تاۋەلسىزدىك جىلدارى پاۆلودارعا 37 مىڭنان استام قانداسىمىز كوشىپ كەلگەن

پاۆلودار. KAZINFORM - ەلىمىز ەگەمەندىك العان جىلدان بەرى پاۆلودار وبلىسىنىڭ اۋماعىنا 37 مىڭنان استام قانداسىمىز قايتىپ ورالعان. ولار مونعوليا، رەسەي، تۇرىكمەنستان، وزبەكستان جانە باسقا مەملەكەتتەردەن كوشىپ كەلگەن.

پاۆلودار وبلىسىنا كوشىپ كەلىپ جاتقان قانداستارىمىزدىڭ سانى ەسەلەنە تۇسۋدە. بىلتىر كۆوتا بويىنشا 972 ادام قونىس تەپسە، جىل باسىنان 907 ادام جاڭادان قانداس مارتەبەسىن الدى.

- پاۆلودار وڭىرىنە تاۋەلسىزدىك جىلدارى 37 مىڭنان اسا قانداسىمىز ورالدى. جىل باسىنان وڭىرىمىزگە 907 قانداس كوشىپ كەلىپ، قانداس مارتەبەسىنە يە بولدى. قانداستارىمىزدىڭ باسىم بولىگى مونعوليا، وزبەكستان، تۇركىمەنستان، رەسەي جانە تاعى باسقا ەلدەردەن كەلدى. پاۆلودار وبلىسى قر ۇكىمەتىنىڭ قاۋلىسىمەن بەكىتىلگەن قابىلداۋ ءوڭىرى بولىپ تابىلادى. 2023 -جىلى كوشىپ كەلىپ، كۆوتاعا ەنگەن قانداستارىمىزدىڭ سانى 972 ادامدى قۇراسا، بيىلعى قانداستاردى قابىلداۋ كۆوتاسى 1252 ادامعا ۇلعايدى. كازىرگى تاڭدا كۆوتاعا ەنگەن قانداستارىمىزدىڭ سانى 989 ادامدى (223 وتباسى) قۇراپ وتىر، - دەپ جاۋاپ بەردى Kazinform ءتىلشىسىنىڭ ساۋالىنا پاۆلودار وبلىسىنىڭ جۇمىسپەن قامتۋدى ۇيلەستىرۋ جانە الەۋمەتتىك باعدارلامالار باسقارماسىنىڭ باس مامانى داستان ۆاحابوۆ.

وڭىرلىك كۆوتاعا ەنگەن قانداستارىمىز اراسىندا 244 ادام تۇراقتى جۇمىس ورىندارىنا ورنالاستىرىلعان. 14 ادام كاسىپكەرلىك قىزمەتپەن اينالىسسا، 2 ادام قايتارىمسىز گرانتقا يە بولعان. ال 50 گە جۋىق وتباسى باسپانا ساتىپ الۋعا ەكونوميقالىق ۇتقىرلىق سەرتيفيكاتىن يەلەنىپ وتىر.

ەسكە سالا كەتەيىك، جىل باسىنان بەرى ەلگە 12325 قانداس كەلدى.