ىشكى ىستەر ورگاندارى جانە اسكەري قىزمەتشىلەرگە سىنىپتىق بىلىكتىلىك بەرۋ ءتارتىبى وزگەرەدى

استانا. KAZINFORM — مينيسترلىك ىشكى ىستەر ورگاندارىنىڭ قىزمەتكەرلەرى مەن اسكەري قىزمەتشىلەرىنە سىنىپتىق بىلىكتىلىك بەرۋ، ارتتىرۋ، راستاۋ، ساقتاۋ، تومەندەتۋ جانە الىپ تاستاۋ قاعيداسىنا وزگەرىستەر ەنگىزدى.

قۇجات جوباسى «اشىق ن ق ا» پورتالىندا جاريالاندى. اتاپ ايتقاندا، 2025 -جىلعى 30 -ماۋسىمداعى «قازاقستان رەسپۋبليكاسىنىڭ كەيبىر زاڭنامالىق اكتىلەرىنە قۇقىق قورعاۋ قىزمەتىن جەتىلدىرۋ، قۇقىق قورعاۋ، ارناۋلى مەملەكەتتىك ورگاندار، ازاماتتىق قورعاۋ ورگاندارى قىزمەتكەرلەرىن جانە اسكەري قىزمەتشىلەردى تۇرعىن ۇيمەن قامتاماسىز ەتۋ مەن الەۋمەتتىك قورعاۋ ماسەلەسى بويىنشا وزگەرىستەر مەن تولىقتىرۋلار ەنگىزۋ، سونداي-اق ىشكى ىستەر ورگاندارى قىزمەتىنىڭ ارتىق زاڭنامالىق رەتتەلۋىن الىپ تاستاۋ تۋرالى» زاڭعا سايكەس «قازاقستان رەسپۋبليكاسىنىڭ ىشكى ىستەر ورگاندارى تۋرالى» زاڭىندا «جەلىلىك» اتاۋى «كولىكپەن» دەپ وزگەرتىلگەن.

وسىعان بايلانىستى جوبادا اتاۋلار مەن تەرمينولوگيا زاڭناماعا سايكەستەندىرىلىپ جاتىر.

سونىمەن قاتار، كەلەسى باعىتتار بويىنشا وزگەرىستەر مەن تولىقتىرۋلار ەنگىزىلەدى:

— ىشكى ىستەر ورگاندارى قىزمەتكەرلەرى مەن اسكەري قىزمەتشىلەرىنە سىنىپتىق بىلىكتىلىكتى تومەندەتۋ جانە الىپ تاستاۋ ءتارتىبى، سىنىپتىق بىلىكتىلىكتى انىقتاۋ كەزىندەگى قىزمەت ءوتىلىن ەسەپتەۋ ءتارتىبى؛

— ۇلتتىق ۇلان اسكەري قىزمەتشىلەرىنىڭ سىنىپتىق بىلىكتىلىگىن ايقىنداۋ كەزىندە ولاردىڭ قىزمەت ءوتىلىن ەسەپتەۋ ءتارتىبى؛

— ۆەدومستۆولىق اسكەري وقۋ ورىندارىندا جانە حالىقارالىق كەلىسىمدەر اياسىندا شەتەلدە كۇندىزگى وقۋ نىسانى بويىنشا ءبىلىم الىپ جاتقان ۇلتتىق ۇلان اسكەري قىزمەتشىلەرىنىڭ، سونداي-اق كراپ بەرەتى مەن كراپ ءتۇستى تەلنياشكا كيۋگە قۇقىق بەرەتىن بىلىكتىلىك سىناعىنان ءساتتى وتكەن اسكەري قىزمەتشىلەردىڭ سىنىپتىق بىلىكتىلىگىن ايقىنداۋ ءتارتىبى؛

— ۇلتتىق ۇلاننىڭ اۆياتسيالىق پەرسونالىنا سىنىپتىق بىلىكتىلىكتى ايقىنداۋ ءتارتىبىن الىپ تاستاۋ (اتالعان وكىلەتتىلىكتىڭ قر قورعانىس مينيسترلىگىنە بەرىلۋىنە بايلانىستى).

قۇجات ىشكى ىستەر ورگاندارى قىزمەتكەرلەرى مەن اسكەري قىزمەتشىلەرىنىڭ كاسىبي دەڭگەيىن جان-جاقتى باعالاۋعا، ولاردى قوسىمشا ماتەريالدىق ىنتالاندىرۋعا، سونداي- اق كادر تارتۋ مۇمكىندىگىن كەڭەيتۋگە باعىتتالعان.

قۇجات جوباسى بيىل 12 -تامىزعا دەيىن قوعامدىق تالقىلاۋعا ۇسىنىلىپ وتىر.

وتكەن جىلى اتتەستاتسيادان وتپەگەن ىشكى ىستەر ورگاندارى قىزمەتكەرلەرىن جۇمىستان بوساتۋ ماسەلەسىن كوتەرگەن ەدىك.

اۆتور

داۋلەت ىزتىلەۋ