اقتوبەدەگى قازاق- ورىس ۋنيۆەرسيتەتى جابىلادى
اقتوبە. KAZINFORM - اقتوبەدەگى قازاق- ورىس ۋنيۆەرسيتەتى بيىلعى وقۋ جىلىنان سوڭ جابىلادى.
قۇرىلتايشىلاردىڭ شەشىمىنەن سوڭ 2 مىڭ ستۋدەنت قايدا بارادى؟ عىلىم جانە جوعارى ءبىلىم مينيسترلىگى اتا-انالارمەن ويلاين بايلانىسقا شىقتى.
قازاق- ورىس ۋنيۆەرسيتەتى ستۋدەنتتەرگە بيىل جوعارى وقۋ ورنى جابىلاتىنىن ايتىپ، حابارلاما بەرگەن. سول حابارلاما نەگىزىندە بۇگىن كوپ اتا- انا مەن ستۋدەنت وقۋ ورنىنا باردى. الايدا بۇل وقۋ ورنى قانداي دا ءبىر تۇسىنىك بەرۋدەن باس تارتتى، ءتىپتى جاۋاپ بەرەر باسشىلارى دا بولمادى.
Kazinform ءتىلشىسى كەيىن 2-اقتوبە قالالىق مەكتەپ- گيمنازياسىندا جيىن وتەتىنىن ءبىلىپ، جينالىسقا قاتىستى. مۇندا اتا-انالار مەن ستۋدەنتتەر جينالىپ، عىلىم جانە جوعارى ءبىلىم مينيسترلىگىنىڭ وكىلى ارتۋر ەدىلحانوۆ ونلاين بايلانىسقا شىقتى. سونىمەن بىرگە اقتوبەدەگى جانە كورشىلەس وبلىستارداعى ج و و پرورەكتورلارى قوسىلدى. ال قازاق- ورىس ۋنيۆەرسيتەتىنەن ەشبىر وكىل كەلمەدى.
- كەيىنگى ءبىر اپتادا، كەيبىر اقپارات قۇرالدارىندا، الەۋمەتتىك جەلىدە نەشە ءتۇرلى الىپقاشپا اڭگىمە، داقپىرت ءسوز شاققان. سوندىقتان ءوز پىكىرىمىزدى جەتكىزبەك ويىمىز بار. جالعان اقپاراتتىڭ سوڭىنا ەرمەي، مەملەكەتتىك ورگاننىڭ ءوز اۋزىنان ەستىسىن دەگەن نيەت... ۋنيۆەرسيتەت قۇرىلتايشىسىنىڭ ءبىلىم بەرۋ قىزمەتىن توقتاتۋ تۋرالى شەشىمى بار. وتكەن جىلى دا وسىنداي شەشىم قابىلداپ، مينيسترلىككە بەرگەن بولاتىن. ول كەزدە دە جۇمىسىن توقتاتۋ تۋرالى جوسپارىن جازعان. بيىل دا قايتالاندى. بۇعان دەيىن ناۋرىز ايىندا ستۋدەنتتەرگە قاتىستى قابىلدانعان شەشىم تالقىلانىپ، اكىمشىلىك، مينيسترلىك تاراپىنان پىكىر ايتىلدى. ءساۋىر ايىندا دا مينيسترلىك جۇمىس توبىن جىبەردى. ءبىلىم ساپاسىنا زەردەلەۋ جۇمىسى جۇرگىزىلدى. كەز كەلگەن جوعارى وقۋ ورنىنىڭ قىزمەتى مەملەكەتتىك ستاندارتقا سايكەس كەلۋى ءتيىس. ونى باقىلاۋ مينيسترلىككە جۇكتەلگەن. ستاندارت دەگەنىمىز جوعارى وقۋ ورنىنا دا، ءبىلىم الۋشىعا دا مىندەت قويىلادى. ەكى تاراپ بىرگە ساپالى مامان دايىنداپ شىعارادى، - دەدى عىلىم جانە جوعارى ءبىلىم سالاسىنداعى ساپانى قامتاماسىز ەتۋ كوميتەتى ءتوراعاسىنىڭ ورىنباسارى ارتۋر ەدىلحانوۆ.
ونىڭ ايتۋىنشا، قازاق- ورىس ۋنيۆەرسيتەتىنىڭ ليتسەنزياسى ءالى ساقتاۋلى، سوڭعى شەشىم دە قابىلدانبادى. ستۋدەنتتەردىڭ ءبارى بيىلعى وقۋ جىلىن وسى ۋنيۆەرسيتەتتەن اياقتاپ شىعا الادى.
- 2024-2025 -جىلعى وقۋ جىلىن اياقتاۋعا بولادى. ەندىگى سۇراق - ءبىر وقۋ ورنىنان ەكىنشى وقۋ ورنىنا اۋىسۋ. ول ءاربىر ستۋدەنتتىڭ جەكە قۇقىعى. 595-بۇيرىقتىڭ 31-تارماعىندا «دەمالىس كەزىندە ءبىلىم الۋشى ءبىر وقۋ ورنىنان ەكىنشىسىنە اۋىسۋعا، ءبىر ءبىلىم بەرۋ باعدارلاماسىنان ەكىنشىسىنە اۋىسۋعا قۇقىلى» دەپ جازۋلى. «ءبىلىم تۋرالى» زاڭنىڭ 42-بابى بويىنشا ءبىلىم بەرۋ ۇيىمى ءوز قىزمەتىن توقتاتسا، قۇرىلتايشىسى 2 اي ىشىندە ءبىلىم الۋشىلاردىڭ باسقا وقۋ ورىنا ورنالاسۋى ءۇشىن قۇجاتتارىن بەرۋگە، بۇعان دەيىن وقىعان ادامداردىڭ قۇجاتىن مەملەكەتتىك ارحيۆكە تاپسىرۋعا مىندەتتى. ءبىراق بۇعان قاراماستان مينيسترلىك ءوز تاراپىنان جۇمىس اتقارادى. كورشىلەس ورنالاسقان وبلىستاردىڭ وقۋ ورىندارىمەن بىرگە جۇمىس ىستەيمىز. جۇمىس وقۋ جىلى اياقتالعان سوڭ باستالادى. مينيسترلىكتەن ارنايى توپ جەرگىلىكتى جەرگە كەلىپ، ءار ستۋدەنتتىڭ قۇجاتىن جەكە قارايدى. مينيسترلىك ستۋدەنتتى قابىلدا دەپ وزگە وقۋ ورنىنا تالاپ تا قويا المايدى. ءبىراق جۇمىستى بىرلەسە اتقارادى، - دەدى ارتۋر ەدىلحانوۆ.
قازاق- ورىس ۋنيۆەرسيتەتىن بيىل 800 دەن استام ستۋدەنت بىتىرەدى. ال 1189 ستۋدەنت وزگە وقۋ ورنىنا اۋىسا الادى. تەك ستۋدەنت ءوزىن قابىلدايتىن جوعارى وقۋ ورنىنىڭ تالابىن ورىنداۋى كەرەك. ونلاين كەزدەسۋدە اتا-انالار وقۋ اقىسىنىڭ ايىرماشىلىعىن ءبولىپ تولەۋ، وزگە وقۋ ورنىنا قابىلدانار كەزدە ماماندىق اتاۋىنىڭ وزەگەشەلىگىن ەسكەرۋ جايىن سۇرادى. سونىمەن بىرگە مەملەكەتتىك وقۋ ورىندارى ۇ ب ت قورىتىندىسىن سۇراۋى دا مۇمكىن. ال قازاق- ورىس ۋنيۆەرسيتەتى ستۋدەنتتەرىنىڭ كەيبىرىندە ول جوق. سەبەبى رەسەيدىڭ وقۋ ورنىنا ءتۇسىپ، كەيىن اۋىسىپ كەلگەنى كەزدەسەدى اراسىندا. مۇنىڭ ءبارىن عىلىم جانە جوعارى ءبىلىم مينيسترلىگىنىڭ كوميسسياسى زەردەلەيدى.
ايتا كەتەيىك، ناۋرىز ايىندا قازاق- ورىس حالىقارالىق ۋنيۆەرسيتەتىنىڭ 350 ستۋدەنتى وقۋدان شىعارىلدى.
ۋنيۆەرسيتەت رەكتورىنىڭ 350 ستۋدەنتتى وقۋدان شىعارۋ تۋرالى بۇيرىعى زاڭسىز بولىپ شىقتى.
التىناي ساعىندىقوۆا
