ءوز سوزىندە يسلام بايرامۋكوۆ حالىق كەڭەسى ەلدىڭ بارلىق وڭىرىنەن كەلگەن ازاماتتاردى بىرىكتىرەتىن بىرەگەي الاڭ ەكەنىن اتاپ ءوتتى.
- وڭىرلەردى دامىتۋ جانە بالالارىمىزعا تەڭ مۇمكىندىكتەر جاساۋ ماسەلەسى ماعان وتە جاقىن. سوڭعى جىلدارى ادىلدىك، بارشاعا تەڭ مۇمكىندىك تۋرالى كوپ ايتىلىپ ءجۇر. بۇل - مەملەكەت باسشىسىنىڭ باستى ۇستانىمى، - دەدى سپورتشى تاۋەلسىزدىك سارايىندا وتكەن كەڭەستىڭ ءبىرىنشى سەسسياسىندا.
سپورتشىنىڭ ايتۋىنشا، بالانىڭ سپورتقا قابىلەتى بولسا، ونى دامىتۋعا جاعداي جاسالۋى كەرەك. ءدال وسىنداي مۇمكىندىك مۋزىكاعا، ونەرگە، عىلىمعا نەمەسە تەحنولوگياعا قىزىعاتىن بالالارعا دا بەرىلۋگە ءتيىس.
- اۋىلداعى بالاعا سپورتپەن اينالىسۋعا، مادەنيەت وشاقتارىنا بارۋعا، زاماناۋي ءبىلىم بەرۋ رەسۋرستارىنا قول جەتكىزۋگە، ءتۇرلى جارىستار مەن بايقاۋلارعا قاتىسۋعا جانە ءوز بولاشاعىن قالىپتاستىرۋعا مۇمكىندىك بەرەتىندەي جان-جاقتى جاعداي جاساۋىمىز كەرەك. تالانتتىڭ ەڭ كىشكەنتاي اۋىلدىڭ وزىندە دۇنيەگە كەلۋى مۇمكىن ەكەنىن ءوز تاجىريبەمنەن بىلەمىن. سول تالانتتى كورە الامىز با جانە ونىڭ اشىلۋىنا مۇمكىندىك بەرە الامىز با - ماسەلە سوندا، - دەدى يسلام بايرامۋكوۆ.
سپورتشى ءوزىنىڭ تۋعان جەرى - جامبىل وبلىسىنىڭ قازىرگى تۇرار رىسقۇلوۆ اۋدانىن مىسال ەتتى. بۇل ءوڭىردىڭ سپورت تاريحى لۋگوۆوي جىلقى زاۋىتىمەن دە تىعىز بايلانىستى.
- كىشكەنتاي عانا اۋداننان بىزدە 11 وليمپيادا جۇلدەگەرى بار ەكەن. ونىڭ ىشىندە 3 التىن، 2 كۇمىس، 6 قولا مەدال يەگەرى بار. الەمگە ايگىلى، كەزىندە بۇكىل الەمگە شۋلى لۋگوۆوي جىلقى زاۋىتى بولعان. سول جەردەن شىققان اتاقتى سايگۇلىك - «ابسەنت». 1960-جىلى يتاليادا، ريم قالاسىندا وتكەن وليمپيادا ويىندارىندا توپ جارىپ، التىن مەدال ۇتىپ العان بولاتىن. ودان كەيىن 1964-جىلى جاپونيادا، توكيو قالاسىندا وتكەن وليمپيادا ويىندارىندا ەكى مەدال يەگەرى - ەكى قولا، جانە 1968-جىلى مەكسيكادا وتكەن وليمپيادا ويىندارىندا تاعى دا قولا مەدال العان، - دەدى ول.
وسى تۇرعىدا ي. بايرامۋكوۆ قازاقستان حالىق كەڭەسىنىڭ ءرولى ماڭىزدى ەكەنىن ايتتى.
- ءبىز وڭىرلەردىڭ دامۋى تۋرالى ناقتى ماسەلەلەردى كوتەرۋىمىز قاجەت. بۇگىن تەڭ مۇمكىندىكتەر جاساي وتىرىپ، ءبىز ەرتەڭگى قازاقستاننىڭ ادامي كاپيتالىن دامىتامىز، - دەدى ول.
بۇعان دەيىن مەملەكەت باسشىسى قاسىم-جومارت توقايەۆ وسكەلەڭ ۇرپاقتىڭ بوس ۋاقىتىن ءتيىمدى وتكىزۋىنە جاعداي جاساپ، كىتاپحانا، مۋزەي، مەكتەپ، ساياباق جانە باسقا دا قوعامدىق نىسانداردى بارىنشا ءتيىمدى پايدالانۋ كەرەگىن ايتقان ەدى.
سونىمەن بىرگە، پرەزيدەنت اباتتاندىرۋ ىسىنە جۇمسالعان قارجى - حالقىمىزدىڭ بولاشاعىنا جاسالعان ينۆەستيتسيا دەپ اتادى.