانى» قالىڭ ۇيقىعا جىبەردى. ال «توتتەنحەم» ساپىندا لۋكاس موۋرا جارق ەتىپ كوزگە ءتۇستى.
البەتتە وڭ اياعىمەن دوپ تەبەتىن جارتىلاي قورعاۋشى امستەردامدا سول اياعىمەن حەت-تريك جاسادى. مىنە، جاڭا ەسىمدەر! جوعارىدا اتالعان فۋتبولشىلار بۇعان دەيىن وسىنداي ەرلىكتەر جاساپ پا ەدى؟ وۋ، سوندا ليونەل مەسسي قايدا، كريشتيانۋ رونالدۋ قانە؟! نەگە ولار تاعىدا ءوز كلۋبتارىن سۇيرەپ الىپ شىقپادى؟ جوق، قاشانعى تەك سولار كوزگە تۇسە بەرۋلەرى كەرەك؟! نەگە ىلعي ازۋلى كوماندالار جەڭىسكە جەتە بەرۋلەرى ءتيىس. فۋتبول كوماندالىق ويىن ەمەس پە؟ «ءبىر جەڭنەن قول، ءبىر جاعادان باس» شاعارا بىلگەن ۇجىمدار جەڭىسكە جەتتى. ومىرگە بۇل دا كەرەك سياقتى. تىم بولماسا، اندا- ساندا وسىنداي سەرپىلىستەر بولۋى زاڭدى ەمەس پە؟ چەمپيوندار ليگاسىنىڭ جارتىلاي فينالىنداعى قارىمتا ماتچتار فۋتبول جانكۇيەرلەرىنە ەكى كامبەك سىيلادى. ە، باسە، فۋتبول دەگەن وسىنداي بولسا كەرەك ەدى. كەزدەيسوق ناتيجەلەرىمەن ادامدى باۋراپ الاتىنى بار ەدى عوي.. . راس، ەكى كۇنگى كامبەككە كۇدىكپەن قاراۋشىلار دا بار.
«فۋتبول ەمەس، مۇنىڭ ءبارى كومپيۋتەرلىك ويىن سياقتى» دەۋشىلەر دە تابىلدى.
«چەمپيوندار ليگاسىنىڭ جارتىلاي فينالىندا الەمنىڭ ەڭ ۇزدىك تريللەرلەرى مەن بلوگباستەرلەرى دە ءجىپ ەسە الماي قالدى» دەگەندەر دە بارشىلىق. شىنى كەرەك، مەن دە وسىلار سەكىلدى ەكى ويىننىڭ ناتيجەسىنە كۇدىكپەن قارادىم... ءبىراق ماعان وسى ءبىر كەزدەيسوق ناتيجەلەر ۇنادى دا. قاشانعى ءبىرسىدىرعى بولا بەرۋى كەرەك؟ مۇنداي فۋتبولدان جانكۇيەرلەر دە، ءبارىمىز دە جالىعىپ كەتپەيمىز بە؟ وزگەرىستەر كەرەك تە سياقتى.
ءبارى دە موحامەد سالاحتىڭ جەيدەسىندە جازىلىپ تۇرعانداي - Never give up (ەشقاشان دا بەرىلمە!). ءبىزدىڭ دە فۋتبولىمىزدا وسىنداي وزگەرىستەر، كامبەكتەر بولىپ تۇرسا ەكەن... كوپشىلىككە تانىمال فۋتبول مامانى، بىلىكتى باپكەر، ءبىزدىڭ جەرلەسىمىز قۇربان بەردىيەۆ «كەشەگىنىڭ ءبارى دە سالاحتىڭ جەيدەسىندە جازىلىپ تۇردى. بۇل - ەڭ باستىسى» دەپتى.
جانە «ەڭ باستىسى، ءبارى دە مۇمكىن ەكەندىگىنە سەنۋ» دەپ قوسىپتى. كەرەمەت ايتىلعان. سپورتشىلارعا وي سالار - سوزدەر. مەنىڭ دە ءوز ويىمدى «Never give up» دەپ، تۇيىندەگىم كەلىپ وتىر.
inbusiness.kz