پرەزيدەنت الدىمىزدا اۋقىمدى مىندەت تۇرعانىنا نازار اۋداردى. بۇل - جاھاندا سيفرلىق وركەنيەت پەن ءبىلىم ەكونوميكاسى سالتانات قۇرعان داۋىردە ءومىر ءسۇرىپ، ونەگەلى ىستەرمەن اينالىساتىن ازاماتتار بۋىنىن تاربيەلەپ شىعارۋ.
- سوندىقتان مەنىڭ تاپسىرماممەن جاساندى ينتەللەكتىنى ورتا ءبىلىم بەرۋ جۇيەسىنە جوسپارلى تۇردە ەنگىزۋ ۇدەرىسى باستالدى. دۇرىس پايدالانا بىلسە، جاڭا تەحنولوگيا مۇعالىمدەردىڭ قىزمەتىن الدەقايدا جەڭىلدەتەدى، ولاردى ارتىق جۇمىستان بوساتاتىن سەنىمدى قۇرالعا اينالادى. تالىمگەرلىككە دەن قويىپ، وقۋشىلارمەن تىكەلەي جۇمىس ىستەۋى ءۇشىن ۇستازداردىڭ ۋاقىتى بولۋعا ءتيىس. بۇل باعىتتا ماڭىزدى قادام جاسالدى. بيىل قىركۇيەك ايىندا وقۋ-اعارتۋ مينيسترلىگى ءبىلىم بەرۋ سالاسىنداعى جاساندى ينتەللەكتىنى قولدانۋ ستاندارتىن بەكىتتى. قالادا نەمەسە شالعاي اۋىلدا ورنالاسقانىنا قاراماستان، ەلىمىزدەگى بارلىق مەكتەپ وزىق ادىستەمە مەن تسيفرلىق پلاتفورماعا قول جەتكىزەدى. باستاما جاقسى. جۇمىس دۇرىس باعىتتا ءجۇرىپ جاتىر. حالىقارالىق PISA-2025 زەرتتەۋىنىڭ ناتيجەسى بويىنشا مەكتەپتەرىمىزدىڭ تسيفرلىق دايىندىق دەڭگەيى ەكونوميكالىق ىنتىماقتاستىق جانە دامۋ ۇيىمىنا مۇشە مەملەكەتتەردىڭ ورتاشا كورسەتكىشىنەن استى. وقۋشىلاردىڭ كوگنيتيۆتى بەيىمدەلۋ يندەكسى ورتاشادان جوعارىلادى. الايدا بۇل جولدىڭ باسى عانا، توقمەيىلسۋگە سەبەپ ەمەس. الدا اۋقىمدى جۇمىس كۇتىپ تۇر. وسى جەتىستىكپەن توقتاپ قالۋعا بولمايدى، - دەدى مەملەكەت باسشىسى.
پرەزيدەنت وتكەن اپتادا استانادا جاساندى ينتەللەكت تاقىرىبىنا ارنالعان اۋقىمدى ءىس-شارالار وتكەنىنە توقتالدى.
- Ai Digital Bridge - 2026 فورۋمى، سونداي- اق بەلگىلى ماماندار مەن ساراپشىلاردىڭ قاتىسۋىمەن جاساندى ينتەللەكتىنى دامىتۋ جونىندەگى كەڭەستىڭ وتىرىسى بولدى. وسى وتىرىستا قازاقستاننىڭ اسا ماڭىزدى سالادا مول تابىسقا جەتكەنى اتالىپ ءوتتى. ءبىراق بۇل جايباراقات وتىرۋعا بولادى دەگەن ءسوز ەمەس. سەبەبى جاساندى ينتەللەكت پەن جاڭا تەحنولوگيالار وتە جوعارى قارقىنمەن دامىپ جاتىر. بۇل - ۋاقىت تالابى. بۇدان بولەك، ەلوردامىزدا تۇڭعىش رەت Astana Aى Film فەستيۆالى ءوتتى. شىن مانىندە، بۇل - ناعىز وزىق يننوۆاتسيالىق ءىس-شارا دەپ ايتۋعا بولادى. ويتكەنى ءدال وسى وتە وزەكتى جانە ماڭىزدى شارا اياسىندا استانا قالاسىندا الەمدە العاش رەت جاساندى ينتەللەكتىنىڭ كينو ونەرىندەگى كورىنىسى پايدا بولدى. باسقاشا ايتساق، اتالعان فەستيۆال بۇرىننان قالىپتاسقان ءداستۇرلى كينو ءوندىرىسىنىڭ وزەكتىلىگى ازايا باستاعانىن كورسەتتى. ەندى فيلم تۇسىرۋمەن اينالىساتىن ماماندار شەنەۋنىكتەردىڭ، دەمەۋشىلەردىڭ جانە پروديۋسەرلەردىڭ قولداۋىنا تاۋەلدى بولماي، ءوز بەتىمەن تولىققاندى كينو تۋىندىسىن شىعارا الادى. سوندىقتان استانادا وتكەن بۇل ناعىز جاھاندىق اۋقىمداعى فيلم فەستيۆالىنە الەم جۇرتشىلىعى ايرىقشا نازار اۋداردى، - دەدى قاسىم-جومارت توقايەۆ.
ەسكە سالا كەتەيىك، 2-قازان كۇنى مەملەكەت باسشىسى Astana Ai Film Festival جاساندى ينتەللەكت قولدانعان فيلمدەردىڭ ءبىرىنشى حالىقارالىق بايقاۋىنا قاتىستى.
پرەزيدەنت جاساندى ينتەللەكتىنىڭ تىڭ مۇمكىندىكتەرى جاستاردىڭ الەۋەتىن ارتتىرۋعا جول اشاتىنىن ايتقان بولاتىن.