يۋليا گالىشەۆا: قازاقستاندى العاشقى مەدالمەن قۇتتىقتايمىن - فوتو

پحەنچحان. قازاقپارات - بۇگىن پحەنچحان وليمپياداسىندا قازاقستانعا «قولا» جۇلدە الىپ كەلگەن فريستايلشى يۋليا گالىشەۆا قازاقپارات تىلشىسىمەن جەڭىسىنەن كەيىنگى اسەرىمەن ءبولىستى.

- جۇلدەلى بولۋىڭىزبەن قۇتتىقتايمىز!

- راحمەت! ماعان جانكۇيەر بولعان بارلىق وتانداستارىما راحمەت! العىس ايتقىم كەلەدى. وسىندا جۇرگەن سىزدەرگە دە رازىمىن. قازاقستان قورجىنىنا تۇسكەن العاشقى مەدالىمىز بارشامىزعا قۇتتى بولسىن!

- جۇلدە الاتىنىڭىزعا سەنىمدى بولدىڭىز با؟

- شەشۋشى فينالدىق سىندا قاتتى قورىقتىم. قازىر ءوز-وزىمە سەنبەي تۇرمىن. قۋانىشىمدا شەك جوق. نەگىزى مەن باقىتتىمىن.

- فينالدا سوڭعى قارسىلاسىڭىز جارىس جولىنان شىعىپ قالدى. جاعداي بۇلاي وربىمەگەندە قالاي بولار ەدى؟

- بىردەمە ايتا المايمىن. جارىستا ەڭ جامانى - ءتورتىنشى ورىن الۋ. ءتورتىنشى ورىندى اعاش مەدال دەيدى. ونداي ورىننان بەسىنشى ورىن العان الدەقايدا جاقسى. جالپى، قۋانىشتىمىن.

ەسكە سالايىق، بۇگىن وڭتۇستىك كورەيادا ءوتىپ جاتقان 23- قىسقى وليمپيادا ويىندارىندا فريستايلشى يۋليا گالىشەۆا قازاقستان قورجىنىنا تۇڭعىش مەدالدى سالدى.

ۇزدىك التى سپورتشىنىڭ اراسىندا العاشقى بولىپ جارىس جولىنا شىققان سپورتشىمىز 77,40 ۇپاي جينادى. بۇل ناتيجە وعان وليمپيادانىڭ قولا جۇلدەسىن سىيلادى.

  

كۇنسۇلتان وتارباي