قازاقستاندىق «تۇيمەقىز» الەم كۋبوگىنان جۇلدەلى ورالدى

قوستاناي. قازاقپارات - پاراليمپيادالىق پاۋەرليفتينگتەن حالىقارالىق دارەجەدەگى سپورت شەبەرى، قازاقستاندىق «تۇيمەقىز» ەسىمىمەن تانىمال تۇرسىناي قابىل دۋبايدا وتكەن الەم كۋبوگى ويىندارىنان جۇلدەلى ورالدى، دەپ حابارلايدى قازاقپارات ءتىلشىسى.

قوستانايلىق سپورتشى ايەلدەر اراسىندا 41 كەلىگە دەيىنگى سالماق دارەجەسىندە ونەر كورسەتىپ، «قولا» جۇلدەگە يە بولدى. دەگەنمەن، سپورتشى باس جۇلدەدەن ءۇمىتتى بولعانىن جاسىرمادى.

«الەم كۋبوگى - جاۋاپتى سىن. ەڭ جوعارعى كورسەتكىشكە قول جەتكىزەمىن دەپ ويلادىم. ءبىراق، ۇزدىك ۇشتىككە كىرۋدىڭ ءوزى جەتىستىك. مەنى قولداعان جەرلەستەرىمە، باپكەرلەرىمە العىسىم شەكسىز. ەندى «Miss Virtual Kazakhstan-2018» بايقاۋىنا تىڭعىلىقتى دايىندالماقپىن»، - دەدى تۇرسىناي قابىل.

ايتا كەتەيىك، جاقىندا «Miss Virtual Kazakhstan-2018» بايقاۋىنىڭ فينالدىق كەزەڭىنە شىققان قاتىسۋشىلار بەلگىلى بولدى. 3000 ارۋدىڭ ىشىنەن ىرىكتەلگەندەردىڭ اراسىندا تۇرسىناي دا بار.

«ءومىردىڭ ءوزى سىننان تۇرادى عوي. مەن قيىندىقتاردان قورىقپايىمىن. «Miss Virtual Kazakhstan-2018» بايقاۋىنا قاتىسپاس بۇرىن كوپ ويلاندىم. راسىندا، مەن كىمنەن كەممىن؟ ءوزىمدى قوعامنىڭ ءبىر بولشەگى رەتىندە كورسەتكىم كەلدى. ەندىگى ارمانىم - ءومىر تۋرالى كىتاپ جازۋ جانە مۇگەدەكتەرگە ارناپ سپورت زالىن اشۋ. بولاشاقتا سپورت جاتتىقتىرۋشىسى بولعىم كەلەدى»، - دەيدى قازاقستاندىق «تۇيمەقىز».