وفشورلىق ايماقتاردان كاپيتالدى قايتارۋ ءۇشىن راقىمشىلىق جاريالانا ما - ۇكىمەت باسشىسىنىڭ جاۋابى

استانا. KAZINFORM - پرەمەر- مينيستر ولجاس بەكتەنوۆ ءماجىلىس دەپۋتاتتارىنىڭ وفشورلىق ايماقتاردان جانە شەتەلدىك يۋريسديكتسيالاردان كاپيتالدى قايتارۋ ءۇشىن راقىمشىلىق جاريالاۋعا قاتىستى ساۋالىنا جاۋاپ بەردى.

- 2001 2014 -جىلدار كەزەڭىندە قازاقستاندا كاپيتالدى جاريا ەتۋدىڭ ءۇش كەزەڭى وتكىزىلدى. ونىڭ قورىتىندىسى بويىنشا بيۋدجەتكە 6,674 تريلليون تەڭگە، ونىڭ ىشىندە ءبىرىنشى كەزەڭدە - 70 ميلليارد تەڭگە، ەكىنشى كەزەڭدە - 904 ميلليارد تەڭگە جانە ءۇشىنشى كەزەڭدە 5,7 تريلليون تەڭگە ءتۇستى. وفشورلىق ايماقتاردان جانە باسقا دا شەتەلدىك يۋريسديكتسيالاردان كاپيتالدى قايتارۋ ءۇشىن راقىمشىلىق جاساۋ تۋرالى ۇسىنىس ەلدىڭ قارجىلىق ورنىقتىلىعىن نىعايتۋ جانە ينۆەستيتسيالىق الەۋەتىن ارتتىرۋ جونىندەگى ىقتيمال قۇرالداردىڭ ءبىرى سانالادى، - دەدى پرەمەر- مينيستر جاۋابىندا.

سونىمەن بىرگە ۇكىمەت باسشىسى بۇل ماسەلە كەشەندى ءارى سالماقتى ءتاسىلدى تالاپ ەتەتىندىگىنە نازار اۋدارتادى.

- راقىمشىلىق جاساۋ كەزىندە جاسالعان قىلمىستىق جازالاناتىن ءىس-ارەكەتتەردىڭ، اسىرەسە، ەگەر ولار ۇيىمداسقان قىلمىستىق توپتىڭ قۇرامىندا جاسالعان بولسا نە تەرروريستىك ارەكەتتەرمەن، ەسىرتكى قىلمىستارىمەن جانە باسقا دا اۋىر قۇقىق بۇزۋشىلىقتارمەن بايلانىستى بولسا، اۋىرلىعىن ەسكەرۋ قاجەت. سونىمەن قاتار تورەلىك داۋلاردىڭ تاۋەكەلدەرىن، حالىقارالىق كەلىسىمدەردىڭ ساقتالۋىن، سونداي-اق قايتارىلۋعا جاتاتىن اكتيۆتەر ورنالاسقان ەلدەردىڭ ۇلتتىق زاڭناماسىن ەسكەرە وتىرىپ، ىقتيمال قارجىلىق شىعىنداردى ەسكەرۋ كەرەك. ايتىلعاندى ەسكەرە وتىرىپ، وفشورلىق ايماقتاردان جانە شەتەلدىك يۋريسديكتسيالاردان كاپيتالدى قايتارۋ ءۇشىن راقىمشىلىق جاريالاۋ تۋرالى ماسەلە مۇقيات ءارى جان- جاقتى تالداۋدى تالاپ ەتەدى، - دەدى ولجاس بەكتەنوۆ.

2026 -جىلعى 1- قاڭتاردان باستاپ باقىلاناتىن شەتەلدىك كومپانيالارعا سالىق سالۋ قاعيدالارىن قوسا العاندا، قوسىمشا سالىقتىق تەتىكتەردى ەنگىزۋ جوسپارلانىپ وتىر.