ىشكى ىستەر ءمينيسترى پەدوفيلدەردى ءومىر بويى باقىلاۋعا الماقشى

استانا. KAZINFORM - ىشكى ىستەر ءمينيسترىنىڭ ورىنباسارى پەدوفيلدەردى جازاسىن وتەپ شىققاننان كەيىن باقىلاۋ مەرزىمىن «شەكسىز كەزەڭگە» دەيىن ۇزارتپاقشى.

بۇل تۋرالى ءمينيستردىڭ ورىنباسارى يگور لەپەحا ماجىلىستە وتكەن وتىرىستان كەيىن ءمالىم ەتتى.

جۋرناليستەردىڭ سۇراعىنا جاۋاپ بەرگەن يگور لەپەحا قۇقىق بۇزۋدىڭ الدىن الۋ ءۇشىن بۇرىن ءىستى بولعاندار مەن ارەكەتى كۇماندى ازاماتتاردىڭ سىرتىنان باقىلاۋ شاراسىن كۇشەيتۋ جوسپارلانىپ وتىرعانىن ايتتى. ول بۇل جاڭاشىلدىقتىڭ قالاي ىسكە اسۋى مۇمكىن ەكەنىن پەدوفيلدەردىڭ مىسالىمەن ءتۇسىندىردى.

- قازىر پەدوفيل جازاسىن وتەپ شىققاننان كەيىن 8 جىل بويى ءبىزدىڭ باقىلاۋىمىزدا بولادى. ەندى سول مەرزىمدى شەكسىز كەزەڭگە دەيىن ۇزارتۋ ماسەلەسىن پىسىقتاپ جاتىرمىز، - دەدى ءمينيستردىڭ ورىنباسارى.

ب ا ق وكىلدەرى «شەكسىز كەزەڭ» دەگەن ۇعىم ءومىر بويىنا دەگەندى بىلدىرە مە دەپ سۇرادى.

- ءبىز سولاي بولسا دەپ وتىرمىز. ءومىر بويىنا ەسەپتە تۇرعانىن قالايمىز. ول باقىلاۋدىڭ ىشىنە بەلگىلى ءبىر شەكتەۋلەر دە كىرۋى مۇمكىن. مىسالى، وعان مەكتەپكە نەمەسە بالاباقشا ماڭىنا جاقىنداۋعا تىيىم سالۋعا بولادى. ونداي شەكتەۋدى سوت بەلگىلەيدى. سوت شەشىمىن بۇزسا، ءبىز شارا قولدانامىز. قازىر مۇنداي شارالار 8 جىل كولەمىندە عانا قولدانىلادى. ەندى سونىڭ مەرزىمىن الدەقايدا ۇزارتقىمىز كەلەدى، - دەدى ءى ءى م وكىلى.

بۇعان دەيىن الماتىدا كامەلەتكە تولماعان قىزبەن جىنىستىق قاتىناسقا ءتۇستى دەگەن كۇدىكتى ۇستالعانىن جازعانبىز.