تەڭگەگە قاتىستى رۋبلدىڭ نىعايۋى قازاقستان ءۇشىن ماڭىزدى فاكتورعا اينالىپ كەلەدى - سۇلەيمەنوۆ

استانا. KAZINFORM - ۇلتتىق قوردىڭ رەسۋرستارىن جيناقتاپ، بارىنشا ءتيىمدى پايدالانعان ءجون. بۇل تۋرالى ۇلتتىق بانك ءتوراعاسى تيمۋر سۇلەيمەنوۆ ايتتى.

 - سىرتقى ينفلياتسيالىق جاعداي قولايسىز قالىپتاسىپ وتىر. وعان سەبەپ - رەسەيدەگى جوعارى ينفلياتسيا جانە الەمدىك ازىق-تۇلىك نارىقتارىنداعى باعانىڭ ءوسۋى. فاو دەرەكتەرى بويىنشا ءساۋىر ايىندا ازىق-تۇلىك باعاسىنىڭ يندەكسى 128,3 تارماققا دەيىن كوتەرىلىپ، جىل باسىنان ءوسۋ ءۇردىسىن جالعاستىرىپ جاتىر. دامىعان ەلدەردە ينفلياتسيالىق قىسىم تومەندەپ كەلەدى. ەۋرووداقتا ينفلياتسيا 2,4 پايىزعا دەيىن، ا ق ش- تا 2,3 پايىزعا دەيىن باياۋلادى. ساۋدادا قالىپتاسقان شيەلەنىسكە قاراماستان، ەۋروپا ورتالىق بانكى دەزينفلياتسيالىق فاكتورلار باسىم بولعانىمەن، ينفلياتسيالىق تارگەتكە قول جەتكىزۋ مۇمكىندىگىنە سەنىمدى ەكەنىن ءبىلدىردى. سونىمەن قاتار ا ق ش- تىڭ فەدەرالدىق رەزەرۆ جۇيەسى (ف ر ج) ساقتىق تانىتىپ، كۇتۋ ۇستانىمىن ساقتاپ قالدى. ينفلياتسيالىق تاۋەكەلدەردىڭ ساقتالۋى مەن ا ق ش- تىڭ ەكونوميكالىق تۇرعىدا دامۋ جولىن جانە ساۋدا ساياساتى باعىتىنا قاتىستى بەلگىسىزدىكتى ەسكەرە وتىرىپ، مولشەرلەمە وزگەرىسسىز قالدىرىلدى، - دەدى تيمۋر سۇلەيمەنوۆ.

ۇ ب باسشىسىنىڭ ايتۋىنشا، رەسەيدەگى ينفلياتسيا 10,2 پايىزعا دەيىن باياۋلاعانمەن، نىسانالى دەڭگەيدەن ەداۋىر اسىپ ءتۇستى. رەسەي بانكى قاتاڭ ساياساتتى جالعاستىرىپ، نەگىزگى مولشەرلەمەنى 21 پايىز دەڭگەيىندە ۇستاپ تۇر. 2026 -جىلدىڭ سوڭىنا تامان ماقساتتى باعدارعا جەتۋ ءۇشىن بيىل نەگىزگى مولشەرلەمەنى 19,5- 21,5 پايىز ارالىعىندا ساقتاۋدى كوزدەيدى.

- بۇل جاعدايدا تەڭگەگە قاتىستى رۋبلدىڭ نىعايۋى قازاقستان ءۇشىن ماڭىزدى فاكتورعا اينالىپ كەلەدى. ءبىر جاعىنان، بۇل وتاندىق وندىرۋشىلەر، اسىرەسە، وڭدەۋ ونەركاسىبى ءۇشىن باعالىق ارتىقشىلىق تۋعىزادى، ەكىنشى جاعىنان - رەسەيدەن كەلەتىن يمپورتتىڭ ەداۋىر كولەمىنە بايلانىستى ينفلياتسيالىق ۇدەرىستەرگە اسەر ەتەدى. مۇناي نارىعىنداعى جاعداي دا تۇراقسىز، - دەدى ول.

ونىڭ سوزىنە قاراعاندا، قىتاي تاراپىنان سۇرانىس تومەندەگەن سوڭ وپەك+ ەلدەرىنەن تۇسەتىن ۇسىنىستىڭ ۇلعايۋىن كۇتۋدەن جانە جاھاندىق ساۋدا شيەلەنىسىنىڭ كۇشەيۋىنەن باعاعا قىسىم بار.

- قازىرگى جاعدايدى ەسكەرسەك، بولجامنىڭ بازالىق سسەناريىندە Brent ماركالى مۇنايدىڭ ورتاشا باعاسى الدىڭعى راۋندتاعى 1 باررەل ءۇشىن 73 دوللارعا قارسى 65 دوللار دەڭگەيىندە بەلگىلەندى. ساۋدا ەسكالاتسياسى جانە مۇناي باعاسىنىڭ كۇرت تومەندەۋى شيكىزات نارىعىنا قۇرىلىمدىق جاعىنان تاۋەلدى ەكەنىمىزدى كورسەتتى. مۇنداي جاعدايدا ۇلتتىق قوردىڭ رەسۋرستارىن جيناقتاپ، بارىنشا ءتيىمدى پايدالانعان ءجون، - دەدى ول.

اۆتور

مارلان جيەمباي