سوتتالعان ساكەن مۇسايبەكوۆ جاڭا قىزمەتكە قالاي تاعايىندالدى - انتيكور جاۋابى

استانا. KAZINFORM - سىبايلاس جەمقورلىققا قارسى ءىس-قيمىل اگەنتتىگى ساكەن مۇسايبەكوۆ «بارىس» حوككەي كومانداسىنىڭ باس ديرەكتورى قىزمەتىنە تاعايىندالۋىنا قاتىستى رەسمي تۇسىنىك بەردى.

الدىمەن انتيكور وكىلى ساكەن مۋسايبەكوۆتىڭ الاياقتىق جاساعانى ءۇشىن سوتتالعانىن ەسكە سالدى. ءبىراق، ول كەزدە قىلمىستىق كودەكستىڭ 189-بابىنىڭ 4-بولىگى (اسا ءىرى كولەمدە الاياقتىق جاساۋ) سىبايلاس جەمقورلىق بابى بولىپ سانالماعان.

- قازىر اتالعان 189-باپتىڭ 4-بولىگى سىبايلاس جەمقورلىق سيپاتىنداعى قىلمىس قاتارىنا جاتادى. ەندى اتالعان باپ بويىنشا سوتتالعان بارلىق تۇلعا مەملەكەتتىك قىزمەتتە، كۆازيمەملەكەتتىك سەكتوردا جانە باسقا دا سالالاردا جۇمىس ىستەۋ قۇقىعىنان ءومىر بويىنا ايىرىلادى، - دەپ ءتۇسىندىردى انتيكور وكىلى دانيار بيگايداروۆ ۆەدومستۆودا وتكەن باسپا ءسوز ءماسليحاتىندا.

سونداي-اق اگەنتتىكتىڭ رەسمي وكىلى زاڭناما 2022-جىلى سىبايلاس جەمقورلىققا قارسى قىزمەتتىڭ باستاماسىمەن ەنگىزىلگەن وزگەرىستەردەن كەيىن قابىلدانعانىن ايتتى.

ايتا كەتسەك، ساكەن مۇسايبەكوۆ «بارىس» حوككەي كومانداسىنىڭ باس ديرەكتورى قىزمەتىنە بيىل 18-ماۋسىمدا تاعايىندالدى.