الماتىداعى «باعاناشىل» بالالار ءۇيى قونايەۆقا كوشىرىلمەيتىن بولدى
استانا. KAZINFORM - ق ر پرەزيدەنتىنىڭ كەڭەسشىسى - باسپا ءسوز حاتشىسى رۋسلان جەلدىباي «باعاناشىل» بالالار ءۇيى الماتىدان قونايەۆقا كوشىرىلمەيتىنىن مالىمدەدى.
- «باعاناشىل» بالالار ءۇيىنىڭ تاربيەلەنۋشىلەرىن الماتىدان قونايەۆ قالاسىنا كوشىرۋگە بايلانىستى جاعدايمەن تانىسقان قاسىم-جومارت توقايەۆ الماتى قالاسىنىڭ اكىمى دارحان ساتىبالدىعا وقۋشىلاردىڭ وڭتۇستىك استانادا ءبىلىم الۋىن جالعاستىرۋ ءۇشىن بالالار ۇيىنە جوندەۋ جۇمىستارىن جۇرگىزۋدى جانە اتالعان نىساندى قالانىڭ بالانسىنا الۋدى تاپسىردى، - دەلىنگەن جازبادا.
باسپا ءسوز حاتشىسى مەملەكەت باسشىسىنىڭ تاپسىرماسىنا سايكەس، بالالار ءۇيى كوشىرىلمەيتىنىن حابارلاعان.
- اتالعان جاعدايعا بايلانىستى پرەزيدەنت اكىمشىلىگى قىزمەتتىك تەكسەرىس جۇرگىزەدى.
اتا-اناسىنىڭ قامقورلىعىنسىز قالعان بالالاردىڭ زاڭ شەڭبەرىندەگى بارلىق قۇقىعى تولىق ساقتالادى، - دەپ تولىقتىرعان رۋسلان جەلدىباي.
