قۇمدى شولدەگى «توزاق قاقپاسى» يۋنەسكو تىزىمىنە ەنگىزىلەدى - فوتو

 استانا. قازاقپارات - قاراقۇم شولەيتتى دالاسى يۋنەسكو- نىڭ الەمدىك مۇرالار تىزىمىنە تازا ەكولوگيالىق جۇيە رەتىندە ەنگىزىلۋى مۇمكىن.

بۇل جايىندا تۇركمەنستان پرەزيدەنتى گۋربانگۋلى بەردىمۇحاممەدوۆ مالىمدەدى. «بۇل جەرلەردە وسىمدىكتەر مەن جانۋارلار الەمى عاجايىپ تۇرلەنگەن. سوندىقتان دا تابيعي سىر- سيپاتتارى ءجىتى زەرتتەلۋى قاجەت» ، - دەيدى تۇركمەن پرەزيدەنتى. ول، سونداي- اق، قازىرگى ۋاقىتتا تۇركمەنستاندا حالىقارالىق تۋريزم سالاسىنىڭ بەلسەندى دامىپ كەلە جاتقاندىعىن دا ماقتانىشپەن اتاپ ءوتتى.

شەتەل تۋريستەرى رەسپۋبليكانىڭ تابيعي بولمىسىنا قىزىعۋشىلىق تانىتاتىنىن، اسىرەسە عاجايىپ كورىكتى مەكەندەر مەن شولەيتتەردىڭ ءرولى زور ەكەنىن ايتتى. سولاردىڭ ءبىرى - تۇركمەن جەرىنىڭ ۇشتەن ءبىرىن الىپ جاتقان قاراقۇم ءشولى.

350 مىڭ شارشى شاقىرىمعا سوزىلىپ جاتقان قۇمدى ءشول الەمدەگى ەڭ ۇلكەن ءشولدى ايماقتاردىڭ بىرىنەن سانالادى. بۇل جەرگە تاپ بولعان كەز كەلگەن ادامدى قۇمدى مۇحيتتا جۇرگەندەي اسەردە قالدىرادى. مۇحيتتاعى سياقتى مۇندا دا قۇمدى تولقىندار (بارحاندار) تۇرىپ، جەلدىڭ كۇشىمەن اندەتە دە الادى.

ساياحاتشىلاردى اشحاباتتان ءشول دالانىڭ ورتاسىنداعى داملا قىستاۋىنا دەيىن جەتكىزۋ قاراستىرىلعان. جولدىڭ 130 شاقىرىمى تەك قۇم ۇستىندە وتەدى. قىستاۋدا تۋريستەر جەرگىلىكتى جۇرتتىڭ تۇرمىسىمەن، قول ونەرىمەن ەتەنە تانىسىپ، ۇلتتىق تاعامدارىنان ءدام تاتا الادى. ال ودان سوڭ ءتۇندى شاتىر استىندا وتكىزەدى.

ەلگە تۋريستەردى كوپتەپ تارتىپ وتىرعان جەردىڭ ءبىرى - دارۆاز. وتى سونبەس ۇڭگىر - كەزىندە ادام قولىمەن جاسالعان قاتەلىك سالدارىنان ورىن العان اپاتتىڭ ناتيجەسى. «توزاق قاقپاسى» اتانىپ كەتكەن بۇل ۇڭگىردەگى جانىپ جاتقان تابيعي گازدىڭ مولشەرى قاشان تاۋسىلاتىنىن دا ەشكىم ءدوپ باسىپ ايتا الماي وتىر.

1971-جىلى ورىن العان اپاتتان كەيىن گەولوگتار ونداعى گاز بىرنەشە كۇننىڭ ىشىندە جانىپ بىتەدى دەپ بولجاعان ەدى. الايدا، كورىپ تۇرعانىمىزداي، كراتەردىڭ جالىنى قىرىق جىلدان بەرى وشپەي تۇر.

muslim.kz