ونەر جانە سپورت سالاسىنداعى ۇزدىك جوعارى وقۋ ورنى اتالدى
استانا. KAZINFORM - قازاق ۇلتتىق حورەوگرافيا اكادەمياسى ونەر جانە سپورت سالاسىنداعى ۇزدىك جوعارى وقۋ ورنى اتاندى، دەپ حابارلايدى مادەنيەت جانە اقپارات مينيسترلىگىنىڭ باسپا ءسوز قىزمەتى.
- 2025-جىلعى ۇلتتىق رەيتينگ ناتيجەسىندە ونەر جانە سپورت سالاسى بويىنشا ءبىلىم بەرەتىن جوعارى وقۋ ورىندارى اراسىندا قازاق ۇلتتىق حورەوگرافيا اكادەمياسى ۇزدىك دەپ تانىلدى. بۇل - ەلدەگى جوعارى ءبىلىم بەرۋ سالاسىنداعى بەدەلدى كورسەتكىشتەردىڭ ءبىرى. رەيتينگ جوعارى وقۋ ورىندارىنىڭ اكادەميالىق بەدەلى، ءبىلىم بەرۋ ساپاسى، عىلىمي-زەرتتەۋ قىزمەتى جانە تۇلەكتەردىڭ ەڭبەك نارىعىنداعى سۇرانىسى سياقتى نەگىزگى كريتەرييلەر بويىنشا جاسالادى. بۇل - اكادەميا ۇجىمى مەن ءبىلىم الۋشىلارىنىڭ قاجىرلى ەڭبەگى مەن كاسىبي شەبەرلىگىنىڭ ناتيجەسى. سوڭعى جىلدارى اكادەميا ۇلتتىق جانە حالىقارالىق دەڭگەيدە ءبىرقاتار شىعارماشىلىق جانە عىلىمي جوبالاردى تابىستى جۇزەگە اسىرىپ، زاماناۋي ءبىلىم بەرۋ باعدارلامالارىن ەنگىزۋ ارقىلى تۇراقتى تۇردە كوشباسشى مارتەبەسىنە يە، - دەلىنگەن مينيسترلىك حابارلاماسىندا.
اكادەميا ءبىلىم الۋشىلارى بەدەلدى حالىقارالىق بايقاۋلاردا جوعارى ناتيجە كورسەتىپ، جۇلدەلى ورىنداردى ەنشىلەپ ءجۇر. وقۋ ورنىندا تەك قازاقستاننان عانا ەمەس، الەمنىڭ تۇكپىر-تۇكپىرىنەن كەلگەن بالالار ءبىلىم الىپ، كاسىبي تۇرعىدا شىڭدالۋدا. شاكىرتتەر ءۇشىن جان-جاقتى دامۋعا جاعداي جاسالىپ، حورەوگرافيا جانە ونەر سالاسىنداعى الەمدىك دەڭگەيدەگى ماماندارمەن تۇراقتى تۇردە شەبەرلىك ساباقتارى ۇيىمداستىرىلادى، سونداي-اق شەتەلدىڭ ۇزدىك ۋنيۆەرسيتەتتەرىندە اكادەميالىق ۇتقىرلىق باعدارلاماسى ارقىلى بىلىمدەرىن جەتىلدىرۋ مۇمكىندىگى بار.
مەملەكەت باسشىسى قاسىم-جومارت توقايەۆتىڭ باستاماسىمەن كرەاتيۆتى ارت-يندۋستريا سالاسى ەلىمىزدە قارقىندى دامىپ كەلەدى. وسى ورايدا قازاق ۇلتتىق حورەوگرافيا اكادەمياسى 2025-2026 وقۋ جىلىنا جاڭادان اشىلعان «كرەاتيۆتى ارت-يندۋستريا» ءبىلىم بەرۋ باعدارلاماسى بويىنشا قۇجات قابىلداۋدى باستادى. اتالعان باعدارلاما اياسىندا ەلىمىزدىڭ وسى سالاداعى جەتەكشى ماماندارى ءبىلىم الۋشىلارعا ءدارىس بەرەدى.
اكادەميانىڭ باستى ماقساتى - حورەوگرافيا، ونەرتانۋ، ارت-مەنەدجمەنت جانە كرەاتيۆتى ارت-يندۋستريا باعىتتارى بويىنشا بىلىكتى كادرلار دايارلاپ، وتاندىق مادەنيەت پەن ونەر سالاسىنا جاڭا سەرپىن بەرەتىن كاسىبي مامانداردىڭ جاڭا بۋىنىن قالىپتاستىرۋ.
بۇگىندە اكادەميا - تەك قازاقستاندا عانا ەمەس، بۇكىل ورتالىق ازيادا حورەوگرافيا ونەرى سالاسىنداعى جەتەكشى جوعارى وقۋ ورنى.
بۇدان بۇرىن وتاندىق ونەرپاز «لا سكالا» تەاترى اكادەمياسىندا تاعىلىمدامادان وتەتىنى حابارلاندى.