الەمدە بار ۋراننىڭ 20 پايىزى ورتالىق ازيادا جاتىر - سامميت

استانا. KAZINFORM - پرەزيدەنت قاسىم-جومارت توقايەۆ تاۋەلسىزدىك سارايىنداعى «ورتالىق ازيا- قىتاي» سامميتىندە ورتالىق ازيا مەن قىتاي اراسىنداعى كولىك بايلانىسىنىڭ كەلەشەگىنە توقتالدى.

- قازاقستان قىتاي حالىق رەسپۋبليكاسى مەن ورتالىق ازيا ەلدەرى ءۇشىن وڭىردەگى ءوزارا كولىك بايلانىسىن دامىتۋداعى سەنىمدى ستراتەگيالىق سەرىكتەس بولىپ كەلدى جانە بولىپ قالا بەرەدى دە. ءبىز اۋقىمدى ينفراقۇرىلىمدىق جوبالاردى ىسكە اسىرىپ، جالپىعا ورتاق ەكونوميكالىق دامۋ مەن يگىلىك جولىنداعى ترانزيتتىك مۇمكىندىكتەرىمىزدى كەڭەيتۋ باعىتىندا ءارى قاراي بىرلەسىپ جۇمىس ىستەۋگە دايىنبىز، - دەدى پرەزيدەنت.

مەملەكەت باسشىسى ايماقتاعى ورنىقتىلىقتىڭ نەگىزگى فاكتورى ەنەرگەتيكا سالاسىنداعى ءوزارا ءىس-قيمىل بولىپ وتىرعانىنا توقتالدى.

- ورتالىق ازيادا ۋراننىڭ الەمدىك قورىنىڭ %20- ى، مۇنايدىڭ %17- دان استامى، تابيعي گازدىڭ %7- ى، سيرەك كەزدەسەتىن مەتالداردىڭ اۋقىمدى كەن ورىندارى شوعىرلانعان، - دەدى قاسىم-جومارت توقايەۆ.

قازاقستان قىتايمەن جاساندى ينتەللەكت، بيوتەحنولوگيا، كۆانتتىق ەسەپتەۋ سالالارىندا بىرلەسكەن جوبالاردى ىسكە اسىرۋعا مۇددەلى. - ءبىز قىتايلىق كومپانيالارعا قازاقستاننىڭ ءبىرقاتار وڭىرىندە جەل گەنەراتورلارى مەن ەنەرگيا جيناقتاۋ جۇيەلەرىن ءوندىرۋ، جەل جانە كۇن ەلەكتر ستانسيالارىن سالۋ باعىتىنداعى جوبالاردى ىسكە اسىرعانى ءۇشىن العىس ايتامىز. سيفرلىق ترانسفورماتسياداعى تەحنولوگيالىق ىنتىماقتاستىق پەن ىسكەرلىك بايلانىستاردى كۇشەيتۋ ءبىزدىڭ ستراتەگيالىق ارىپتەستىگىمىزدى جاڭا مازمۇنمەن تولىقتىرادى. بۇل قازاقستاننىڭ جانە بۇكىل ايماقتىڭ ەكونوميكالىق دامۋىنا قوسىمشا سەرپىن بەرەدى دەسەم قاتەلەسپەيمىن، - دەدى مەملەكەت باسشىسى.

قاسىم-جومارت توقايەۆ قىتايدىڭ جوعارى تەحنولوگياعا نەگىزدەلگەن عىلىمي جوبالارداعى الەۋەتى زور ەكەنىن اتاپ ءوتتى.

- قىتايدىڭ كوسموناۆتيكا مەن كۆانتتىق تەحنولوگيانى، 6G- ءدى دامىتۋداعى قوماقتى جەتىستىكتەرى ونىڭ جاھاندىق دەڭگەيدەگى تەحنولوگيالىق دەرجاۆا ەكەنىن راستادى. سوندىقتان قازاقستان جاساندى ينتەللەكت، بيوتەحنولوگيا، كۆانتتىق ەسەپتەۋلەر سالاسىنداعى بىرلەسكەن جوبالاردى ىسكە اسىرۋعا، سونداي-اق زەرتتەۋ ورتالىقتارى مەن تەحنوپاركتەر قۇرۋعا مۇددەلى، - دەدى پرەزيدەنت.

اۆتور

ەسىمجان ناقتىباي