تالقىلاۋدان كەيىن توقتاپ قالعان كوكجايلاۋ جوباسى الداعى ۋاقىتتا قالاي داميدى

الماتى. KAZINFORM - الماتى تاۋ كلاستەرىن، ونىڭ ىشىندە كوكجايلاۋ جوباسى داميدى. بۇل تۋرالى «ۇلتتىق شاڭعى قاۋىمداستىعى» ز ت ب باس حاتشىسى اسقار ۆاليەۆ ءمالىم ەتتى.

- كوكجايلاۋ جوباسى ەرەكشە نازار اۋدارۋعا لايىق. ول ەكولوگيالىق ورنىقتى دامۋ قاعيداتتارىنا، تابيعي رەسۋرستاردى ساۋاتتى پايدالانۋعا نەگىزدەلگەن. بۇگىندە بۇكىل الەم وسى باعىتتا جىلجىپ كەلەدى. سوڭعى تالقىلاۋدان كەيىن كوكجايلاۋ جوباسى توقتاتىلدى، ءبىراق سوعان قاراماستان ءبىز بۇكىل الەمدە، اسىرەسە، ءبىزدىڭ وڭىردە ۇلكەن دامۋدىڭ ءجۇرىپ جاتقانىن بىلەمىز. شەشۋشى قادام جاسايتىن ۋاقىت جەتتى. شىمبۇلاق پەن وي-قاراعاي تاۋ كۋرورتتارىن بىرىكتىرەيىك، ولاردىڭ اراسىندا ورنالاسقان شاعىن دەمالىس ورىندارىنىڭ بارلىعىن دامىتايىق. ءبىز الماتى تاۋ كلاستەرىن، ونىڭ ىشىندە كوكجايلاۋ جوباسىن دامىتامىز، - دەپ اتاپ ءوتتى اسقار ۆاليەۆ.

سونىمەن قاتار، ول شىمبۇلاقتا حالىقارالىق جارىستاردى وتكىزۋ جانە جاتتىعۋلار ءۇشىن زاماناۋي ينفراقۇرىلىم قۇرۋ قاجەت ەكەنىن تىلگە تيەك ەتتى.

- جۇمىس ىستەپ تۇرعان تاۋ شاڭعىسى كۋرورتتارىنىڭ، اتاپ ايتقاندا، شىمبۇلاققا كەلۋشىلەر سانى شامادان تىس ارتقان. بۇل سپورتشىلاردىڭ كاسىبي دايىندىق مۇمكىندىكتەرىن شەكتەيدى، - دەپ اتاپ ءوتتى ول.

ايتا كەتەيىك، پرەمەر-مينيستر ولجاس بەكتەنوۆ الماتىدا مەملەكەتتىك ورگاندار مەن ۇيىمدار باسشىلىعى جانە وتاندىق، حالىقارالىق ساراپشىلار قوعامداستىعى وكىلدەرىنىڭ قاتىسۋىمەن سالانى ودان ءارى دامىتۋ ماسەلەلەرى بويىنشا كەڭەس وتكىزدى.