ءبىرىنشى مىندەت - بيۋدجەت قاراجاتىنىڭ ءتيىمدى جۇمسالۋىن قامتاماسىز ەتۋ.
- بولىنگەن قارجى مەملەكەتتىڭ قورعانىس قابىلەتىن ارتتىرىپ، بارىنشا ناتيجە بەرۋگە ءتيىس. ماقساتسىز شىعىنعا، تالان-تاراجعا جول بەرىلمەيدى. مۇنداي ارەكەتى اشكەرەلەنگەندەردىڭ بىردە-بىرەۋى جاۋاپكەرشىلىكتەن قۇتىلمايدى، - دەدى قاسىم- جومارت توقايەۆ.
ەكىنشى مىندەت - قازىرگى زامانعى قاۋىپ-قاتەرلەردى ەسكەرە وتىرىپ، قارۋلى كۇشتەردى رەفورمالاۋ. قاۋىپسىزدىك كەڭەسىنىڭ اپپاراتى قورعانىس مينيسترلىگىمەن بىرلەسىپ، ون كۇن ىشىندە اسكەردى رەفورمالاۋ جونىندە ارنايى جوسپار ازىرلەۋگە ءتيىس. سونداي-اق مەملەكەت باسشىسى مامانداردى ىرىكتەۋ مەن باعالاۋدىڭ اشىق كريتەريلەرىن ەنگىزگەن ءجون دەپ سانايدى.
- اسكەري لاۋازىمدارعا باسشىنىڭ «ءوز ادامدارى» ەمەس، تاجىريبەلى جانە بىلىكتى كادرلار ۇسىنىلۋعا ءتيىس، - دەدى پرەزيدەنت.
ءۇشىنشى مىندەت — اسكەر قاتارىنداعى يدەولوگيا جانە تاربيە جۇمىسىن كۇشەيتۋ. بۇل ءىس كونستيتۋتسيانىڭ باستى قاعيداتتارى مەن قۇندىلىقتارىنا سايكەس جۇرگىزىلۋگە ءتيىس. سونداي-اق الەمنىڭ اسكەري تاريحى، ۇلتىمىز بەن جاھان ەلدەرىنىڭ وزىق رۋحاني- مادەني جەتىستىكتەرى كەڭىنەن دارىپتەلۋى كەرەك. ارميا كاسىبي دايارلىق پەن ءبىلىمدى شىڭداپ، وتانشىلدىققا باۋليتىن مەكتەپ بولعانى ءجون. وندا ءاربىر اسكەري قىزمەتشىنىڭ ءومىرى مەن قاۋىپسىزدىگى بارىنەن جوعارى تۇرۋى قاجەت.
-وتان قورعاۋ - ءار ازاماتتىڭ قاستەرلى بورىشى، قاسيەتتى پارىزى. اسكەري قىزمەتكە ءومىرىن ارناعان ءار ازامات مەملەكەتتىڭ قامقورلىعى مەن قولداۋىن ايقىن سەزىنۋى كەرەك. اسكەر - قورقىنىش پەن ۇرەيگە تولى جەر بولماۋى كەرەك. اسكەر — جاس ساربازداردى، ەلىمىزدىڭ ناعىز وتانشىل ازاماتتارىن تاربيەلەۋدىڭ بۇرىنعى جانە قازىرگى وزىق ۇلگىلەرى ۇشتاسقان كاسىبي دەڭگەيى جوعارى ينستيتۋت بولۋعا ءتيىس، — دەدى مەملەكەت باسشىسى.
پرەزيدەنتتىڭ پايىمداۋىنشا، ب ا ق اسكەري قىزمەت، اسىرەسە، باسشىلىقتىڭ جوعارى باعاسى مەن قولداۋىنا يە بولعان اسكەري قىزمەتشىلەر تۋرالى وبەكتيۆتى اقپارات تاراتقانى ءجون. جوعارعى باس قولباسشى ناقتى ءارى تۇسىنىكتى، كەزەڭ-كەزەڭىمەن رەفورمالاۋ جوسپارىن ازىرلەۋ ماڭىزدى ەكەنىنە نازار اۋداردى. ونى كولەمدى تۇجىرىمداماعا نەمەسە جول كارتاسىنا اينالدىرۋعا بولمايدى. رەفورما جوسپارى قازان ايىنىڭ ەكىنشى جارتىسىندا وتەتىن قاۋىپسىزدىك كەڭەسىنىڭ وتىرىسىندا قارالادى. پرەزيدەنت قاۋىپسىزدىك كەڭەسىنىڭ اپپاراتىنا اسكەردى رەفورمالاۋ ۇدەرىسىن ۇيلەستىرۋدى تاپسىردى.
ەسكە سالايىق، بۇعان دەيىن پرەزيدەنت داۋرەن قوسانوۆتى قورعانىس ءمينيسترى لاۋازىمىنان بوساتقانىن حابارلاعان ەدىك.
ونىڭ ورنىنا ايدوس مىرزاحمەتوۆ قورعانىس ءمينيسترى بولىپ تاعايىندالدى.