اقىن-جازۋشىلاردى ەڭ باقىتتى جاندار دەپ سانايمىن - اكىم تارازي
بۇل باسقوسۋ نۇرعوجا اقىننىڭ ءوزى ولەڭ وقىپ تۇرعان بەينەتاسپانى تاماشالاۋدان باستالدى.
بەلگىلى قالامگەرلەر، عالىمدار اكىم تارازي، سەرىك نەگيموۆ، قويشىعارا سالعارا ۇلى، تولەن ابدىك، سۇلتان ورازالين، سونىمەن بىرگە «ەگەمەن قازاقستان» گازەتى اق پرەزيدەنتى دارحان قىدىرالى، اقىن سەرىك تۇرعىنبەك جانە قوعام قايراتكەرى ورازگۇل اسانعازى كەش بارىسىندا ءسوز الىپ، نۇرعوجا نارىمباي ۇلىنىڭ ازاماتتىق ۇستانىمى، ءومىرى مەن شىعارماشىلىعىندا قول جەتكىزگەن تابىستارى جانە استانا قالاسىن دامىتۋداعى سىڭىرگەن ەڭبەگى تۋراسىندا ويلارىن ورتاعا سالدى.
«ءوزىم جازۋشى، اقىنداردى ەڭ باقىتتى جاندار دەپ سانايمىن. ويتكەنى ولاردىڭ تۋىندىلارى ولمەيدى. كوزىنىڭ تىرىسىندە قۇرمەتكە بولەنەدى، دۇنيەدەن وزعان سوڭ دە، ەلى ەسىنە الادى. جازعان شىعارمالارى قۇندى بولسا، حالىققا ءسوزى جەتىپ جاتسا، سول باقىت قوي. نۇرعوجا دا سونداي باقىتتى جاننىڭ ءبىرى دەپ ەسەپتەيمىن»، - دەدى جازۋشى اكىم تارازي.
وسى كەشتە ونەر ۋنيۆەرسيتەتىنىڭ ستۋدەنتتەرى اقىننىڭ جىرىن مانەرلەپ وقىدى. جاس انشىلەر ن. ورازدىڭ سوزىنە جازىلعان اندەردى ورىندادى.
بۇل كەشتىڭ باستى ەرەكشەلىگى - ۇلتتىق اكادەميالىق كىتاپحانانىڭ ءۇشىنشى قاباتىندا «استانا زالىنىڭ» اشىلۋى. كەڭ زالعا نۇرعوجا ورازدىڭ ۇيىندە تۇرعان جەكە كىتاپحاناسى جيھازىمەن بىرگە تۇگەلدەي كوشىرىلىپ اكەلىنگەن. اقىننىڭ وتباسى وسىنداي شەشىمگە كەلىپ، 3500 كىتاپتى رۋحاني قازىنانىڭ ورتالىعىنا تابىس ەتىپ وتىر.
كىتاپحانا ديرەكتورى ءۇمىتحان مۇڭالبايەۆا قالامگەردىڭ زايىبى ايمان قوجاحمەت قىزىنا ريزاشىلىعىن ءبىلدىرىپ، قازاقى داستۇرمەن يىعىنا ورامال جاپتى. اقىننىڭ تۋعان جەرى قوستاناي وبلىسىنىڭ سارىكول اۋدانىنان كەلگەن سولدات دۇتپايەۆ جەرلەس قالامگەر اعاسىن ەرەكشە قۇرمەت تۇتاتىنىن ەسكە الا كەلىپ، كىتاپحاناعا قوستاناي ءوڭىرى تۋرالى سىر شەرتەتىن جيناقتاردى تابىس ەتتى.
ەسكە سالا كەتسەك، نۇرعوجا وراز 1932 -جىلى 20 -قازاندا قوستاناي وبلىسىنىڭ سارىكول اۋدانىندا دۇنيەگە كەلگەن، ال 2016 -جىلى 20 -اقپان كۇنى استانا قالاسىندا 84 جاسقا قاراعان شاعىندا دۇنيە سالدى.
