وليمپيادا-2018: سەرگەي تكاچەنكو ىرىكتەۋ كەزەڭىنەن ءوتتى - فوتو

پحەنچحان. قازاقپارات - بۇگىن وڭتۇستىك كورەيانىڭ پحەنچحان قالاسىندا ءوتىپ جاتقان XXⅢ قىسقى وليمپيادا ويىندارىندا ترامپليننەن شاڭعىمەن سەكىرۋ سايىسىندا باق سىناعان قازاقستاندىق سەرگەي تكاچەنكو العاشقى ىرىكتەۋدەن سۇرىنبەي ءوتتى، دەپ حابارلايدى قازاقپارات ءتىلشىسى.

ۇلكەن ترامپليننەن سەكىرۋ سايىسىندا سەرگەي تكاچەنكو 70,9 ۇپاي جينادى. ەندى ول ەرتەڭ، ياعني 17- اقپاندا ەكىنشى ىرىكتەۋ سايىسىندا سىنعا تۇسەدى. ەگەر، ەرتەڭگى ىرىكتەۋدەن ۇزدىكتەر اتارىنا قوسىلىپ جاتسا، ول مەدال ءۇشىن سىنعا تۇسەتىن بولادى.

ەستەرىڭىزگە سالا كەتەيىك، وسىعان دەيىن سەرگەي تكاچەنكو 90 مەتر بيىكتىكتەن شاڭعىمەن ترامپليننەن سەكىرۋدىڭ ىرىكتەۋ كەزەڭىندە 83.7 ۇپاي جيناپ، 51- ورىنعا قول جەتكىزگەن ەدى. بۇل كورسەتكىش ونىڭ فينالدىق كەزەڭدە ونەر كورسەتۋىنە جەتكىلىكسىز بولدى.

شىعىس قازاقستان وبلىسىنىڭ 18 جاستاعى سپورتشىسى بيىل وليمپيادا ويىندارىنا ءبىرىنشى رەت قاتىسىپ وتىر.