- جولداعى قاۋىپسىزدىك ماسەلەسى مينيسترلىكتىڭ ەرەكشە باقىلاۋىندا. بۇل ماسەلە بيىلعى جىلى قۇقىق بۇزۋدىڭ الدىن الۋ جونىندەگى ۆەدومستۆوارالىق كوميسسيانىڭ وتىرىسىندا قارالدى. كەشەندى ۇيىمداستىرۋشىلىق جانە زاڭنامالىق شارالار قابىلداندى. ناتيجەسىندە بيىل جول اپاتى بويىنشا بارلىق كورسەتكىشتەر تومەندەپ جاتىر: جول- كولىك وقيعالارى 5 پايىزعا، قازا تاپقاندار 15 پايىزعا، جاراقات العاندار 6 پايىزعا ازايدى. ءبىراق بۇل ناتيجەمەن شەكتەلىپ، ءوزىمىزدى جۇباتۋعا بولمايدى. ءاربىر ساننىڭ ارتىندا ادام ءومىرى مەن دەنساۋلىعى تۇر. سوندىقتان ناقتى جۇمىستاردى جالعاستىرىپ جاتىرمىز،- دەدى مينيستر.
ونىڭ اتاپ وتۋىنشە، كولىك تارتىبىنە باقىلاۋ كۇشەيتىلدى. تەحنيكالىق شەشىمدەر بەلسەندى قولدانىلىپ جاتىر. وسى سالاداعى بارلىق سيفرلىق سەرۆيستەر «تور» پلاتفورماسىنا بىرىكتىرىلدى. ونىڭ ناتيجەسى مىناداي:
1. جاساندى ينتەللەكتتى قولدانۋ ارقىلى كولىكتەردى باقىلاۋ جۇرگىزىلىپ جاتىر. 8 ساعاتتان ارتىق رولدە وتىرعان ادامدار، سونداي-اق ۇرلانعان اۆتوكولىكتەر انىقتالۋ ۇستىندە؛
2. «قورعاۋ» جۇيەسى ارقىلى ىزدەۋدە جۇرگەن، جالعان ءنومىر تاعىپ العان كولىكتەردى جانە ورەسكەل بۇزۋشىلار انىقتالادى؛
3. جول ەرەجەسىنىڭ بۇزۋشىلىقتارىن اۆتوماتتى تۇردە انىقتايتىن جۇيەلەر دامىتىپ جاتىر. ولاردىڭ سانى 28 مىڭعا 32 مىڭعا جەتكىزىلدى؛
4. رەسپۋبليكالىق تراسسالاردا ورتاشا جىلدامدىقتى باقىلاۋ جۇيەسى قولدانىلادى. ءدال وسى جۇيە ورناتىلعان ۋچاسكەلەردە جول-كولىك وقيعالارى سانى 10 پايىزعا، قازا تاپقاندار 33 پايىزعا، جاراقات العاندار 12 پايىزعا ازايدى
- بۇگىندە بۇل جۇيە ۇزىندىعى 2800 شاقىرىمدى قۇرايتىن 12 ۋچاسكەدە بار. جىل سوڭىنا دەيىن كولىك مينيسترلىگىمەن بىرگە تاعى 16 ۋچاسكەدە ورناتامىز. وسىلايشا، ورتاشا جىلدامدىقتى ولشەيتىن قۇرالدار بارلىعى 5600 شاقىرىم بولاتىن 28 ۋچاسكەدە جىل اياعىنا دەيىن ورناتىلاتىن بولادى. كەلەسى جىلدان باستاپ بۇل جۇمىستى ءارى جالعاستىرامىز،-دەدى ەرجان سادەنوۆ.
ايتا كەتەيىك، وتىرىستا جول قوزعالىسى قاۋىپسىزدىگىن قامتاماسىز ەتۋ ماسەلەسى قارالىپ، جىلۋ بەرۋ ماۋسىمىنا دايىندىق بارىسى پىسىقتالىپ جاتىر.