پرەزيدەنت سوگىس جاريالادى: كولىك ءمينيسترى ءوزىنىڭ الداعى جۇمىسىنا قاتىستى پىكىر ايتتى
استانا. KAZINFORM - پرەزيدەنت سوگىس جاريالاعاننان كەيىن، ق ر كولىك ءمينيسترى مارات قارابايەۆ ءوزىنىڭ الداعى جۇمىسىنا قاتىستى پىكىر ايتتى.
- مينيسترلىكتىڭ بارلىق قىزمەتكەرى مەملەكەت باسشىسىنىڭ ءبىزدىڭ ۆەدومستۆونىڭ الدىنا قويعان تاپسىرمالارىن ۋاقىتىلى ءارى ساپالى ورىنداۋعا ەكپىن قويادى. وسى مەملەكەتتىك ورگاننىڭ ءبىرىنشى باسشىسى رەتىندە جەكە وزىمە جۇكتەلگەن سەنىمدى اقتاۋ ءۇشىن بار كۇش-جىگەرىمدى سالامىن، - دەدى م. قارابايەۆ سەناتتا جولداردىڭ ماسەلەسىن تالقىلاۋعا ارنالعان ۇكىمەت ساعاتىنان كەيىن تىلشىلەر سۇراعىنا جاۋاپ بەرە وتىرىپ.
بۇل تۇرعىدا ول ۆەدومستۆو جۇمىسىنىڭ ساپاسىن كوتەرۋگە ەرەكشە ءمان بەرەتىنىن اتاپ ءوتتى.
ەسكە سالساق، جاقىندا پرەزيدەنت قاسىم-جومارت توقايەۆتىڭ توراعالىعىمەن قازاقستان رەسپۋبليكاسى قاۋىپسىزدىك كەڭەسىنىڭ كولىك-لوگيستيكا سالاسىن دامىتۋ ماسەلەلەرى جونىندەگى وتىرىسى ءوتتى.
جيىن بارىسىندا مەملەكەت باسشىسى كولىك ءمينيسترى مارات قارابايەۆقا جۇمىس بارىسىندا جىبەرگەن كەمشىلىكتەرى ءۇشىن سوگىس جاريالادى.