«قازاقستان حالىق كەڭەسى تۋرالى» كونستيتۋتسيالىق زاڭنىڭ 8-بابىنا سايكەس، مەملەكەت باسشىسى قازاقستان حالىق كەڭەسىنىڭ ءتوراعاسى لاۋازىمىنا كانديداتۋرانى ۇسىنادى.
- وسىعان وراي، كەڭەس ءتوراعاسىنىڭ كانديداتۋراسى بويىنشا وزدەرىڭىزبەن اقىلداسۋ قاجەت. بۇل - كونستيتۋتسيالىق مارتەبەسى بار، بەدەلدى لاۋازىم. سوندىقتان بۇل لاۋازىمعا ەلگە بەلگىلى، حالىق پەن بيلىكتىڭ اراسىندا دانەكەر بولاتىن ازامات كەلۋگە ءتيىس دەپ سانايمىن. وسىنىڭ بارلىعىن ەسكەرە وتىرىپ، مەن ەرلان جاقان ۇلى قوشانوۆتىڭ كانديداتۋراسىن ۇسىنامىن، - دەدى قاسىم-جومارت توقايەۆ.
پرەزيدەنت ءوزى ۇسىنعان ە. قوشانوۆتىڭ جاۋاپكەرشىلىگى جوعارى، بىلىكتى، تاجىريبەسى مول تۇلعا ەكەنىن اتاپ ءوتتى. ول مەملەكەتتىك قىزمەت جۇيەسىندە ۇزاق جىلدار ەڭبەك ەتىپ، بۇل جۇمىستى ابىرويمەن اتقاردى. ءماجىلىس ءتوراعاسى رەتىندە اۋقىمدى رەفورمالاردى ىسكە اسىرۋعا بەلسەنە اتسالىستى.
- ەندى حالىق كەڭەسىنىڭ ءتوراعاسى رەتىندە تابىستى جۇمىس ىستەپ، قوعامدىق كەلىسىمدى نىعايتۋعا زور ۇلەس قوساتىنىنا كۇمانىم جوق. سوندىقتان ەرلان جاقان ۇلى قوشانوۆتىڭ كانديداتۋراسىنا مۇقيات نازار اۋدارىپ، قولدايسىزدار دەپ سەنەمىن.
جالپى، قازاقستان حالىق كەڭەسىنىڭ الدىندا تۇرعان مىندەت وتە كوپ. ەرتەڭ حالىق كەڭەسىنىڭ نەگىزگى وتىرىسىندا الداعى ماڭىزدى مىندەتتەرىنە كەڭىرەك توقتالامىن. ال قازىر وسى ماسەلە بويىنشا كوپ ءسوز ايتسام، قيسىنسىز بولار. جۇمىستارىڭىز تابىستى بولسىن!، - دەدى مەملەكەت باسشىسى.
بۇدان بولەك، وتىرىستا قازاقستان حالىق كەڭەسىنىڭ ءتوراعاسىنىڭ ورىنباسارلارىن تاعايىنداۋ جانە حالىق كەڭەسى ءتورالقاسىن قالىپتاستىرۋ ماسەلەلەرى قارالادى.
سونداي-اق تۇراقتى كوميتەتتەردىڭ سانى مەن اتاۋى، ولاردىڭ ءتوراعالارى مەن قۇرامدارى جاريالانىپ، حالىق كەڭەسىنىڭ جۇمىس جوسپارى جانە ادەپ جونىندەگى كوميسسيانىڭ قۇرامى بەكىتىلەدى.
ەسكە سالا كەتسەك، جىل باسىندا پرەزيدەنت قاسىم-جومارت توقايەۆ قىزىلورداداعى v ۇلتتىق قۇرىلتايدا حالىق كەڭەسى ينستيتۋتىنىڭ زاڭدىق مارتەبەسى قانداي بولاتىنىن ايتىپ بەردى.
كەشە پرەزيدەنت قاسىم-جومارت توقايەۆ قازاقستان حالىق كەڭەسىنىڭ 126 ادامنان تۇراتىن قۇرامىن بەكىتتى. وندا ەتنومادەني بىرلەستىكتەردەن – 42، قوعامدىق بىرلەستىكتەردەن – 42، ءماسليحاتتار مەن وڭىرلىك قوعامدىق كەڭەستەردەن - 42 وكىل بار.
قازاقستان حالىق كەڭەسىنىڭ ءبىرىنشى سەسسياسى 23-24-قىركۇيەك كۇندەرى وتەدى.