قازاقپارات كۇنتىزبەسى: 28- تامىز
ەستە قالار وقيعالار
1985-جىلى قازاقستاننىڭ ءىرى كومىر وندىرەتىن كاسىپورنى - ەكىباستۇزدىڭ «شىعىس» رازرەزى پايدالانۋعا بەرىلدى.
1989 -جىلى قازاقستان رەسپۋبليكاسى ۇكىمەتىنىڭ شەشىمىمەن «ازىرەت سۇلتان مەملەكەتتىك قورىق-مۋزەيى» ۇيىمداستىرىلدى. قورىق مۋزەي تۇركىستان قالاسىندا كونە جىبەك جولى بويىندا قازىرگى شىمكەنت-قىزىلوردا اۆتوجولىنىڭ بويىندا، تاۋكە حان داڭعىلى مەن الماتى الاڭىنىڭ قيىلىسىندا ورنالاسقان.
قورىق مۇراجايدىڭ قۇرامىندا 100 دەن استام تاريحي-مادەني جانە ارحەولوگيالىق ەسكەرتكىش بار. ولاردىڭ جالپى قورعاۋ ايماعى 529,4 گەكتاردى الىپ جاتىر. ال كەسەنە ورنالاسقان قالانىڭ تاريحي ورتالىعىنىڭ قورعاۋ ايماعى 88,7 گەكتار.
وسى ايماقتا ورنالاسقان سەگىز تاريحي ەسكەرتكىش مۋزەيگە اينالىپ، حالىققا قىزمەت كورسەتۋدە.
«ازىرەت سۇلتان» مەملەكەتتىك قورىق مۋزەيى - قازاقستانداعى ەرەكشە ماڭىزى بار رۋحاني ورتالىق.
1991-جىلى قازاق س س ر مينيسترلەر كەڭەسى «قازاق س س ر عىلىم اكادەمياسىنىڭ ارحەولوگيا ينستيتۋتىن قۇرۋ تۋرالى» قاۋلى قابىلدادى.
وعان بەلگىلى اكادەميك، قازاق س س ر- ءى عىلىم اكادەمياسىنىڭ اكادەميگى الكەي مارعۇلاننىڭ ەسىمى بەرىلدى.
1992 -جىلى ق ر پرەزيدەنتى جارلىعىمەن قازاق ادەبيەتىنىڭ دامۋىنا قوسقان ەرەن ەڭبەكتەرى ءۇشىن جانە قوعامدىق قىزمەتتەرگە بەلسەنە ارالاسقاندارى ءۇشىن ءبىر توپ اقىن مەن جازۋشىعا «قازاقستان رەسپۋبليكاسىنىڭ حالىق جازۋشىسى» اتاعى بەرىلدى.
ولاردىڭ قاتارىندا ءانۋار ءالىمجانوۆ، تاحاۋي احتانوۆ، عافۋ قايىربەكوۆ، ءابىش كەكىلبايەۆ، شەرحان مۇرتازا، قالتاي مۇحامەدجانوۆ، ولجاس سۇلەيمەنوۆ، سافۋان شايمەردەنوۆ، يۆان شەگوليحين بار.
1998 -جىلى قازاقستاندا ءتۇسىرىلىپ جاتقان 250 سەريالى «توعىسقان تاعدىرلار» تەلەسەريالى ت م د جانە بالتىق جاعالاۋى ەلدەرى اراسىندا وتكەن فەستيۆالدە جۇلدەلى ءبىرىنشى ورىندى يەلەندى.
1999-جىلى قازاقستان رەسپۋبليكاسى مەملەكەتتىك جاستار ساياساتىنىڭ تۇجىرىمداماسى بەكىتىلدى. وندا مەملەكەتتىك جاستار جونىندەگى ساياساتى قوعام دامۋىنىڭ باستى ستراتەگيالىق رەسۋرستارىنىڭ ءبىرى رەتىندە نەگىزدەلدى ءارى ونىڭ نەگىزگى ماقساتتارى، پرينتسيپتەرى، باسقارۋ ورگاندارى ايقىندالدى.
2000-جىلى قازاقستان كومپارتياسى و ك جالپى وتىرىسى بولىپ، قازاقستان كوممۋنيستىك پارتياسى ورتالىق كوميتەتىنىڭ قىزمەتىن توقتاتۋ تۋرالى قاۋلى قابىلداندى.
2004-جىلى ەلباسى جارلىعىمەن قازاقستان رەسپۋبليكاسى تۇڭعىش پرەزيدەنتىنىڭ مۋزەيى قۇرىلدى. ول استانا قالاسىندا مەملەكەت باسشىسى ن. نازاربايەۆتىڭ بۇرىنعى رەزيدەنتسياسىندا ورنالاسقان.
2006 -جىلى قوستاناي وبلىسىنىڭ سارىكول اۋدانىندا اققوزى قاجى اتىنداعى مەشىت اشىلدى. اققوزى قاجى ابايدىڭ سەرىكتەستەرىنىڭ ءبىرى بولعان. ول وسىدان 100 جىلدان استام بۇرىن قازىرگى سارىكول اۋدانى اۋماعىندا ۋاعىز جانە تاربيە جۇمىستارىن جۇرگىزگەن تۇلعا.
2012 -جىلى سەمەي قالاسى پولكوۆنيچي ارالىندا سەمەي يادرولىق سىناق پوليگونى جابىلۋىنىڭ 21 جىلدىعىنا ارنالعان 13-مىڭىنشى ميتينگ ءوتتى.
2012 -جىلى نورۆەگيانىڭ فروگن قالاسىنىڭ مەرى تۋرە ۆەستبي جانە «پەرسپەكتيۆا 2020» حالىقارالىق قوزعالىسىنىڭ ديرەكتورى اارون توۆيش استانا اكىمى يمانعالي تاسماعامبەتوۆكە «مەرلەر بەيبىتشىلىك ءۇشىن» ۇيىمىنىڭ سەرتيفيكاتىن تابىس ەتتى. قازاقستان ەلورداسى وسى ۇيىمعا قاتىساتىن 110-استانا بولدى.
2014-جىلى قاراعاندىدا جۇلدىز اللەياسىندا قازاقستان رەسپۋبليكاسىنىڭ حالىق ءارتىسى ەسكەندىر حاسانعاليەۆتىڭ قۇرمەتىنە ەسكەرتكىش بەلگى اشىلدى.
2015 -جىلى ق ر ۇلتتىق بانكى «قازاقستان قالالارى» سەرياسىنىڭ نەيزيلبەر قۇيماسىنان سوعىلعان، قۇنى 50 تەڭگەلىك «استانا»، «الماتى»، «كوكشەتاۋ»، «شىمكەنت» ەستەلىك مونەتالارىن اينالىمعا شىعاردى.
ديامەترى - 23 م م، ماسساسى - 4,71 گرام. ءاربىر اتالىمنىڭ تارالىمى 50 مىڭ دانا. اتالىمداردىڭ ءارقايسىسىنىڭ مىڭ داناسى جاقسارتىلعان ساپامەن شىعارىلىپ، ساتۋ ءۇشىن ارنايى پلاستيكالىق تەرموۆاكۋۋم ورامدارمەن ورالدى.
2018 -جىلى سولتۇستىك قازاقستان وبلىستىق مۋزەيىنە ەل ىشىندە سەگىز سەرى اتانعان قازاقتىڭ ايگىلى اقىنى، ءانشىسى ءارى كومپوزيتورى مۇحامەدحانافيا باحرام ۇلى شاقشاقوۆتىڭ شەكپەنى سىيعا تارتىلدى. تۇيە جۇنىنەن تىگىلگەن شەكپەن بويى 2 مەتر كەلەتىن ادامعا ارنالعان، قازىرگى ستاندارت بويىنشا 56-كيىم ولشەمىنە ساي. 172 جىلدىق تاريحى بار شەكپەندى مۋزەيگە قاراعاندى وبلىسىنىڭ تۇرعىندارى - ەسىمبەك مۇقانجاروۆ پەن ونىڭ جۇبايى باقىتجامال اجىبەك قىزى تابىستادى.
2018 -جىلى قازاقستاندا «جەر بەتىندەگى ءومىر ءۇشىن» پوشتا ماركاسى شىعارىلدى. ماركا اتوم جوباسىنا ارنالدى. اتالعان حالىقارالىق كومپانيا الەم ەلدەرىنىڭ ۇكىمەتتەرىن يادرولىق سىناقتاردى توقتاتۋعا شاقىرادى. اتوم جوباسىنىڭ «جەر بەتىندەگى ءومىر ءۇشىن» پوشتالىق ماركاسى وفسەتتىك باسپامەن كوك جانە سارى ءتۇستى بوياۋدا جاسالعان. پەرفوراتسياسى يرەك ءتارىزدى، تيراجى - 20000 دانا.