بۇل تۋرالى ق ر باس پروكۋراتۋراسى اكتيۆتەردى قايتارۋ قىزمەتىنىڭ باسشىسى نۇرداۋلەت سۇيىندىكوۆ «Bizdin orta» پودكاستىندا ايتتى.
ونىڭ ايتۋىنشا، زاڭدا مۇنداي جاعدايلار ارنايى قاراستىرىلعان. مۇلىك باسقا ادامنىڭ اتىنا راسىمدەلگەن كەزدە «بايلانىستى تۇلعالار» ۇعىمى قولدانىلادى. وعان جاقىن تۋىستارمەن قاتار نومينالدى تۇلعالار، بيزنەس- سەرىكتەستەر جانە باسقا دا بايلانىستى سۋبەكتىلەر كىرۋى مۇمكىن.
- بۇل تەتىكتىڭ ماقساتى - اكتيۆتىڭ ناقتى باقىلاۋشىسى مەن زاڭدى يەسىنىڭ اراسىنداعى بايلانىستى انىقتاۋ. ياعني قىمبات مۇلىكتى باسقا ادامنىڭ اتىنا راسىمدەۋ ونىڭ اكتيۆتەردى قايتارۋ جۇيەسىنەن اۆتوماتتى تۇردە تىس قالاتىنىن بىلدىرمەيدى. ءبىر ادامنىڭ اينالاسىنداعى بىرنەشە كومپانيانى تەكسەرەمىز، - دەدى نۇرداۋلەت سۇيىندىكوۆ.
سپيكەر اتاپ وتكەندەي، جينالعان اقپارات نەگىزىندە تۇپكىلىكتى شەشىمدى پروكۋراتۋرانىڭ ءوزى عانا قابىلدامايدى. بارلىق ماتەريال اكتيۆتەردى مەملەكەتكە قايتارۋ ماسەلەلەرى جونىندەگى ارنايى كوميسسيانىڭ قاراۋىنا شىعارىلادى.
كوميسسيانى پرەمەر-مينيستر باسقارادى. ونىڭ قۇرامىنا قۇرىلتاي دەپۋتاتتارى، قوعامدىق ۇيىمداردىڭ وكىلدەرى، مەملەكەتتىك ورگان باسشىلارى جانە باسقا دا تۇلعالار كىرەدى. جالپى قۇرامىندا 20 عا جۋىق ادام بار.
- ءدال وسى قۇرام كۇدىككە الىنعان ادامدى ارنايى تىزىلىمگە قوسۋ نە قوسپاۋ تۋرالى شەشىم شىعارادى. ەگەر ادام ارنايى تىزىلىمگە قوسىلسا، ءارى قاراي اكتيۆتەردى قايتارۋ بويىنشا ەگجەي- تەگجەيلى جۇمىس باستالادى، - دەدى نۇرداۋلەت سۇيىندىكوۆ.
ايتا كەتەيىك، قازاقستاندا زاڭسىز يەمدەنىلگەن اكتيۆتەردى مەملەكەتكە قايتارۋ تەتىگى 2023 -جىلعى 12-شىلدەدە قابىلدانعان ارنايى زاڭمەن رەتتەلەدى.
اكتيۆتەردى قايتارۋ تەتىگى، ەڭ الدىمەن، جوعارى مەملەكەتتىك لاۋازىم اتقارعان نەمەسە اتقاراتىن تۇلعالارعا، كۆازيمەملەكەتتىك سەكتور سۋبەكتىلەرىنە جانە ولارمەن ۇلەستەس تۇلعالارعا قاتىستى قولدانىلادى.