ەسىل وزەنىنىڭ بويىندا ءبىرىڭعاي قوعامدىق كەڭىستىكتەر سالىنادى

پرەزيدەنت ساياباعىندا استانا اكىمى جەڭىس قاسىمبەك ەلوردانى كەشەندى تۇردە كورىكتەندىرۋ مەن كوگالداندىرۋ جۇمىستارى ءجۇرىپ جاتقانىن باياندادى.

شاھار باسشىسىنىڭ ايتۋىنشا، سوڭعى جىلدارى استانادا 500 گە جۋىق اۋلا مەن قوعامدىق كەڭىستىك اباتتاندىرىلدى، جىل سوڭىنا دەيىن 170 تەن استام اۋلا مەن قوعامدىق ورىن، سونىڭ ىشىندە پاركتەر، گۇلزارلار مەن بۋلۆارلار رەتكە كەلتىرىلەدى.

مەملەكەت باسشىسىنا ەسىل وزەنىنىڭ بويىندا قوعامدىق جانە رەكرەاتسيالىق كەڭىستىكتەردىڭ ءبىرىڭعاي جۇيەسى قالىپتاسىپ كەلە جاتقانى تۋرالى مالىمەت بەرىلدى. وسى جۇمىستار اياسىندا قالانىڭ ءتۇرلى بولىگىندەگى پاركتەر، سەرۋەن جانە سپورت اۋماقتارى تۇتاس جاسىل بەلدەۋگە بىرىكتىرىلەدى.

وسىلايشا ەلوردادا سۋ بويىندا 27 شاقىرىم ۇزدىكسىز مارشرۋت قۇرىلادى. ون شاقىرىم جاعالاۋ اباتتاندىرىلادى.

ءوز كەزەگىندە ەكولوگيا جانە تابيعي رەسۋرستار ءمينيسترى الىبەك قۋانتىروۆ مەملەكەت باسشىسىنىڭ «تازا قازاقستان» باستاماسى جۇزەگە اسىرىلا باستاعان كەزدەن بەرى 2 مىڭنان استام ەكولوگيالىق ءىس-شارا ۇيىمداستىرىلعانىن باياندادى. ونىڭ اياسىندا 3,8 ميلليون توننا قوقىس جينالىپ، 10 مىڭداي قوقىس توگەتىن ورىن جويىلعان.

ايتا كەتەيىك، مەملەكەت باسشىسى قاسىم-جومارت توقايەۆ «تازا قازاقستان» ەكولوگيالىق اكسياسىنا قاتىستى جانە جاس ەكوبەلسەندىلەرمەن بىرگە پرەزيدەنت ساياباعى اۋماعىندا اعاش ەكتى.

ەسكە سالا كەتسەك، 19-قىركۇيەكتە دۇنيەجۇزىلىك تازالىق كۇنى (World Cleanup Day) اتالىپ وتەدى. بۇل كۇنى ەلىمىزدىڭ بارلىق وڭىرىندە «تازا قازاقستان» جوباسى اياسىندا اۋقىمدى ەكولوگيالىق اكسيالار وتەدى.