پرەزيدەنت تۇركىستان وبلىسىنىڭ وندىرىستىك پاركىندەگى كاسىپورىندارمەن تانىستى
تۇركىستان. KAZINFORM - قاسىم-جومارت توقايەۆ وڭىردەگى ينۆەستيتسيالىق جوبالار شوعىرلانعان «SPK TURKISTAN» وندىرىستىك پاركىن ارالاپ كوردى.
وندىرىستىك پاركتىڭ قۇرىلىسى 100 گەكتار جەرگە سالىنادى. قۇرىلىس ەكى كەزەڭ بويىنشا جۇزەگە اسىرىلادى. يندۋستريالىق الاڭنىڭ ءبىرىنشى كەزەڭىندە 30 گەكتار جەر تەلىمى ءبولىنىپ، ءتيىستى ينفراقۇرىلىممەن جانە كوممۋنيكاتسيا جەلىلەرىمەن قامتاماسىز ەتىلدى. باستاپقىدا جالپى قۇنى 96,9 ميلليارد تەڭگەنى قۇرايتىن 29 ينۆەستيتسيالىق جوبانى ىسكە اسىرۋ جوسپارلانعان. بۇگىندە ينۆەستيتسيا كولەمى 36,5 ميلليارد تەڭگە بولاتىن 8 ءوندىرىس ىسكە قوسىلىپ، 712 جاڭا جۇمىس ورنى اشىلدى.
مەملەكەت باسشىسى، ەڭ الدىمەن، كوكونىس ساقتاۋ قويماسىمەن تانىستى.
مۇندا 3,5 مىڭ توننا كوكونىس پەن 500 توننا باكالەيا ونىمدەرىن ساقتاپ، تۇركىستان، كەنتاۋ جانە ارىس قالالارىن ماۋسىم ارالىق كەزەڭدە ازىق-تۇلىكپەن قامتاماسىز ەتەدى. جوبانى «تۇركىستان» الەۋمەتتىك- كاسىپكەرلىك كورپوراتسياسى مەن «م- ادال» كومپانياسى جۇزەگە اسىردى. الداعى ۋاقىتتا ايماقتاعى لەڭگىر، جەتىساي، شاردارا، سارىعاش سەكىلدى ءىرى ەلدى مەكەندەردى الەۋمەتتىك ماڭىزى بار ازىق-تۇلىكپەن قامتاماسىز ەتۋ ءۇشىن سارىاعاش قالاسىنان 2 مىڭ توننالىق قويما سالۋ جوسپارلانعان.
قاسىم-جومارت توقايەۆقا جاڭبىرلاتىپ جانە تامشىلاتىپ سۋارۋ جۇيەلەرىن شىعاراتىن «BNK Group» سەرىكتەستىگىنىڭ ءوندىرىس سەحتارى تانىستىرىلدى.
كاسىپورىن امەريكالىق «Nelson Irrigation» كومپانياسىمەن بىرلەسىپ، «BNK IRRIGATION» ساۋدا بەلگىسىمەن اينالمالى جانە فرونتالدى جاڭبىرلاتقىش ماشينالار ءوندىرىسىن ىسكە قوسقان. كەلەسى كەزەكتە تامشىلاتىپ سۋارۋ قوندىرعىلارىن شىعاراتىن ەكى زاۋىت اشۋدى كوزدەپ وتىر. پرەزيدەنت تاپسىرماسىنا سايكەس، بۇل 2030 -جىلعا دەيىن وبلىستا 216,3 مىڭ گەكتار جەرگە سۋ ۇنەمدەۋ تەحنولوگياسىن ەنگىزۋگە مۇمكىندىك بەرەدى.
مەملەكەت باسشىسى ءبىلىم بەرۋ مەكەمەلەرىنە ارنالعان جيھاز شىعاراتىن «اqniet Holding» ونىمدەرىن كوردى.
سوڭعى ءۇش جىلدا كومپانيا 50-گە جۋىق مەكتەپتى جابدىقتاعان. مۇندا «جايلى مەكتەپ» ستاندارتىنا ساي جيھازدار، «KAZMEDPRIBOR» كومپانياسىمەن بىرلەسىپ، مەديتسينا مەكەمەلەرىنە ارنالعان جابدىقتار جاسالادى.
پرەزيدەنت توڭازىتقىش جانە مۇزداتقىش جابدىقتارىن وندىرەتىن «Jasyl suyq Qazaqstan» كاسىپورنىنىڭ ءوندىرىس الاڭىنا باردى.
ونىمدەرىن ورتالىق ازيا ەلدەرىنە يمپورتتاپ كەلە جاتقان بولگاريالىق UBC Group حولدينگى تۇركىستان وبلىسىندا ەكى ءىرى ءوندىرىس جەلىسىن اشۋ جونىندە شەشىم قابىلداعان. ينۆەستور جوبانىڭ ءبىرىنشى كەزەڭىنە 5 ميلليون ەۋرو كولەمىندە قارجى قۇيادى. «SPK TURKISTAN» اۋماعىنداعى ءوندىرىس الاڭىندا 350-گە جۋىق جۇمىس ورنى اشىلادى. ال «تۇران» ارنايى ەكونوميكالىق ايماعىندا ىسكە قوسىلاتىن ەكىنشى زاۋىتقا 7,5 ميلليارد تەڭگە ينۆەستيتسيا سالىنادى. ناتيجەسىندە ايىنا 10 مىڭعا دەيىن توڭازىتقىش جابدىعىن شىعارىپ، مىڭ ادامدى جۇمىسپەن قامتۋ جوسپارلانىپ وتىر.
قاسىم-جومارت توقايەۆ «Turan Su» مەكەمەسىنىڭ قىزمەتىمەن تانىستى.
2019 -جىلى قۇرىلعان كاسىپورىننىڭ نەگىزگى مىندەتى - مەملەكەت مەنشىگىندەگى يرريگاتسيالىق جۇيەلەر مەن گيدرولوگيالىق قۇرىلىس جايلارىن كۇتىپ ۇستاۋ، جوندەۋ جانە رەكونسترۋكسيالاۋ، ەلدى مەكەندەردى اعىن سۋمەن قامتاماسىز ەتۋ. «Turan Su» باسشىلىعى جۇمىستى ءتيىمدى ۇيىمداستىرىپ، تابىستى ەسەلەۋ ارقىلى قوسىمشا ينۆەستيتسيالىق جوبالاردى جۇزەگە اسىرا باستاعان. اتاپ ايتقاندا، بيىل كاسىپورىن يندۋستريالىق پارك اۋماعىندا جىلىنا 9 مىڭ گەكتارعا تامشىلاتىپ سۋارۋ جۇيەسىن شىعاراتىن ءوندىرىستى ىسكە قوستى. كەلەشەكتە كاسىپورىن سۋارۋ جۇيەلەرىنە ارنالعان پارابولالىق ناۋالار ءوندىرىسىن جولعا قويماق.
وبلىس اكىمى دارحان ساتىبالدىنىڭ ايتۋىنشا، ءوڭىر ەكونوميكاسىنىڭ دامۋىنا تىڭ سەرپىن بەرۋ ءۇشىن تۇركىستان وبلىسىندا 2024-2027 -جىلدار ارالىعىندا جالپى قۇنى 2,5 تريلليون تەڭگە بولاتىن 145 ينۆەستيتسيالىق جوبانى جۇزەگە اسىرۋ - باستى ماقساتتاردىڭ ءبىرى. ناتيجەسىندە 20 مىڭنان استام جاڭا جۇمىس ورنى پايدا بولادى.
پرەزيدەنتكە قىتايلىق «Xinjiang Lihua (Group) Co.Ltd» كومپانياسىمەن وڭىردە ماقتانىڭ ەليتالىق سۇرىپتارىن ءوسىرۋ جانە توقىما كلاستەرىن قۇرۋ جونىندە كەلىسسوزدەر جۇرگىزىلىپ جاتقانى باياندالدى.
بۇدان بولەك، ءىرى جوبالاردىڭ قاتارىندا قۋاتى 926,5 م ۆ ت بۋ- گاز قوندىرعىسىنىڭ، 800 م ۆ ت كۇن جانە جەل ەلەكتر ستانسيالارىنىڭ، تۇركىستان قالاسىنداعى بەس جۇلدىزدى قوناق ءۇيدىڭ قۇرىلىسى، درون جانە بەينەباقىلاۋ كامەرالارى، گاز قازاندىقتارى، تۇرمىستىق تەحنيكا، تاۋ-كەن جانە مەتاللۋرگيا كەشەنىنە ارنالعان قۇرىلعىلار، اليۋمينيي بۇيىمدار ءوندىرىسى سەكىلدى ماڭىزدى باستامالار بار.
مەملەكەت باسشىسىنا بويلەرلەر، ترانسفورماتورلار مەن ەلەكتر تەحنيكاسى جابدىقتارىن، اۋىل شارۋاشىلىعى تەحنيكاسىن، قۇرىلىس ماتەريالدارى مەن حيميالىق زاتتار وندىرەتىن، جۇگەرىنى تەرەڭ وڭدەيتىن، سۋسىن، كيىم-كەشەك، اياق كيىم، جيھاز تۇرلەرىن شىعاراتىن كاسىپورىندار تانىستىرىلدى.
اۆتور
اسحات رايقۇل