پرەزيدەنت سوت اكتىلەرىن ماجبۇرلەپ ورىنداتۋ بويىنشا اقپارات الماسۋ تۋرالى جارلىققا قول قويدى

استانا. KAZINFORM - قازاقستان رەسپۋبليكاسىنىڭ پرەزيدەنتى قاسىم-جومارت توقايەۆ 2025 -جىلعى 16-ماۋسىمدا «سوت اكتىلەرىن، وزگە ۋاكىلەتتى ورگاندار مەن لاۋازىمدى ادامداردىڭ اكتىلەرىن ماجبۇرلەپ ورىنداتۋ كەزىندە اقپارات الماسۋ جونىندەگى ىنتىماقتاستىق تۋرالى جارلىققا قول قويدى.

- سوت اكتىلەرىن، وزگە ۋاكىلەتتى ورگاندار مەن لاۋازىمدى تۇلعالاردىڭ اكتىلەرىن ماجبۇرلەپ ورىنداتۋ كەزىندە اقپارات الماسۋ جونىندەگى ىنتىماقتاستىق تۋرالى كەلىسىمنىڭ جوباسى ماقۇلدانسىن. قازاقستان رەسپۋبليكاسى اتىنان سوت اكتىلەرىن، وزگە ۋاكىلەتتى ورگاندار مەن لاۋازىمدى تۇلعالاردىڭ اكتىلەرىن ماجبۇرلەپ ورىنداتۋ كەزىندە اقپارات الماسۋ جونىندەگى ىنتىماقتاستىق تۋرالى كەلىسىمگە ەسكەرتپەمەن قول قويىلسىن، - دەلىنگەن قۇجاتتا.

كەلىسىم تاراپتاردىڭ ماجبۇرلەپ ورىنداتۋ ورگاندارىنىڭ اتقارۋشىلىق قۇجاتتى ماجبۇرلەپ ورىنداتۋ راسىمدەرىن جۇزەگە اسىرۋ كەزىندە اقپارات الماسۋ جونىندەگى ىنتىماقتاستىعىنىڭ نەگىزگى باعىتتارىن ايقىندايدى.

كەلىسىم شەڭبەرىندە اقپارات الماسۋداعى ماقسات - اتقارۋشىلىق قۇجاتتى ماجبۇرلەپ ورىنداتۋدى قامتاماسىز ەتۋ، سونداي-اق ولاردى ورىنداۋ كەزىندە قۇقىقتىق كومەكتى پايدالانۋ تيىمدىلىگىن ارتتىرۋ.

اتالعان قۇجاتقا سايكەس، تاراپتاردىڭ ماجبۇرلەپ ورىنداتۋ ورگاندارى ماجبۇرلەپ ورىنداتۋ راسىمدەرىن جۇزەگە اسىرۋ كەزىندە مىناداي اقپاراتپەن الماسادى:

- اتقارۋشىلىق ءوندىرىس تۋرالى؛
- بورىشكەردىڭ مۇلىكتىك جاعدايى تۋرالى؛
- بورىشكەردىڭ جۇمىس ورنى، سونداي-اق ونىڭ رەسمي تابىس كوزى، مولشەرى تۋرالى؛
- بورىشكەردىڭ نە ونىڭ مۇلكىنىڭ ورنالاسقان جەرى تۋرالى؛
- سونداي-اق اتقارۋشىلىق ءوندىرىس تاراپتارىنان، وزگە ازاماتتاردان جانە مەملەكەتتىك ورگانداردان الىنعان مالىمەتتەرمەن، انىقتامالارمەن جانە قۇجاتتارمەن الماسادى.

ودان بولەك، ماجبۇرلەپ ورىنداتۋ ورگاندارى اتقارۋشىلىق قۇجاتتى ماجبۇرلەپ ورىنداتۋدى قامتاماسىز ەتۋ ءۇشىن قاجەتتى وزگە دە اقپاراتپەن الماسا الادى.

اتقارۋشىلىق وندىرىسكە كەلەسى جايتتار جاتادى:

- سۇراتىلعان تاراپتىڭ ماجبۇرلەپ ورىنداتۋ ورگانىندا ورىندالعان (نەمەسە ورىندالۋدا) اتقارۋشىلىق قۇجات تۋرالى، سۇراتۋشى تاراپتىڭ اۋماعىندا بورىشكەرگە قاتىستى بەرىلگەن؛
- اتقارۋشىلىق ءوندىرىستىڭ قوزعالعان كۇنى جانە اتقارۋشىلىق قۇجاتتىڭ ورىندالۋعا قابىلدانعان كۇنى، اتقارۋشىلىق قۇجاتتىڭ اتاۋى مەن ءنومىرى، ونىڭ تالاپتارىنىڭ مازمۇنى، ورىندالۋ كەزەڭى؛
- ءوندىرىپ الىنعان بەرەشەك سوماسى، تاركىلەنگەن مۇلىك، ىسكە اسىرىلۋعا ۇسىنىلعان مۇلىك جانە اتقارۋشىلىق قۇجاتتى ورىنداۋ ناتيجەسى تۋرالى باسقا دا سۇراۋ سالۋدا كورسەتىلگەن مالىمەتتەر، بۇل ءبىر قۇجات بويىنشا ەكى رەت ورىنداتۋدىڭ الدىن الۋ ءۇشىن قاجەت.

- كەلىسىمنىڭ مەرزىمى جوق. ءار تاراپ كەلىسىمنەن شىعۋعا قۇقىلى، ول تۋرالى جازباشا حابارلامانى دەپوزيتاريگە 3 اي بۇرىن جولدايدى. سونداي-اق كەلىسىم قولدانىلعان ۋاقىت ىشىندە تۋىنداعان قارجىلىق جانە وزگە دە مىندەتتەمەنى رەتتەيدى، - دەپ تۇسىندىرىلگەن كەلىسىمدە.

كەلىسىمنىڭ تولىق نۇسقاسىمەن سىلتەمە ارقىلى ءوتىپ تانىسۋعا بولادى.

جارلىق 2025 -جىلعى 16- ماۋسىمدا كۇشىنە ەندى.

ەسكە سالايىق، بىرنەشە جىل بۇرىن ەلىمىزدە سوت اكتىلەرىنىڭ ورىندالۋىن باقىلايتىن ينستيتۋت ەنگىزىلەتىنى ايتىلدى.